ନୂଆଦିଲ୍ଲୀ: ଲୋକସଭା ନିର୍ବାଚନ ପୂର୍ବରୁ ବିଜେପି ବିରୋଧରେ ସଂଗଠିତ ବିରୋଧୀ ଦଳର ‘ଇଣ୍ଡିଆ’ ମେଣ୍ଟରେ ଅନ୍ତର୍ଭୁକ୍ତ କରିବା ପାଇଁ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ବିଷୟରେ ବରିଷ୍ଠ ନେତା ଏଚଡି ଦେବେଗୌଡା ଏକ ବଡ଼ ଖୁଲାସା କରିଛନ୍ତି। ସେ ଦାବି କରିଛନ୍ତି ଯେ, ୪ ମାସ ପୂର୍ବେ ଜେଡିୟୁ ନେତା ନୀତୀଶ କୁମାର ତାଙ୍କୁ ତାଙ୍କ ସହ ଆସିବାକୁ ପ୍ରସ୍ତାବ ଦେଇଥିଲେ।
ଜନତା ଦଳ ସେକୁଲାର (ଜେଡିଏସ) ମୁଖ୍ୟ ଦେବଗୌଡା କହିଛନ୍ତି ଯେ, ନୀତୀଶ କୁମାର ଜନତା ଦଳର ପୂର୍ବତନ ଗୋଷ୍ଠୀକୁ ମିଶାଇ ‘ଜନତା ଫ୍ରିଡମ ଫ୍ରଣ୍ଟ’ ଗଠନ କରିବାକୁ ଚାହୁଁଥିଲେ। ଏଥିପାଇଁ ତାଙ୍କୁ ଏକ ଅଫର ମଧ୍ୟ ଦିଆଯାଇଥିଲା। ପୂର୍ବତନ ପ୍ରଧାନମନ୍ତ୍ରୀ ଦେବ ଗୌଡା ଦାବି କରିଛନ୍ତି ଯେ, ସେ ଜନତା ଦଳ ୟୁନାଇଟେଡ (ଜେଡିୟୁ) ସହିତ ଯିବାକୁ ମନା କରି ଦେଇଥିଲେ ଏବଂ ତାଙ୍କୁ କଂଗ୍ରେସରୁ ମିଳିଥିବା ବିଶ୍ୱାସଘାତକତାକୁ ମନେ ପକାଇ ଦେଇଥିଲେ।
ଦେବ ଗୌଡା ଆଉ କ’ଣ କହିଥିଲେ?:
ଏନଡିଟିଭି କୁ ଦେଇଥିବା ଏକ ସାକ୍ଷାତକାରରେ ଦେବ ଗୌଡା କହିଛନ୍ତି ଯେ, ସେ ନୀତୀଶ କୁମାରଙ୍କ ପ୍ରତିନିଧୀଙ୍କୁ କହିଥିଲେ ଯେ ତାଙ୍କୁ ୯୧ ବର୍ଷ ବୟସ ହୋଇଛି ଏବଂ କୌଣସି ଜାତୀୟ ପଦବୀ ପାଇଁ ତାଙ୍କର ଅଭିଳାଷ ନାହିଁ। ନୀତୀଶ କୁମାର ଏବଂ କଂଗ୍ରେସକୁ ଇଣ୍ଡିଆ ମେଣ୍ଟରେ ଅନ୍ତର୍ଭୁକ୍ତ କରାଯିବା ସମ୍ପର୍କରେ ଦେବ ଗୌଡାଙ୍କ ବିବୃତ୍ତି ଚର୍ଚ୍ଚାରେ ରହିଛି।
ସେ କହିଛନ୍ତି ଯେ, “ପ୍ରାୟ ଚାରିମାସ ପୂର୍ବେ ନୀତୀଶ କୁମାର ତାଙ୍କ ଦଳର ସଭାପତି ତଥା ଅନ୍ୟ ବରିଷ୍ଠ ନେତାମାନଙ୍କୁ ମୋତେ ମନାଇବା ପାଇଁ ପଠାଇଥିଲେ କିନ୍ତୁ ମୁଁ ଏଥିରେ ସହମତ ନଥିଲି। ମୁଁ ସେମାନଙ୍କୁ କହିଥିଲି ଯେ, ମୁଁ କଂଗ୍ରେସର ବିଶ୍ୱାସଘାତକତା ଦେଖିଛି। ଯଦି ଆପଣ ଆଗକୁ ବଢିବାକୁ ଚାହାଁନ୍ତି, ତେବେ ଅନ୍ୟ ଦଳଗୁଡିକ ସହ ଯୋଗାଯୋଗ କରିପାରିବେ।”
ସାକ୍ଷାତକାରରେ ଦେବ ଗୌଡା କହିଛନ୍ତି ଯେ, ସେମାନେ (କଂଗ୍ରେସ) କର୍ଣ୍ଣାଟକରୁ ଜେଡିଏସ୍ ହଟାଇବେ ବୋଲି ଭାବୁଛନ୍ତି। ରାଜ୍ୟ ମୁଖ୍ୟମନ୍ତ୍ରୀ ସିଦ୍ଧରମେୟାଙ୍କ ସମ୍ପର୍କରେ ସେ କହିଛନ୍ତି ଯେ, ମୁଁ ତାଙ୍କୁ ରାଜନୀତିକୁ ଆଣିଥିଲି, କିନ୍ତୁ ଆଜି ସେ କହିଛନ୍ତି ଯେ ଯଦି ଜେଡିଏସ୍ ଆସେ (ବିରୋଧୀ ଦଳ ମେଣ୍ଟ) ତେବେ ସେ ଏଥିରୁ ବାହାରିଯିବେ।
ସୂଚନାଯୋଗ୍ୟ ଯେ, ୨୦୧୮ ରେ ଜେଡିଏସ୍ ଏବଂ କଂଗ୍ରେସ ମିଳିତ ଭାବେ କର୍ଣ୍ଣାଟକରେ ସରକାର ଗଠନ କରିଥିଲେ, କିନ୍ତୁ ଏହି ମେଣ୍ଟ ଦୀର୍ଘ ଦିନ ଧରି ରହିଲା ନାହିଁ। ଏଥର ଜେଡିଏସ୍ ୨୦୨୪ ଲୋକସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ବିଜେପି ସହିତ ଏକ ମେଣ୍ଟ ଗଠନ କରିଛି।
