ନୂଆଦିଲ୍ଲୀ: ମୁଖ୍ୟମନ୍ତ୍ରୀ ପିନାରାୟୀ ବିଜୟନ ତାଙ୍କୁ ଶାରୀରିକ କ୍ଷତି ପହଞ୍ଚାଇବାକୁ ଚେଷ୍ଟା କରୁଛନ୍ତି ବୋଲି କେରଳ ରାଜ୍ୟପାଳ ଆରିଫ ମହମ୍ମଦ ଖାନ୍ ଅଭିଯୋଗ କରିଛନ୍ତି। ଏଥିପାଇଁ ସେମାନେ ଷଡ଼ଯନ୍ତ୍ର କରି ଲୋକଙ୍କୁ ପଠାଉଛନ୍ତି। ଆରିଫ ମହମ୍ମଦ ମଧ୍ୟ ରାଜ୍ୟ ସରକାରଙ୍କ ଅସାମ୍ବିଧାନିକ କାର୍ଯ୍ୟକଳାପରେ ପୋଲିସ ସମ୍ପୃକ୍ତ ଥିବା ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ସୋମବାର ଆରିଫ ମହମ୍ମଦ ଖାନ୍ ଦିଲ୍ଲୀ ଯିବା ପାଇଁ ତିରୁବନନ୍ତପୁରମ୍ ବିମାନ ବନ୍ଦର ଅଭିମୁଖେ ବାହାରିଥିଲେ। ବିମାନବନ୍ଦରକୁ ଯିବା ବାଟରେ ତାଙ୍କ ଗାଡ଼ି ଉପରେ ଆକ୍ରମଣ ହୋଇଥିଲା। ଶାସକ ସିପିଆଇ(ଏମ୍)ର ଛାତ୍ର ସଂଗଠନ ଏସ୍ ଏଫ୍ ଆଇ (ଷ୍ଟୁଡେଣ୍ଟ ୱିଙ୍ଗ ଅଫ୍ ଇଣ୍ଡିଆ)କୁ ଏହି ଆକ୍ରମଣ ପାଇଁ ଦାୟୀ କରାଯାଇଛି। ଏହି ଆକ୍ରମଣ ସମ୍ପର୍କରେ ରାଜ୍ୟପାଳ କହିଛନ୍ତି ଯେ ଆଜି ରାଜଧାନୀର ରାସ୍ତାଘାଟରେ ଗୁଣ୍ଡାମାନେ ଶାସନ କରୁଛନ୍ତି।
ଆରିଫ ମହମ୍ମଦ କହିଲେ- ପୁଲିସ ସବୁକିଛି ଆଗୁଆ ଜାଣିଥିଲା
ଗଣମାଧ୍ୟମସହ କଥାବାର୍ତ୍ତା କରି ଆରିଫ ମହମ୍ମଦ କହିଛନ୍ତି ଯେ ଯେତେବେଳେ ମୁଁ ବିମାନବନ୍ଦରକୁ ଯାଉଥିଲି, ସେମାନେ ମୋ କାର ସାମ୍ନାକୁ ଆସିଥିଲେ। ସେମାନେ ମୋ କାରକୁ ଉଭୟ ପାର୍ଶ୍ୱରୁ ଧକ୍କା ଦେଇଥିଲେ। ମୁଁ ତଳକୁ ଓହ୍ଲାଇଲି। ଏଭଳି ବ୍ୟକ୍ତିଙ୍କୁ ମୁଖ୍ୟମନ୍ତ୍ରୀଙ୍କ କାର ନିକଟକୁ ଆସିବାକୁ ପୁଲିସ ଅନୁମତି ଦେଇଥାନ୍ତା କି?
ପୋଲିସ ସବୁକିଛି ଆଗରୁ ଜାଣିଥିଲା, କିନ୍ତୁ ଯେତେବେଳେ ମୁଖ୍ୟମନ୍ତ୍ରୀ ତାଙ୍କୁ ନିର୍ଦ୍ଦେଶ ଦେଉଛନ୍ତି, ପୋଲିସ କ’ଣ କରିବ? ଯେତେବେଳେ ମୁଁ ମୋ କାରରୁ ଓହ୍ଲାଇଲି, ସେମାନେ ସମସ୍ତେ ନିଜ ଜିପରେ ଦ୍ରୁତ ଗତିରେ ଚାଲିଗଲେ। ରାଜ୍ୟରେ ସମ୍ବିଧାନକୁ ଅମାନ୍ୟ କରାଯାଉଛି। ସମ୍ବିଧାନକୁ ଆମେ ଏପରି ଭାଙ୍ଗିବାକୁ ଦେଇପାରିବୁ ନାହିଁ।
ମୋତେ ଭୟଭୀତ କରିବାକୁ ଉଦ୍ୟମ କରାଯାଉଛି
ଆରିଫ ମହମ୍ମଦ କହିଛନ୍ତି ଯେ, ଯେତେବେଳେ ମୁଁ ଗୁଣ୍ଡାମାନଙ୍କ ସାମ୍ନାରେ ମୋ କାରରୁ ଓହ୍ଲାଇଲି, ସେମାନେ କାହିଁକି ପଳାଇଗଲେ? ସେମାନେ କାହିଁକି ମୋତେ ଟାର୍ଗେଟ କରୁଛନ୍ତି? ଯେହେତୁ ମୁଁ ସେମାନଙ୍କ କାର୍ଯ୍ୟରେ ମୁଣ୍ଡ ନୁଆଁଇ ନାହିଁ, ତେଣୁ ସେମାନେ ମୋତେ ଭୟଭୀତ କରିବାକୁ ଚେଷ୍ଟା କରୁଛନ୍ତି। କିନ୍ତୁ ମୁଁ ସେଭଳି ବ୍ୟକ୍ତି ନୁହେଁ ଏହି ଘଟଣାକୁ ହାଲୁକା ଭାବରେ ଗ୍ରହଣ କରିବି।
