ନୂଆଦିଲ୍ଲୀ: ରାଜଧାନୀର ପ୍ରଗତି ମଇଦାନରେ ନୂତନ ସମ୍ମିଳନୀ କେନ୍ଦ୍ରରେ ‘ବିକଶିତ ଭାରତ @ 2047: ଟିମ୍ ଇଣ୍ଡିଆର ଭୂମିକା’ ବିଷୟବସ୍ତୁ ଉପରେ ନୀତି ଆୟୋଗର ଅଷ୍ଟମ ଗଭର୍ନିଙ୍ଗ କାଉନ୍ସିଲ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ପ୍ରଧାନମନ୍ତ୍ରୀ ମୋଦୀ ଅଧ୍ୟକ୍ଷତା କରୁଛନ୍ତି। ତେବେ ଆଠଟି ରାଜ୍ୟର ମୁଖ୍ୟମନ୍ତ୍ରୀ ଏହି ବୈଠକରେ ଯୋଗ ଦେଇନାହାଁନ୍ତି।
ତେବେ ଏହି ବୈଠକରେ ପଶ୍ଚିମବଙ୍ଗର ମମତା ବାନାର୍ଜୀ, ବିହାରର ନୀତୀଶ କୁମାର, ତେଲେଙ୍ଗାନାର କେ ଚନ୍ଦ୍ରଶେଖର ରାଓ, ତାମିଲନାଡୁର ଏମ.କେ ଷ୍ଟାଲିନ, ରାଜସ୍ଥାନର ଅଶୋକ ଗେହଲୋଟ ଏବଂ କେରଳର ପିନାରାଇ ବିଜୟନ ଅଛନ୍ତି। ଏଥି ସହ ଦିଲ୍ଲୀର ଅରବିନ୍ଦ କେଜ୍ରିୱାଲ ଏବଂ ପଞ୍ଜାବର ଭଗବନ୍ତ ମନ ସିଧାସଳଖ ଏହି ବୈଠକ ବର୍ଜନ କରିଛନ୍ତି। ଏହି ବୈଠକରେ ପ୍ରଧାନମନ୍ତ୍ରୀ 2047 ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ର କରିବା ଲକ୍ଷ୍ୟରେ ସ୍ୱାସ୍ଥ୍ୟ, ଦକ୍ଷତା ବିକାଶ, ମହିଳା ସଶକ୍ତିକରଣ ଏବଂ ଭିତ୍ତିଭୂମି ବିକାଶ ସହ ଜଡିତ ପ୍ରସଙ୍ଗ ଉପରେ ବିଚାର କରୁଛନ୍ତି।
NITI ଆୟୋଗ କହିଛି ଯେ, ଦିନିକିଆ ବୈଠକରେ ଆଠଟି ପ୍ରମୁଖ ବିଷୟବସ୍ତୁ ଉପରେ ଆଲୋଚନା କରାଯିବ, ଯେଉଁଥିରେ (1) ବିକଶିତ ଭାରତ @ 2047, (2) ଏମଏସଏମଇ ଉପରେ ଜୋର, (3) ଭିତ୍ତିଭୂମି ଏବଂ ପୁଞ୍ଜି ବିନିଯୋଗ, (4) ଅନୁପାଳନ ହ୍ରାସ (5) ମହିଳା ସଶକ୍ତିକରଣ , (6) ସ୍ୱାସ୍ଥ୍ୟ ଏବଂ ପୁଷ୍ଟିକର, (7) ଦକ୍ଷତା ବିକାଶ, ଏବଂ (8) କ୍ଷେତ୍ର ବିକାଶ ଏବଂ ସାମାଜିକ ଭିତ୍ତିଭୂମି ପାଇଁ ଚାଗତି ଶକ୍ତି।
ଏଥିରେ ଆହୁରି ମଧ୍ୟ କୁହାଯାଇଛି ଯେ, ଏହି ବୈଠକରେ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳର ମୁଖ୍ୟମନ୍ତ୍ରୀ /ଉପ-ରାଜ୍ୟପାଳ, କେନ୍ଦ୍ର ମନ୍ତ୍ରୀ, ନୀତି ଆୟୋଗର ସଦସ୍ୟ ଏବଂ ଉପାଧ୍ୟକ୍ଷ ଅଂଶଗ୍ରହଣ କରିବେ। ଅଷ୍ଟମ ଗଭର୍ନିଙ୍ଗ କାଉନ୍ସିଲ ବୈଠକ ପାଇଁ ଏକ ପ୍ରସ୍ତୁତି ଭାବରେ ଜାନୁଆରୀ 2023 ରେ ଦ୍ୱିତୀୟ ମୁଖ୍ୟ ସଚିବଙ୍କ ସମ୍ମିଳନୀ ଅନୁଷ୍ଠିତ ହୋଇଥିଲା ଯେଉଁଠାରେ ଏହି ବିଷୟଗୁଡ଼ିକ ଉପରେ ବ୍ୟାପକ ଆଲୋଚନା କରାଯାଇଥିଲା।