କୋଲକାତା: ବୁଧବାର ଦିନ ଚନ୍ଦ୍ରର ଦକ୍ଷିଣ ମେରୁରେ ଅବତରଣ କରିବାରେ ଭାରତ ଐତିହାସିକ ସଫଳତା ପାଇଛି। ଏଥି ସହିତ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଭୁଲ ଏକ ନୂଆ ପରିହାସ ପାଲଟିଛି। ଚନ୍ଦ୍ରଯାନ-୩ ଲ୍ୟାଣ୍ଡର୍ ଚନ୍ଦ୍ରରେ ପହଞ୍ଚିବାର କିଛି ସମୟ ପୂର୍ବରୁ କୋଲକାତାରେ ଏକ କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ ବାନାର୍ଜୀ ଭୁଲରେ ମହାକାଶଚାରୀ ରାକେଶ ଶର୍ମାଙ୍କ ବଦଳରେ ବଲିଉଡ ଅଭିନେତା-ଚଳଚ୍ଚିତ୍ର ନିର୍ମାତା ରାକେଶ ରୋଶନଙ୍କ ବିଷୟରେ ଉଲ୍ଲେଖ କରିଥିଲେ। ଯାହା ପରେ ସୋସିଆଲ ମିଡିଆରେ ଏହି ପ୍ରସଙ୍ଗ ଆଲୋଚନାର ବିଷୟ ପାଲଟିଥିଲା।
ପଶ୍ଚିମବଙ୍ଗର ସିଏମ ମମତା ବାନାର୍ଜୀ କ’ଣ କହିଛନ୍ତି:
ସିଏମ ମମତା ବାନାର୍ଜୀ କହିଛନ୍ତି ଯେ, “ପଶ୍ଚିମବଙ୍ଗର ଲୋକଙ୍କ ତରଫରୁ ମୁଁ ISRO କୁ ମୋର ଆଗୁଆ ଶୁଭେଚ୍ଛା ପଠାଉଛି। ବୈଜ୍ଞାନିକଙ୍କ ନିକଟକୁ ଏହାର ଶ୍ରେୟ ଯିବା ଉଚିତ, ଦେଶକୁ ଶ୍ରେୟ ଯିବା ଉଚିତ। ରାକେଶ ରୋଶନ ଚନ୍ଦ୍ରରେ ଅବତରଣ କରିବା ପରେ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ସେଠାରୁ ଭାରତ କିପରି ଦେଖାଗଲା ବୋଲି ତାଙ୍କୁ ପଚାରିଥିଲେ। ”ଭାରତୀୟ ବାୟୁସେନା ପାଇଲଟ୍ ରାକେଶ ଶର୍ମା ସୋଭିଏତ୍ ୟୁନିଅନର ସୋୟୁଜ୍ ଟି -୧୧ ମିଶନର ଏକ ଅଂଶ ଭାବରେ ୧୯୮୪ ରେ ମହାକାଶକୁ ଯାତ୍ରା କରିଥିବା ପ୍ରଥମ ଭାରତୀୟ ହୋଇଥିଲେ।
ସୋସିଆଲ ମିଡିଆରେ ମମତା ବାନାର୍ଜୀଙ୍କ ଭୁଲ ଭାଇରାଲ ହୋଇଛି:
ମହାକାଶଚାରୀ ଏକ ଲାଇଭ୍ ଟେଲିଭିଜନ ସାମ୍ବାଦିକ ସମ୍ମିଳନୀରେ ତତ୍କାଳୀନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ସହ ମହାକାଶରୁ କଥା ହୋଇଥିଲେ। ଏହା ପରେ ଇନ୍ଦିରା ଗାନ୍ଧୀ ରାକେଶ ଶର୍ମାଙ୍କୁ ପଚାରିଲେ ଯେ, ଭାରତ ଆପଣଙ୍କୁ ଉପରୁ କିପରି ଦେଖାଯାଉଛି? ସେ କବି ଇକବାଲଙ୍କ ପ୍ରସିଦ୍ଧ ଧାଡିଗୁଡିକର ଉଦ୍ଧୃତ କରି ଉତ୍ତର ଦେଇ କହିଥିଲେ ଯେ, ସାରେ ଜହାଁ ସେ ଆଚ୍ଛା (ସମଗ୍ର ଦୁନିଆଠାରୁ ଭଲ)। ପଶ୍ଚିମବଙ୍ଗର ମୁଖ୍ୟମନ୍ତ୍ରୀଙ୍କ ଭୁଲ ସୋସିଆଲ ମିଡିଆରେ ଭାଇରାଲ ହୋଇଛି।
ଅନ୍ୟ ନେତାମାନେ ମଧ୍ୟ ଭୁଲ କରିଛନ୍ତି:
ଚନ୍ଦ୍ରଯାନ-୩ ଉପରେ ଅଜବ ବିବୃତ୍ତି ଦେଇଥିବା ମମତା ବାନାର୍ଜୀ ଏକମାତ୍ର ନେତା ନୁହଁନ୍ତି। ରାଜସ୍ଥାନ ମନ୍ତ୍ରୀ ଚନ୍ଦ୍ରଯାନ-୩ ମିଶନର “ଯାତ୍ରୀ” ମାନଙ୍କୁ ଅଭିନନ୍ଦନ ଜଣାଇଛନ୍ତି। ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ ରାଜସ୍ଥାନ କ୍ରୀଡ଼ା ମନ୍ତ୍ରୀ ଅଶୋକ ଚାନ୍ଦ କହିଛନ୍ତି ଯେ, “ଯଦି ଆମେ ସଫଳ ହୋଇ ସୁରକ୍ଷିତ ଅବତରଣ କରୁଛୁ, ତେବେ ମୁଁ ଯାତ୍ରୀମାନଙ୍କୁ ସଲାମ କରୁଛି। ଆମ ଦେଶ ବିଜ୍ଞାନ ଏବଂ ମହାକାଶ ଅନୁସନ୍ଧାନରେ ଏକ ପାଦ ଆଗକୁ ବଢିଛି, ମୁଁ ଏଥିପାଇଁ ଦେଶବାସୀଙ୍କୁ ଅଭିନନ୍ଦନ ଜଣାଉଛି।”
ରୋଭର ପ୍ରଜ୍ଞା ଆସନ୍ତା ୧୪ ଦିନ କିମ୍ବା ଗୋଟିଏ ଚନ୍ଦ୍ର ଦିନ ପାଇଁ ଚନ୍ଦ୍ର ପୃଷ୍ଠକୁ ଅନୁସନ୍ଧାନ କରିବ, ପୃଥିବୀର ବୈଜ୍ଞାନିକମାନଙ୍କୁ ଚିତ୍ର ଏବଂ ତଥ୍ୟ ପଠାଇବ।
