ନିପା ଭାଇରସ୍ରୁ ସୁରକ୍ଷା ପାଇଁ ଆବଶ୍ୟକୀୟ ପଦକ୍ଷେପ ଗ୍ରହଣ କରୁଛି କେରଳ ସ୍ବାସ୍ଥ୍ୟ ମନ୍ତ୍ରାଳୟ। ଭୂତାଣୁ ଦ୍ବାରା ସଙ୍କ୍ରମିତ ରୋଗୀଙ୍କ ନିମନ୍ତେ ଅଲଗା ଓ୍ବାର୍ଡର ବ୍ୟବସ୍ଥା କରାଯାଇଛି। କେରଳର ଉତ୍ତର ଭାଗରେ ଏହି ଭୂତାଣୁ ବ୍ୟାପିଥିବାରୁ ଯେପରି ଏହି ଭୂତାଣୁ ଅନ୍ୟ ସ୍ଥାନକୁ ସଙ୍କ୍ରମିତ ନ ହୁଏ ସେଥିପ୍ରତି ସ୍ବତନ୍ତ୍ର ଧ୍ୟାନ ଦେବାକୁ ପଡୁଛି ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଏ ଏଲ୍ ସୀଜା ପ୍ରକାଶ କରିଛନ୍ତି। ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ ଏହି ଭୂତାଣୁ ବ୍ୟାପିଥିବା ଅଞ୍ଚଳ ପଥନମଥିଟ୍ଟା, ଥିରୁଭଲ୍ଲା, କୋଝେଚେରୀ, ଆଦୁର, ରାନ୍ନା, କୋନ୍ନି ଏବଂ ମାଲ୍ଳାପଲ୍ଲୀରେ ଚିକିତ୍ସା ବ୍ୟବସ୍ଥା ଯୁଦ୍ଧକାଳୀନ ଭିତ୍ତିରେ ଚାଲିଥିବା ବେଳେ ରୋଗୀଙ୍କ ପାଇଁ ସ୍ବତନ୍ତ୍ର ଓ୍ବାର୍ଡର ବ୍ୟବସ୍ଥା କରାଯାଇଛି ଯାହା ଦ୍ବାରା ସଂକ୍ରମଣ ନବଢେ। ସେହିପରି ଆଜି ୪୭ ବର୍ଷୀୟ ଜନୈକା ମହିଳା ଏଚ୍୧ ଏନ୍୧ ଭୂତାଣୁର ଶିକାର ହୋଇଥିବାର ଆଶଙ୍କା ପ୍ରକାଶ ପାଇଛି। ମହିଳାଙ୍କ ନମୁନା ପରୀକ୍ଷଣ ପାଇଁ ପଠାଯାଇଛି ବୋଲି ସୀଜା ପ୍ରକାଶ କରିଛନ୍ତି। ବର୍ତ୍ତମାନ ସୁଦ୍ଧା ସମୁଦାୟ ୨୧୫ ଜଣ ନିପା ଦ୍ବାରା ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି।
