ନୂଆଦିଲ୍ଲୀ: ଜାଗୋ ପାର୍ଟି ସୋମବାର ଶିରୋମଣି ଅକାଳୀ ଦଳ ସହିତ ମିଶ୍ରିତ ହୋଇଛି। ଅକାଳୀ ଦଳର ସଭାପତି ସୁଖବୀର ସିଂ ବାଦଲ ତାଙ୍କ ଦଳରେ ଦିଲ୍ଲୀ ଗୁରୁଦ୍ୱାର କମିଟିର ପୂର୍ବତନ ସଭାପତି ତଥା ଦିଲ୍ଲୀର ଜାଗୋ ପାର୍ଟିର ପୃଷ୍ଠପୋଷକ ମନଜିତ ସିଂ ଜିକେ ଙ୍କୁ ନିଜ ଦଳରେ ସାମିଲ କରିଛନ୍ତି। ଏହା ବ୍ୟତୀତ ଅନ୍ୟ ବହୁ ବରିଷ୍ଠ ନେତା ମଧ୍ୟ ଅକାଳୀ ଦଳରେ ଯୋଗ ଦେଇଛନ୍ତି। ଏହାର ପ୍ରଭାବ ଦିଲ୍ଲୀ ଏବଂ ପଞ୍ଜାବରେ ମଧ୍ୟ ଦୃଶ୍ୟମାନ ହେବାକୁ ଯାଉଛି।
ଲୋକସଭା ନିର୍ବାଚନ ପୂର୍ବରୁ ସୁଖବୀର ସିଂ ବାଦଲ ତାଙ୍କ ବିଚ୍ଛିନ୍ନ ଦଳକୁ ଏକାଠି କରିବାକୁ ଚେଷ୍ଟା କରୁଛନ୍ତି। ଅସନ୍ତୁଷ୍ଟ ନେତାମାନଙ୍କୁ ଏକାଠି କରିବା ପାଇଁ ଉଦ୍ୟମ ତୀବ୍ର ହୋଇଛି। ଲୋକସଭା ନିର୍ବାଚନରେ ଶିରୋମଣି ଅକାଳୀ ଦଳ ଏହାର ଲାଭ ଉଠାଇପାରେ।
ମନଜିତ ସିଂ ଜି.କେ ବିନା ସର୍ତ୍ତରେ ଅକାଳୀ ଦଳରେ ଯୋଗ ଦେଇଛନ୍ତି:
ଅକାଳୀ ଦଳକୁ ଫେରିବା ପରେ ମନଜିତ ସିଂ ଜି.କେଙ୍କ ପ୍ରତିକ୍ରିୟା ମଧ୍ୟ ଆସିଛି। ସେ କହିଛନ୍ତି ଯେ, ଜାଗୋ ପାର୍ଟି ବିନା ସର୍ତ୍ତରେ ଅକାଳୀ ଦଳ ସହିତ ମିଶିଛି। ଶିଖ ପ୍ରସଙ୍ଗ ଉଠାଇବା ପାଇଁ ଆମକୁ ଏକଜୁଟ ହେବା ଆବଶ୍ୟକ। ବନ୍ଦୀ ଶିଖଙ୍କ ମୁକ୍ତି ପାଇଁ ଆମେ ଏକାଠି ଲଢିବା। ସମସ୍ତ ଶିଖ୍ ଏକଜୁଟ ହେବା ଆବଶ୍ୟକ।
ଉଲ୍ଲେଖ ଯୋଗ୍ୟ ଯେ, ୨୦୧୯ ମସିହାରେ ମନଜିତ ସିଂ ଜି.କେଙ୍କ ଉପରେ ଦୁର୍ନୀତି ଅଭିଯୋଗ ଆସିଥିଲା। ଯାହାପରେ ତାଙ୍କୁ ଅକାଳୀ ଦଳରୁ ବହିଷ୍କାର କରଯାଇଥିଲା। ଏହା ପରେ ଜି.କେ ଗୁରୁଦ୍ୱାର ପରିଚାଳନା କମିଟିର ସଭାପତି ପଦରୁ ଇସ୍ତଫା ଦେଇ ଜାଗୋ ପାର୍ଟି ନାମକ ଏକ ପୃଥକ ଦଳ ଗଠନ କରିଥିଲେ। ବର୍ତ୍ତମାନ ଜାଗୋ ପାର୍ଟିର ଅକାଳୀ ଦଳ ସହିତ ମିଶ୍ରଣ ଅକାଳୀ ଦଳକୁ ମଜବୁତ କରିଛି। ବିଜେପି ସହ ମେଣ୍ଟ ଭାଙ୍ଗିବା ପରେ ଅକାଳୀ ଦଳ ନିଜକୁ ମଜବୁତ କରିବା ପାଇଁ ଅସନ୍ତୁଷ୍ଟ ଶିଖ ନେତାମାନଙ୍କୁ ମନାଇବାରେ ଲାଗିପଡିଛି।