ପଶ୍ଚିମବଙ୍ଗରେ ଜାରି ରହିଛି ଡାକ୍ତରଙ୍କ ଧର୍ମଘଟ । ଧର୍ମଘଟ କରୁଥିବା ଜୁନିଅର ଡାକ୍ତରମାନେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ପ୍ରସ୍ତାବକୁ ପ୍ରତ୍ୟାଖ୍ୟାନ କରିଛନ୍ତି । ମମତା କ୍ଷମା ମାଗିବାକୁ ସେମାନେ ଦାବି କରିଛନ୍ତି । ଶନିବାର ଦିନ ରାଜ୍ୟ ସଚିବାଳୟରେ ଜୁନିଅର୍ ଡାକ୍ତରଙ୍କ ସହ ବୈଠକ କରିବା ପାଇଁ ମମତା ବାନାର୍ଜୀ ଅଫର୍ ଦେଇଥିଲେ । ଶୁକ୍ରବାର ଦିନ ଏହି ଧର୍ମଘଟ ପ୍ରତ୍ୟାହାର କରିବା ପାଇଁ ଡାକ୍ତରମାନେ ମମତାଙ୍କ କ୍ଷମା ଯାଚନା ସହ ରାଜ୍ୟ ସରକାରଙ୍କ ସମ୍ମୁଖରେ ୬ଟି ସର୍ତ୍ତ ରଖିଥିଲେ । ଏହି ଧର୍ମଘଟକୁ ବରିଷ୍ଠ ଡାକ୍ତରମାନେ ମଧ୍ୟ ସମର୍ଥନ କରିଛନ୍ତି । କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ମଧ୍ୟ ମମତାଙ୍କ ଏହି ଧର୍ମଘଟ ବନ୍ଦ କରିବା ପାଇଁ ଚେଷ୍ଟା କରିବା ସହିତ ମମତା ଏହାକୁ ସମ୍ମାନର ପ୍ରସଙ୍ଗ ନ କରନ୍ତୁ ବୋଲି ଚିଠି ଲେଖି ଥିଲେ । ଏହି ଘଟଣା ନେଇ ଗୃହମନ୍ତ୍ରାଳୟ ତରଫରୁ ମଧ୍ୟ ମମତା ସରକାରଙ୍କୁ ନୋଟିସ୍ ଜାରି ହୋଇ ସାରିଛି ।