ନୂଆଦିଲ୍ଲୀ: କଂଗ୍ରେସ ନେତା ଆଚାର୍ଯ୍ୟ ପ୍ରମୋଦ କୃଷ୍ଣମ ଏକ ବଡ଼ ବିବୃତ୍ତି ଦେଇଛନ୍ତି। ୨୦୨୪ ଲୋକସଭା ନିର୍ବାଚନରେ କଂଗ୍ରେସର ନେତୃତ୍ୱ ସମ୍ପର୍କରେ ପ୍ରିୟଙ୍କା ଗାନ୍ଧୀଙ୍କୁ ପ୍ରଧାନମନ୍ତ୍ରୀଙ୍କ ଚେହେରା ବୋଲି ଘୋଷଣା କରିବାକୁ ସେ ଦାବି କରିଛନ୍ତି। ସେ ଏହା ମଧ୍ୟ କହିଛନ୍ତି ଯେ, କଂଗ୍ରେସ ଦଳର ଚେହେରାର ଅଭାବ ନାହିଁ।
ୟୁପିର ଆଇନ ଶୃଙ୍ଖଳା ବିଷୟରେ ସେ କହିଛନ୍ତି ଯେ, ଯଦି ବୁଲଡୋଜର ଆଇନ ଶୃଙ୍ଖଳା ପରିଚାଳନା କରୁଛି, ତେବେ ପୋଲିସକୁ ମ୍ୟୁନିସିପାଲିଟି କର୍ପୋରେସନ୍, ଜଳସେଚନ କିମ୍ବା ପିଡବ୍ଲ୍ୟୁଡି ବିଭାଗକୁ ହସ୍ତାନ୍ତର କରାଯିବା ଉଚିତ। ଆଚାର୍ଯ୍ୟ ପ୍ରମୋଦ କୃଷ୍ଣମ ଏହା ମଧ୍ୟ କହିଛନ୍ତି ଯେ କଂଗ୍ରେସ ଭିତରେ କିଛି ଲୋକ ଅଛନ୍ତି, ଯେଉଁମାନେ ଦଳକୁ ନଷ୍ଟ କରିବାକୁ ଚେଷ୍ଟା କରୁଛନ୍ତି।
୨୦୨୪ ଲୋକସଭା ନିର୍ବାଚନ ପୂର୍ବରୁ ବିରୋଧୀ ଏକତା ଗଠନ ପାଇଁ କଂଗ୍ରେସର ଉଦ୍ୟମକୁ କ୍ରମାଗତ ଝଟକା ଲାଗୁଛି। ଗତ ମାସରେ ତେଲେଙ୍ଗାନା ସିଏମ କେସିଆର, ଉତ୍ତରପ୍ରଦେଶର ପୂର୍ବତନ ସିଏମ ଏବଂ ସମାଜବାଦୀ ପାର୍ଟି ସଭାପତି ଅଖିଳେଶ ଯାଦବ, ଆଦମୀ ପାର୍ଟିର ମୁଖ୍ୟ ତଥା ଦିଲ୍ଲୀ ସିଏମ ଅରବିନ୍ଦ କେଜ୍ରିୱାଲଙ୍କ ସହ ପଞ୍ଜାବ ସିଏମ ଭଗବନ୍ତ ମାନଙ୍କୁ ଭେଟିଥିଲେ। ଏହି ସମୟରେ ଏକ ଅଣ କଂଗ୍ରେସ ଏବଂ ଅଣ ବିଜେପି ମିଳିତ ମେଣ୍ଟ ଗଠନ ନେଇ ଆଲୋଚନା ହୋଇଥିଲା।
ଏଥି ସହିତ କିଛି ଦିନ ପୂର୍ବରୁ ଅଖିଳେଶ ଯାଦବ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ଟିଏମସି ସୁପ୍ରିମୋ ମମତା ବାନାର୍ଜୀଙ୍କୁ ଭେଟିଥିଲେ। ଏହି ବୈଠକ ପରେ କୁହାଯାଉଛି ଯେ, ସମାଜବାଦୀ ପାର୍ଟି ଆଉ କଂଗ୍ରେସ ସହ ମେଣ୍ଟ କରିବାକୁ ଚିନ୍ତା କରୁନାହିଁ ଏବଂ ୨୦୨୪ ଲୋକସଭା ନିର୍ବାଚନରେ ମମତା ବାନାର୍ଜୀଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ ଘୋଷିତ ହେଲେ ସମର୍ଥନ କରିବ। ପ୍ରକାଶ ଯେ, ୨୦୨୨ ୟୁପି ବିଧାନସଭା ନିର୍ବାଚନରେ ମଧ୍ୟ ସମାଜବାଦୀ ପାର୍ଟି କଂଗ୍ରେସ ସହ ମେଣ୍ଟ କରିବାକୁ ଆଗ୍ରହ ଦେଖାଇ ନଥିଲା।
