ୱାଶିଂଟନ୍: ଇସ୍ରାଏଲ୍-ହମାସ୍ ଯୁଦ୍ଧ ମଧ୍ୟରେ ଆମେରିକାର ସେନା ପୂର୍ବ ସିରିଆର ଦୁଇଟି ସାମରିକ ଠିକଣା ଉପରେ ଆକ୍ରମଣ କରିଛି। ଗୁରୁବାର ଏହି ବିଷୟରେ ସୂଚନା ଦେଇ ଆମେରିକାର ପ୍ରତିରକ୍ଷା ସଚିବ ଲଏଡ ଅଷ୍ଟିନ କହିଛନ୍ତି ଯେ, ଏହି ବେସଗୁଡିକ ଇରାନର ଇସଲାମିକ ରିଭୋଲ୍ୟୁସନାରୀ ଗାର୍ଡ କର୍ପସ ଏବଂ ଏହାର ଅନୁବନ୍ଧିତ ଗୋଷ୍ଠୀ ଦ୍ୱାରା ବ୍ୟବହାର କରାଯାଉଛି। ସେ ଏକ ବିବୃତ୍ତିରେ କହିଛନ୍ତି ଯେ, ଅକ୍ଟୋବର ୧୭ ତାରିଖରୁ ଇରାନ ସମର୍ଥିତ ମିଲିସିଆ ଗୋଷ୍ଠୀ ଦ୍ଵାରା ଇରାକ ଏବଂ ସିରିଆରେ ଆମେରିକାର କର୍ମଚାରୀଙ୍କ ବିରୋଧରେ ଚାଲିଥିବା ତଥା ଅଧିକାଂଶ ଅସଫଳ ଆକ୍ରମଣର ଜବାବ।
ଅଷ୍ଟିନ କହିଛନ୍ତି ଯେ, ଏହି ଆକ୍ରମଣରେ ଜଣେ ଆମେରିକୀୟ କଣ୍ଟ୍ରାକ୍ଟରଙ୍କର ମୃତ୍ୟୁ ଘଟିଥିଲା ଏବଂ ୨୧ ଜଣ ଆମେରିକୀୟ ସୈନିକ ସାମାନ୍ୟ ଆହତ ହୋଇଥିଲେ, କିନ୍ତୁ ସମସ୍ତେ ଡ୍ୟୁଟିକୁ ଫେରିଛନ୍ତି।
ଆମେରିକାର ପ୍ରତିରକ୍ଷା ସଚିବ କହିଛନ୍ତି ଯେ, ଆମେରିକା ଏଭଳି ଆକ୍ରମଣକୁ ବରଦାସ୍ତ କରିବ ନାହିଁ ଏବଂ ନିଜର, ନିଜ କର୍ମଚାରୀ ଏବଂ ସ୍ୱାର୍ଥ ରକ୍ଷା କରିବ।
ସେ କହିଛନ୍ତି ଯେ, “ଆମେରିକା ସଂଘର୍ଷ ଚାହୁଁନାହିଁ କିମ୍ବା ଯୁଦ୍ଧର ଉଦ୍ଦେଶ୍ୟ ନାହିଁ କିମ୍ବା ଅଧିକ ଶତ୍ରୁତା କରିବାକୁ ଇଚ୍ଛା ନାହିଁ, କିନ୍ତୁ ଆମେରିକା ସୈନ୍ୟ ବିରୁଦ୍ଧରେ ଇରାନ ସମର୍ଥିତ ଏହି ଆକ୍ରମଣ ଗ୍ରହଣୀୟ ନୁହେଁ ଏବଂ ଏହାକୁ ବନ୍ଦ କରିବା ଆବଶ୍ୟକ। ଆମେ ସେମାନଙ୍କୁ ଏପରି କରିବାକୁ ଦେବୁ ନାହିଁ। ଯଦି ଆମେରିକାର ସୈନ୍ୟବାହିନୀ ବିରୁଦ୍ଧରେ ଇରାନ ଦ୍ୱାରା ଆକ୍ରମଣ ଜାରି ରହେ, ତେବେ ଆମ ଲୋକଙ୍କ ସୁରକ୍ଷା ପାଇଁ ଅଧିକ ଆବଶ୍ୟକ ପଦକ୍ଷେପ ନେବାକୁ ଆମେ ଦ୍ୱିଧା କରିବୁ ନାହିଁ। “
