ଗତକାଲି କେରଳରେ ଜଣେ ଯୁବକ ଜ୍ବରରେ ଆକ୍ରାନ୍ତ ହୋଇ ହସ୍ପିଟାଲରେ ଭର୍ତ୍ତି ହେବା ପରେ ନିପା ଭାଇରସ୍ ନେଇ ଆତଙ୍କ ସୃଷ୍ଟି ହୋଇଥିଲା। ଆଜି କେରଳ ସରକାରଙ୍କ ପକ୍ଷରୁ ଯୁବକ ଜଣଙ୍କ ନିପା ଦ୍ବାରା ସଂକ୍ରମିତ ହୋଇଥିବା ନେଇ ସୂଚନା ଦେଇଛନ୍ତି। ମଙ୍ଗଳବାର ପୁନେରୁ ଭାଇରୋଲୋଜି ପରୀକ୍ଷାଗାରରୁ ଚୂଡାନ୍ତ ରିପୋର୍ଟ ଆସିବା ପରେ ଯୁବକ ସଂକ୍ରମିତ ଥିବା ଘୋଷଣା କରାଯାଇଛି। ଏହା ସହିତ ଅନ୍ୟ ୪ ଜଣ ମଧ୍ୟ ନିପା ଭାଇରସ୍ ଦ୍ବାରା ଆକ୍ରାନ୍ତ ହୋଇଥିବା ସୂଚନା ମିଳିଛି। ଅନ୍ୟ ୪ ଜଣଙ୍କ ମଧ୍ୟରେ ଯୁବକଙ୍କ ଚିକିତ୍ସା କରୁଥିବା ଦୁଇ ଜଣ ନର୍ସ ରହିଥିବା ଜଣାପଡିଛି। ଯୁବକ ଜଣଙ୍କ କିଛି ଦିନ ହେବ ଥ୍ରୀସୁର୍ରେ ରହିଥିବାରୁ ଉକ୍ତ ଅଞ୍ଚଳ ଉପରେ ଏବଂ ନିକଟରେ ଅବସ୍ଥାନ କରିଥିବା ସମସ୍ତ ସ୍ଥାନ ଉପରେ ନଜର ରଖାଯାଇଛି। ସମୁଦାୟ ୮୦ ଜଣଙ୍କୁ ନୀରିକ୍ଷଣରେ ରଖାଯାଇଛି। ଏହା ମଧ୍ୟରୁ ୨୨ ଜଣ କଲେଜ ଛାତ୍ର ରହିଥିବା ଜଣାପଡିଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ହର୍ଷ ବର୍ଦ୍ଧନ ଏହି ମାମଲା ନେଇ କେରଳ ସ୍ବାସ୍ଥ୍ୟ ମନ୍ତ୍ରୀ କେକେ ଶୈଳଜାଙ୍କ ସହିତ ସମ୍ପର୍କରେ ରହିଛନ୍ତି। କେନ୍ଦ୍ର ସରକାର ଖୁବ୍ ଶୀଘ୍ର ମନୋକ୍ଲୋନାଲ ଆଣ୍ଟିବଡି (ଆଣ୍ଟି ଭାଇରସ୍ ଟୀକା) ପଠାଇବେ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଶୈଳଜା। ୨୦୧୮ ମେ ମାସରେ ନିପା ଭାଇରସ୍ ପ୍ରଭାବରେ କେରଳରେ ୨୨ ଜଣ ଆକ୍ରାନ୍ତ ହୋଇଥିବା ବେଳେ ୧୨ ଜଣଙ୍କର ପ୍ରାଣହାନି ଘଟିଥିଲା। କୋଝିକୋଡ ଏବଂ ମଲ୍ଲାପୁରମ୍ରେ ଏହା ସର୍ବାଧିକ କ୍ଷତି ଘଟାଇଥିଲା।
k k shailaja helds press meet on nipah virus