ନୂଆଦିଲ୍ଲୀ: ୨୦୨୨ରେ ଭାରତର ପ୍ରାୟ ୧୧ଲକ୍ଷ ଶିଶୁ ପ୍ରଥମ ଡୋଜ ମିଳିମିଳା ଟିକା ନେବାରୁ ବଂଚିତ ହୋଇଥିବା ଘେନି କେତେକ ଗଣମାଧ୍ୟମରେ ଖବର ପ୍ରକାଶ ପାଇଛି । ବିଶ୍ୱ ସ୍ୱାସ୍ଥ୍ୟ ସଂଗଠନ ଓ ଆମେରିକୀୟ ବ୍ୟାଧି ନିୟନ୍ତ୍ରଣ ତଥା ନିରାକରଣ କେନ୍ଦ୍ର ସିଡିସିର ତଥ୍ୟକୁ ଉଦ୍ଧାର କରି ଏହି ଖବର ପ୍ରକାଶ ପାଇଛି । ଏହି ରିପୋର୍ଟ ଅସତ୍ୟ ଏବଂ ତଥ୍ୟ ଉପରେ ଆଧାରିତ ନୁହେଁ ବୋଲି ଭାରତ ସରକାରଙ୍କ ସ୍ୱାସ୍ଥ୍ୟମନ୍ତ୍ରଣାଳୟ ପକ୍ଷରୁ ଏକ ସ୍ପଷ୍ଟୀକରଣ ଦେଇ ପ୍ରକାଶିତ ସମ୍ବାଦକୁ ଖଣ୍ଡନ କରିଛି ।
ସରକାରଙ୍କ ପକ୍ଷରୁ କୁହାଯାଇଛି ଯେ ପ୍ରକାଶିତ ସମ୍ବାଦ ତଥ୍ୟ ଆଧାରିତ ନୁହେଁ ଏବଂ ଏଥିରେ ପ୍ରକୃତ ଚିତ୍ର (ସତକଥା)ପ୍ରଦାନ କରାଯାଇନାହିଁ । ତେଣୁ ଏହା ସତ୍ୟ ଉପରେ ଆଧାରିତ ନୁହେଁ । ପ୍ରକୃତରେ ବିଶ୍ୱ ସ୍ୱାସ୍ଥ୍ୟ ସଂଗଠନୟ ‘ହୁ’ ଓ ୟୁନିସେଫ ଅଧୀନରେ ୨୦୨୨ରେ କରାଯାଇଥିବା ଜାତୀୟ ଟିକାକରଣ ଆକଳନ ତଥ୍ୟ ଆଧାରରେ ଏହି ଖବର ପ୍ରକଶିତ ହୋଇଛି । ଏହି ଆକଳନ ଯାହା ଡବ୍ଲ୍ୟୁୟୁଇଏନ୍ଆଇସି ନାମରେ ପରିଚିତ ସେଥିରେ ଯେଉଁ ସମୟ ସୀମାକୁ ହିସାବକୁ ନିଆଯାଇଛି ତାହା ୨୦୨୨ ଜାନୁୟାରୀ ପହିଲାରୁ ୨୦୨୨ ଡିସେମ୍ବର ୩୧ତାରିଖ ।
ତେବେ ସେ ଯା’ ହେଉ ଭାରତ ସରକାରଙ୍କ ସ୍ୱାସ୍ଥ୍ୟ ମନ୍ତ୍ରଣାଳୟର ସ୍ୱାସ୍ଥ୍ୟ ପରିଚାଳନା ସୂଚନା ବ୍ୟବସ୍ଥା ବା ଏଚ୍ଏମ୍ଆଇଏସ୍ ଅନୁସାରେ ୨୦୨୨-୨୩ ଆର୍ଥିକ ବର୍ଷରେ (ଏପ୍ରିଲ ୨୦୨୨ରୁ ମାର୍ଚ୍ଚ ୨୦୨୩ର) ଦେଶର ୧, ୬୩, ୮୪, ୫୮୦ ଟିକା ନେବାକୁ ଯୋଗ୍ୟ ଶିଶୁଙ୍କ ମଧ୍ୟରୁ ୨, ୬୩, ୨୭୦ଜଣଙ୍କୁ ମିଳିମିଳା ଟିକା (ମିଜିଲ କଣ୍ଟେନିଂ ଭାକ୍ସିନ) ପ୍ରଦାନ କରାଯାଇଛି । ବାସ୍ତବରେ ୨୦୨୨-୨୩ ଆର୍ଥିବ ବର୍ଷରେ ଯୋଗ୍ୟ ଶିଶୁଙ୍କ ମଧ୍ୟରୁ ମାତ୍ର ୨୧, ୩୧୦ଶିଶୁ ମିଳିମିଳା ଟିକା ବା ଏମ୍ସିଭି ନେଇ ପାରି ନାହାନ୍ତି ।
ଏହା ବ୍ୟତୀତ ଦେଶର ସବୁ ଯୋଗ୍ୟ ଶିଶୁ ମିଳିମିଳା ଓ ଅନ୍ୟାନ୍ୟ ଟିକା ବୟସ ଏବଂ ଡୋଜ ଅନୁପାତରେ ଯେପରି ପ୍ରତ୍ୟେକ ପର୍ଯ୍ୟାୟରେ ଠିକ୍ ଭାବେ ନେଇପାରିବେ ସେଥିପାଇଁ କେନ୍ଦ୍ର ସକରାର ସବୁ ରାଜ୍ୟ ସରକାରଙ୍କ ସହିତ ସମନ୍ୱୟ ରଖି ବିଭିନ୍ନ କାର୍ଯ୍ୟକ୍ରମ ଓ ଯୋଜନା କାର୍ଯ୍ୟକାରୀ କରୁଛନ୍ତି । ଟିକା ନେବାରୁ କୌଣସି ଶିଶୁ ଯେପରି ବଂଚିତ ନ ହୁଅନ୍ତି ସେଥି ପାଇଁ ବିଭିନ୍ନ ବ୍ୟବସ୍ଥାକୁ ସୁନିଶ୍ଚିତ କରାଯାଇଛି ।
ଆହୁରି ମଧ୍ୟ ପିଲାମାନଙ୍କୁ ମିଳିମିଳା ଟିକା (ଏମ୍ସିଭି) ଦେବାର ବୟସ ସୀମାକୁ ଭାରତରେ ସାୟୟିକ ସଘନ ଟିକାକରଣ କାର୍ଯ୍ୟକ୍ରମରେ ଦୁଇରୁ ପାଂଚ ବର୍ଷରୁ ବଢାଇ ଦିଆଯାଇଛି । ସଘନ ମିଶନ୍ ଧନୁଷ (ଆଇଏମ୍ଆଇ) ୩.୦ ଓ ୪.୦ ଯଥାକ୍ରମେ ୨୦୨୧-୨୨ରେ କାର୍ଯ୍ୟକାରୀ କରାଯାଇା ସବୁ ପିଲାଙ୍କୁ ମିଳିମିଳା ଟିକା ଦିଆଯାଇଥିଲା । ଏଥିରେ ଯେଉଁମାନେ ପ୍ରଥମ ଡୋଜ ନେଇ ପାରି ନ ଥିଲେ ସେମାନଙ୍କୁ ମିଶାଇ ପ୍ରାୟ ସବୁ ଯୋଗ୍ୟ ପିଲାଙ୍କୁ ମିଳିମିଳା ସହିତ ଅନ୍ୟାନ୍ୟ ଟିକା ପ୍ରଦାନ କରାଯାଇଥିଲା । ତେଣୁ ଆଂଶିକ ଟିକା ନେଇଥିବା ଓ ନୂଆକରି ଟିକା ନେବାକୁ ଥିବା ପ୍ରାୟ ସବୁ ପିଲାଙ୍କୁ ଏହି ଅଭିଯାନରେ ମିଳିମିଳା ଟିକା ଦିଆଯାଇଛି । ୨୦୨୩ରେ କାର୍ଯ୍ୟକାରୀ ହୋଇଥିବା ଆଇଏମ୍ଆଇ ୫.୦ର ସ୍ୱତନ୍ତ୍ର ଲକ୍ଷ୍ୟ ହେଲା ୫ ବର୍ଷ ବୟସ ବର୍ଗ ମଧ୍ୟରେ ଥିବା ସବୁ ପିଲାଙ୍କୁ ମିଳିମିଳା ଟିକା ଦେଇ ଏହି କାର୍ଯ୍ୟକ୍ରମର ବ୍ୟାପକତା ଓ ସଫଳତାକୁ ବୃଦ୍ଧି କରିବା ।
ଦିଲ୍ଲୀ ଓ ପଶ୍ଚିମବଂଗରେ ୯ ମାସରୁ ୫ ବର୍ଷ ବୟସ ବର୍ଗର ଶିଶୁଙ୍କୁ ଏମ୍ଆର୍ ଟିକା ପ୍ରଦାନ କରାଯାଇ ୯୫%ରୁ ଅଧିକ ସଫଳତା ମଳିଛି । ଅନେକ ରାଜ୍ୟରେ ଅତିରିକ୍ତ ଟିକାକରଣ ଅଭିଯାନ ହାତକୁ ନିଆଯାଇ ମୋଟ ୩୦ ନିୟୁତ ଶିଶୁଙ୍କୁ ଅତିରିକ୍ତ ମିଳିମିଳା ଡୋଜ ପ୍ରଦାନ କରାଯାଇଛି । ଯେଉଁ ଅଂଚଳ ଅଧିକ ମିଳିମିଳା ପ୍ରବଣ ସେଠାରେ ଶିଶଙ୍କୁ ଜନ୍ମର ୬ରୁ ୯ମାସ ମଧ୍ୟରେ ପ୍ରଥମ ଡୋଜ ଟିକା ଦିଆଯାଇଛି । ଦେଶର ଅଣମିଳିମିଳା ଓ ଅଣ ରୁବେଲା (ଏନ୍ଏମ୍ଏନ୍ଆର୍) ଡିସାକାର୍ଡ ହାର ଚଳିତ ଆର୍ଥିକ ବର୍ଷରେ ୫. ୮ ଶତାଂଶରୁ ଅଧିକ ।
ଭାରତ ସରକାର ଦେଶର ଶିଶୁମାନଙ୍କୁ ବିଭିନ୍ନ ପ୍ରକାର ମାରାତ୍ମକ୍ମ ବ୍ୟାଧିରୁ ସୁରକ୍ଷିତ ରଖିବାକୁ ନାନାବିଧ କାର୍ଯ୍ୟକ୍ରମ କାର୍ଯ୍ୟକାରୀ କରୁଛନ୍ତି । ଏହାକୁ ବିଭିନ୍ନ ଆର୍ନ୍ତଜାତିକ ସଂସ୍ଥାର ସହଯୋଗରେ କାର୍ଯ୍ୟକାରୀ କରାଯାଉଛି । ଭାରତର ଏହି ଟିକାକରଣ କାର୍ଯ୍ୟକ୍ରମକୁ ଆମେରିକାନ ରେଡକ୍ରସ, ବିଏମ୍ଜିଏଫ୍, ଜିଏଭିଆଇ, ୟୁଏସ୍ସିଡିସି, ୟୁନିସେଫ ଓ ବିଶ୍ୱ ସ୍ୱାସ୍ଥ୍ୟ ସଂଗଠନ ଭଳି ମଧ୍ୟ ପ୍ରଶଂସା କରିଛନ୍ତି । ଭାରତର ସ୍ୱାସ୍ଥ୍ୟ ମନ୍ତ୍ରଣାଳୟ ମଧ୍ୟ ମିଳିମିଳା ଓ ରୁବେଲା ନିୟନ୍ତ୍ରଣ ତଥା ନିରାକରଣ ପାଇଁ ଉଲ୍ଲେଖନୀୟ କାର୍ଯ୍ୟ କରିଥିବାରୁ ରୁବେଲା,ମିଜିଲ୍ସ ପାର୍ଟନର ସିପ ଭ ଚାମ୍ପିୟନସିପ ପୁରସ୍କାର ପାଇଁ ମନୋନୀତ ହୋଇଛି । ୨୦୨୪ମାର୍ଚ୍ଚରେ ୱାଶିଂଟନ ଡିସିରେ ଆୟୋଜିତ ଏକ କାର୍ଯ୍ୟକ୍ରମରେ ଭାରତ ସରକାର ସ୍ୱାସ୍ଥ୍ୟ ପରିବାର କଲ୍ୟାଣ ମନ୍ତ୍ରଣାଳୟ ଏହି ପୁରସ୍କାର ଗ୍ରହଣ କରିବେ ।