ପାଟନା: ବିହାରରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ନେତୃତ୍ୱରେ ନୂତନ ଏନଡିଏ ସରକାରଙ୍କୁ ଫେବୃଆରୀ ୧୦ ରେ ଆସ୍ଥା ଭୋଟ୍ ଜିତିବାକୁ ପଡ଼ିବ। ମଙ୍ଗଳବାର ସଂସଦୀୟ ବ୍ୟାପାର ବିଭାଗ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ଯେ, ବଜେଟ୍ ଅଧିବେଶନର ପ୍ରଥମ ଦିନରେ ରାଜ୍ୟପାଳ ରାଜେନ୍ଦ୍ର ବିଶ୍ୱନାଥ ଆର୍ଲେକରଙ୍କ ବିଧାନସଭାର ପାରମ୍ପାରିକ ଅଭିଭାଷଣ ପରେ ସରକାର ଆସ୍ଥା ଭୋଟ୍ ମାଗିବେ। ରବିବାର ଦିନ ରେକର୍ଡ ନବମ ଥର ପାଇଁ ବିହାରର ମୁଖ୍ୟମନ୍ତ୍ରୀ ଭାବରେ ଜେଡିୟୁ ସଭାପତି ନୀତୀଶ କୁମାର ଶପଥ ଗ୍ରହଣ କରିଛନ୍ତି। ସେ ବିରୋଧୀ ‘ଇଣ୍ଡିଆ’ ମେଣ୍ଟ ସହ ସମ୍ପର୍କ ଭାଙ୍ଗି ନିଜର ପୁରୁଣା ସହଯୋଗୀ ବିଜେପି ସହିତ ଏକ ନୂତନ ସରକାର ଗଠନ କରିଥିଲେ ଯାହାଙ୍କ ସହ ସେ ଦୁଇ ବର୍ଷ ପୂର୍ବେ ସମ୍ପର୍କ ବିଚ୍ଛିନ୍ନ କରିଥିଲେ।
ଆସନ୍ତା ଅଧିବେଶନରେ ମୋଟ ୧୨ ଟି କାର୍ଯ୍ୟଦିବସ ରହିବ ଏବଂ ଫେବୃଆରୀ ୧୨ ତାରିଖରେ ରାଜ୍ୟ ବଜେଟ୍ ଉପସ୍ଥାପନ କରାଯିବ ବୋଲି ବିଜ୍ଞପ୍ତିରେ କୁହାଯାଇଛି।
