ଆସନ୍ତା ଜୁଲାଇ 5 ତାରିଖରେ ଓଡିଶାର 3ଟି ଆସନ ପାଇଁ ହେବ ରାଜ୍ୟସଭା ଉପନିର୍ବାଚନ। ଏହି ତିନି ଆସନରୁ ପ୍ରତାପ ଦେବ ଓ ସୌମ୍ୟରଂଜନ ପଟ୍ଟନାୟକ ବିଧାୟକଏବଂ ଅଚ୍ୟୁତ ସାମନ୍ତ ସାଂସଦ ହେବା ପରେ ଇସ୍ତଫା ଦେଇଥିଲେ। ସେହିପରି ଅନୁଭବ ମହାନ୍ତି ସାଂସଦ ହେବା ପରେ ସେ ମଧ୍ୟ ରାଜ୍ୟସଭା ପଦରୁ ଇସ୍ତଫା ଦେଇଛନ୍ତି। ହେଲେ ତାଙ୍କର ସମୟ ସୀମା ଶେଷ ହେବାକୁ ଆଉ ମାତ୍ର 9 ମାସ ଥିବାରୁ ସେହି ଆସନରେ ନିର୍ବାଚନ ହେବ ନାହିଁ। ନିୟମ ଅନୁସାରେ ଯେଉଁ ଆସନରେ ଏକ ବର୍ଷରୁ କମ ସମୟ ଥିବା ସେଠାରେ ଆଉ ଉପ ନିର୍ବାଚନ ହେବ ନାହିଁ। ପ୍ରତାପ ଦେବଙ୍କ କାର୍ଯ୍ୟକାଳ 2022 ରେ ଶେଷ ହେଉଥିବା ବେଳେ, ଅଚ୍ୟୁତ ଓ ସୌମ୍ୟରଂଜନଙ୍କ 2024ରେ ଶେଷ ହେଉଥିଲା। ହେଲେ ଅନୁଭବଙ୍କ 2020 ରେ ଶେଷ ହେଉଛି। ବର୍ତ୍ତମାନ ଏକାଥରେ ତିନି ଆସନ ପାଇଁ ରାଜ୍ୟସଭା ଉପନିର୍ବାଚନ ହେଉଥିବାରୁ ସଂଖ୍ୟା ଅନୁସାରେ ବିଜେଡି ଏସବୁ ଆସନରେ ଜିତିବା ନିଶ୍ଚିତ ହୋଇଯାଇଛି। ନିର୍ବାଚନ କମିଶନରଙ୍କ ସୂଚନା ଅନୁସାରେ ଆସନ୍ତା ଜୁନ 18 ତାରିଖରେ ଏ ନେଇ ବିଜ୍ଞପ୍ତି ପ୍ରକାଶ ପାଇବ। ଜୁନ 25 ତାରିଖରେ ନାମାଙ୍କନ ପତ୍ର ଦାଖଲ ଶେଷ ତାରିଖ ରଖାଯାଇଛି। ସେହିପରି 26 ତାରିଖରେ ନାମାଙ୍କନ ପତ୍ର ଯାଞ୍ଚ କରାଯିବ। ପ୍ରାର୍ଥୀ ପ୍ରତ୍ୟାହର ଶେଷ ତାରିଖ ରଖାଯାଇଛି ଜୁନ 28 ତାରିଖ। ଜୁଲାଇ 5 ତାରିଖରେ ଭୋଟ ଗ୍ରହଣ ସକାଳ 9ଟାରୁ ଆରମ୍ଭ ହୋଇ ଅପରାହ୍ନ 4 ଟା ପର୍ଯ୍ୟନ୍ତ ଚାଲିବ। ସେହିଦିନ 5 ଟା ବେଳେ ଭୋଟ ଗଣତି କରାଯାଇ ଫଳାଫଳ ପ୍ରକାଶ କରାଯିବ। ଓଡିଶାର ତିନୋଟି ଆସନ ସହିତ ସେହିଦିନ ବିହାରରେ ଗୋଟିଏ ଏବଂ ଗୁଜରାଟର ଦୁଇଟି ଆସନରେ ମଧ୍ୟ ଉପନିର୍ବାଚନ ହେବ। ବିହାରରୁ ରବିଶଙ୍କର ପ୍ରସାଦ ଲୋକସଭାରେ ଜିତିବା ପରେ ସେହି ଆସନ ଖାଲି ପଡିଛି। ସେହିପରି ଗୁଜୁରାଟରୁ ସ୍ମତି ଇରାଣି ଏବଂ ଅମିତ ସାହା ଲୋକସଭାକୁ ନିର୍ବାଚିତ ହୋଇଥିବାରୁ ସେମାନେ ରାଜ୍ୟସଭାରୁ ଇସ୍ତଫା ଦେଇଛନ୍ତି।
Rajya Sabha bye_election date announce