ଜୟପୁର: ରାଜସ୍ଥାନର ଭୋଟରମାନେ ପରିବର୍ତ୍ତନ ସପକ୍ଷରେ ଭୋଟ୍ ଦେଇଛନ୍ତି। ଏକଜିଟ୍ ପୋଲ ଅନୁଯାୟୀ, ଡିସେମ୍ବର ୩ ପରେ ରାଜ୍ୟର କ୍ଷମତା ବଦଳିବାକୁ ଯାଉଛି। ରାଜସ୍ଥାନ ବିଧାନସଭା ନିର୍ବାଚନ ୨୦୨୩ ପାଇଁ ନଭେମ୍ବର ୨୫ରେ ୭୫.୪୫ ପ୍ରତିଶତ ମତଦାନ ହୋଇଥିଲା। ରାଜସ୍ଥାନ ବିଧାନସଭା ନିର୍ବାଚନର ଏକଜିଟ୍ ପୋଲରେ ବିଜେପି ହାରାହାରି ୧୨୦ଟି ଆସନରେ ବିଜୟୀ ହେଉଛି। ଇଣ୍ଡିଆ ଟୁଡେ-ମାଇ ଆକ୍ସିସର ଏକଜିଟ୍ ପୋଲରେ ଦଳକୁ ୧୪୦ରୁ ୧୬୦ ଟି ଆସନ ମିଳିଛି, ଯାହା କି ସଂଖ୍ୟାଗରିଷ୍ଠତାଠାରୁ ୪୪ ଟି ଆସନ ଅଧିକ। କଂଗ୍ରେସକୁ ୬୮ରୁ ୯୦ ଟି ଆସନ ମିଳୁଛି। ଅନ୍ୟମାନଙ୍କ ଖାତାକୁ ୫ଟି ସିଟ୍ ଯାଉଥିବା ଦେଖାଉଛନ୍ତି। ଏବିପି-ସି ଭୋଟର ସର୍ଭେରେ ବିଜେପିକୁ ୧୧୩ରୁ ୧୩୭ଟି ଆସନ ମିଳିବ ବୋଲି ଦାବି କରାଯାଇଛି। ଏହି ସର୍ଭେରେ କଂଗ୍ରେସ ପଛରେ ପଡ଼ିଥିବା ଜଣାପଡିଛି। ଟାଇମ୍ସ ନାଓ ନବଭାରତ ଏକଜିଟ୍ ପୋଲରେ ରାଜସ୍ଥାନରେ ବିଜେପିକୁ କ୍ଷମତାର ଦୃଢ଼ ଦାବିଦାରଭାବେ ଦର୍ଶାଯାଇଛି। ଟାଇମ୍ସ ନାଓର ଏକଜିଟ୍ ପୋଲରେ ଭାରତୀୟ ଜନତା ପାର୍ଟି ସବୁଠାରୁ ବଡ଼ ଦଳଭାବେ ଉଭା ହୋଇଛି। ସର୍ଭେ ଅନୁଯାୟୀ ବିଜେପିକୁ ୧୦୯ରୁ ୧୨୫ ଓ କଂଗ୍ରେସକୁ ୧୦୫ରୁ ୧୧୭ ଆସନ ମିଳିବ ବୋଲି ଆକଳନ କରାଯାଇଛି।
ରାଜସ୍ଥାନରେ କଂଗ୍ରେସକୁ ପ୍ରବଳ ଗୋଷ୍ଠୀକନ୍ଦଳର ସମ୍ମୁଖୀନ ହେବାକୁ ପଡ଼ିପାରେ
ଗତ ବିଧାନସଭା ନିର୍ବାଚନରେ ସଚିନ ପାଇଲଟ ବସୁନ୍ଧରା ସରକାରଙ୍କ ବିରୋଧରେ ମୋର୍ଚ୍ଚା ଖୋଲିଥିଲେ। ଫଳରେ କଂଗ୍ରେସ ୨୧ ଆସନରୁ ୧୦୦ ରେ ପହଞ୍ଚିଛି। ନିର୍ବାଚନ ପୂର୍ବରୁ କଂଗ୍ରେସ ହାଇକମାଣ୍ଡ ସଚିନ ପାଇଲଟ ଓ ଅଶୋକ ଗେହଲଟଙ୍କ ହାତ ମିଳାଇଥିଲେ ମଧ୍ୟ ହୃଦୟରେ ସାମିଲ ହୋଇପାରିନଥିଲେ। ପାଇଲଟ ଓ ଗେହଲଟଙ୍କ ମଧ୍ୟରେ କଂଗ୍ରେସ କର୍ମୀଙ୍କ ମଧ୍ୟରେ ବିଭାଜନର ପ୍ରଭାବ ଏକଜିଟ୍ ପୋଲ ଫଳାଫଳରେ ମଧ୍ୟ ଦେଖିବାକୁ ମିଳିଛି।
ଅପରପକ୍ଷରେ ବିଜେପି ଦୁଇ ଦଶନ୍ଧି ଧରି ଚାଲିଥିବା ଗୋଷ୍ଠୀକନ୍ଦଳର ଅନ୍ତ ଘଟାଇଛି। ନିର୍ବାଚନ ପୂର୍ବରୁ ଗୁଲାବ ସିଂହ କଟାରିଆଙ୍କୁ ଆସାମର ରାଜ୍ୟପାଳ କରାଯାଇଥିଲା। ନୂଆ ନେତୃତ୍ୱର ସଙ୍କେତ ଦେଇ ସେ ଏହି କାର୍ଯ୍ୟ ସମ୍ପୂର୍ଣ୍ଣ କରିଥିଲେ। ରାଜସ୍ଥାନ ବିଧାନସଭା ନିର୍ବାଚନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମୁହଁରେ ଲଢ଼ାଯାଇଥିଲା। ସାଂସଦ ଦିୟା କୁମାରୀ, ରାଜ୍ୟବର୍ଦ୍ଧନ ସିଂହ ରାଠୋର ଏବଂ ବାବା ବାଲକନାଥଙ୍କ ଭଳି ଚେହେରାଙ୍କୁ ପ୍ରାର୍ଥୀ କରି ବସୁନ୍ଧରା ରାଜେ ଦେଖାଇ ଦେଇଛନ୍ତି ଯେ ବସୁନ୍ଧରା ରାଜେ ଆଉ ରାଜସ୍ଥାନର ଏକମାତ୍ର ନେତା ନୁହଁନ୍ତି। ୧୯୮୯ ପରଠାରୁ ଏହା ହେଉଛି ପ୍ରଥମ ନିର୍ବାଚନ, ଯେଉଁଥିରେ ଭାରତୀୟ ଜନତା ପାର୍ଟି ମୁଖ୍ୟମନ୍ତ୍ରୀ ଚେହେରା ବିନା ମଇଦାନକୁ ଓହ୍ଲାଇଛି। ଗତ ୩୫ ବର୍ଷ ମଧ୍ୟରେ ରାଜସ୍ଥାନରେ ଭୈରୋ ସିଂହ ଶେଖାୱତ ଓ ବସୁନ୍ଧରା ରାଜେଙ୍କ ନେତୃତ୍ୱରେ ବିଜେପି କ୍ଷମତା ଖେଳରେ ରହିଛି।
ଜାଣନ୍ତୁ କେଉଁ ଅଞ୍ଚଳରେ ହୋଇଥିଲା କଂଗ୍ରେସକୁ ଝଟକା
ନିର୍ବାଚନ ଦୃଷ୍ଟିକୋଣରୁ ରାଜସ୍ଥାନରେ ୫ଟି ଅଞ୍ଚଳ ରହିଛି। ଶେଖାବତୀ, ମାରୱାର, ମେୱାର, ହାଡୋତି ଓ ଧୁନ୍ଧର। ଏକଜିଟ୍ ପୋଲ ଅନୁଯାୟୀ ଶେଖାଓ୍ଵାଟି, ମାରଓ୍ଵାର ଓ ମେଓ୍ଵାରରେ କଂଗ୍ରେସ ଓ ବିଜେପି ମଧ୍ୟରେ କଡ଼ା ଟକ୍କର ରହିଛି। ହାଡୋତି ଓ ଧୁନ୍ଧର ଅଞ୍ଚଳରେ ବିଜେପି ପୁଣିଥରେ କଂଗ୍ରେସକୁ ପଛରେ ପକାଇଛି। ସଚିନ ପାଇଲଟଙ୍କ ଅଞ୍ଚଳରେ କଂଗ୍ରେସକୁ ସବୁଠାରୁ ବଡ଼ ଝଟକା ଲାଗିପାରେ। ୨୦୧୮ ନିର୍ବାଚନରେ ଗୁଜ୍ଜର ସମ୍ପ୍ରଦାୟ କଂଗ୍ରେସକୁ ଏକତରଫାଭାବେ ଭୋଟ୍ ଦେଇଥିଲା ଏବଂ କଂଗ୍ରେସ ବଣିଆ, ରାଜପୁତ, ବ୍ରାହ୍ମଣ ଏବଂ ଏସସି, ଏସଟି, ଗୁର୍ଜର ଅଧ୍ୟୁଷିତ ଧୁନ୍ଧର ଅଞ୍ଚଳରେ ସଫଳତା ପାଇଥିଲା। ଧୁନ୍ଧରରେ ମୋଟ ୩୨ଟି ବିଧାନସଭା ଆସନ ଥିବାବେଳେ ଗତ ନିର୍ବାଚନରେ କଂଗ୍ରେସ ଏହି ଅଞ୍ଚଳରୁ ୨୦ଟି ଆସନ ପାଇଥିଲା। ବିଜେପିକୁ ମାତ୍ର ୬ଟି ଆସନରେ ସନ୍ତୁଷ୍ଟ ହେବାକୁ ପଡ଼ିଥିଲା।
ଗୁଜ୍ଜରମାନଙ୍କ ଅସନ୍ତୋଷ ଯୋଗୁଁ ୨୦୨୩ ନିର୍ବାଚନରେ ବଡ଼ ଧରଣର ପରିବର୍ତ୍ତନର ସଙ୍କେତ ମିଳିଛି। ଏକଜିଟ୍ ପୋଲରେ ବିଜେପିକୁ ୨୫ଟି ଆସନ ଦିଆଯାଇଛି। ଏକଜିଟ୍ ପୋଲ ଅନୁଯାୟୀ ହାଡୋତି ଅଞ୍ଚଳର ମତଦାମାନେ ପୁଣିଥରେ ବିଜେପି ପ୍ରତି ଦୟାଳୁ ହୋଇଛନ୍ତି। ବସୁନ୍ଧରା ରାଜେ ୧୭ଟି ବିଧାନସଭା ଆସନ ସହ ହାଡୋତି ଅଞ୍ଚଳରେ ନିଜର ଦୁର୍ଗ ବଜାୟ ରଖିଛନ୍ତି। ଗତ ବିଧାନସଭା ନିର୍ବାଚନରେ ବୁନ୍ଦି, ବାରାନ, ଝାଲାୱାର ଓ କୋଟା ଅଞ୍ଚଳରେ ବିଜେପି ୧୦ଟି ଆସନରେ ବିଜୟୀ ହୋଇଥିଲା। ଏହି ଅଞ୍ଚଳରୁ କଂଗ୍ରେସ ୭ଟି ଆସନରେ ବିଜୟୀ ହୋଇଥିଲା। ଚଳିତ ନିର୍ବାଚନରେ ବିଜେପି ଏହି ଦୁର୍ଗକୁ ଆହୁରି ମଜବୁତ କରିଛି ଏବଂ କଂଗ୍ରେସ ଆସନ ହ୍ରାସ ପାଇପାରେ।