ରେଢାଖୋଲ/ସମ୍ବଲପୁର: (କନ୍ଦର୍ପ ବେହେରା): ମୁଁ ଯେତେବେଳେ ରାଷ୍ଟ୍ରପତି ଭାବେ ଶପଥ ନେଉଥିଲି ସେଇ ସମୟରେ ସନ୍ଥକବିଙ୍କ ବାଣୀଙ୍କୁ ମୁଁ ପାଠ କରିବାର ସୌଭାଗ୍ୟ ପାଇଥିଲି।
ଆଜି ଦିନଟି ମୋ ପାଇଁ ସ୍ମରଣୀୟ ହୋଇ ରହିବ। ସନ୍ଥ କବିଙ୍କ ବାଣୀ ଓ ଆଦର୍ଶ ମୋ ପାଇଁ ପ୍ରେରଣାର ଉତ୍ସ ହୋଇ ରହିବ। ମାନବ କଲ୍ୟାଣ ପାଇଁ ନିଜକୁ ଉତ୍ସର୍ଗ କରିବା ଏହି କବିତାର ମର୍ମ ଥିଲା। ସନ୍ଥକବି ଭୀମଭୋଇଙ୍କର କେବଳ ମାନବ ସମାଜ ପ୍ରତି ନୁହେଁ ସମଗ୍ର ଜୀବ ଜଗତ ପ୍ରତି ସମ୍ବେଦନତାର ଅଭିବ୍ୟକ୍ତି। ଏହା ମଧ୍ୟ ଓଡିଆ ସାହିତ୍ୟର ଉତ୍କର୍ଷର ପରିଚାୟକ।
ମହିମାଧର୍ମ ବିଚାର ଓ ଆଦର୍ଶରେ ସମସ୍ତେ ଅନୁପ୍ରାଣୀତ ହେବା ଉଚିତ୍ ବୋଲି ମହାମହିମ ରାଷ୍ଟ୍ରପତି ଦୌପଦୀ ମୁର୍ମୁ ଆଜି ରେଢାଖୋଲ ମିନି ଷ୍ଟାଡିୟମରେ ଅନୁଷ୍ଠିତ ନାଗରିକ ସମ୍ବର୍ଦ୍ଧନା ସଭାରେ ବକ୍ତବ୍ୟ ରଖିଛନ୍ତି। ଭୀମଭୋଇଙ୍କ ଜୀବନୀ ସଂପର୍କରେ ମହାମହିମ ରାଷ୍ଟ୍ରପତି ଆଲୋକପାତ କରିଥିଲେ। ଶିକ୍ଷା, ଦୀକ୍ଷା ଅଭାବ ସତ୍ୱେ ସେ ଦିବ୍ୟଜ୍ୟାତି ଗ୍ରହଣ କରିଥିଲେ। ବାହ୍ୟ ଦୃଷ୍ଟି ନ ଥିଲେ ମଧ୍ୟ ତାଙ୍କର ଅନ୍ତଦୃଷ୍ଟି ପ୍ରଖର ଥିଲା। ସ୍କୁଲ , କଲେଜ ଶିକ୍ଷାରେ ମଧ୍ୟ ତାଙ୍କ କବିତା ଛାତ୍ରଛାତ୍ରୀମାନେ ପାଠ କରୁଛନ୍ତି। ୟୁଜିସି ପାଠ୍ୟକ୍ରମରେ ମଧ୍ୟ ତାଙ୍କ କବିତା ସାମିଲ୍ କରାଯିବା ଉଚିତ୍ ବୋଲି ମହାମହିମ ରାଷ୍ଟ୍ରପତି ମତବ୍ୟକ୍ତ କରିଥିଲେ।
ଏହି ଅବସରରେ କେନ୍ଦ୍ର ଦକ୍ଷତା , ଶିକ୍ଷା ବିକାଶମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇ ମହିମା ଧର୍ମର ମହାନ ପ୍ରଚାରକ ସନ୍ଥକବି ଭୀମଭୋଇ ମହିମା ବିଚାରର ତତ୍ୱ, ଦର୍ଶନ ଆଭିମୁଖ୍ୟକୁ କବିତାର ରୂପ ଦେଇଛନ୍ତି, କବିତା ମାଧ୍ୟମରେ ନବଚେତନା ସୃଷ୍ଟି କରିଛନ୍ତି ବୋଲି ପ୍ରକାଶ କରିଥିଲେ। ମହାମହିମ ରାଷ୍ଟ୍ରପତିଙ୍କୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତିନି ଖଣ୍ଡ ପୁସ୍ତକ ଉପହାର ସ୍ୱରୁପ ପ୍ରଦାନ କରିଥିଲେ। ରାଜ୍ୟ ବୟନ ଶିଳ୍ପ ମନ୍ତ୍ରୀ ରୀତା ସାହୁ , ବାବା ଆନନ୍ଦ ଚନ୍ଦ୍ର ଦାସ , ବାବା ପ୍ରଭାକର ଦାଶ, ସୌଭାଗ୍ୟ କୁମାର ଦାଶ, ଅରୁଣ କୁମାର ରାଉତ, ଭୀମଭୋଇ ସ୍ମୃତି କମିଟିର ସଭାପତି ଚକ୍ରଧର ପ୍ରଧାନ ପ୍ରମୁଖ ଯୋଗ ଦେଇଥିଲେ।
ଆଜି ସକାଳ ୧୧. ୩୦ ମିନିଟରେ ସମ୍ବଲପୁର ଜିଲ୍ଲା ରେଢାଖୋଲର କଦଳିଗଡ ଠାରେ ହେଲି ପ୍ୟାଡ୍ରେ ଅବତରଣ କରିବା ପରେ ସେ ମଧୁପୁର ଗ୍ରାମକୁ ଯାଇ ଭୀମଭୋଇଙ୍କ ପ୍ରତିମୁର୍ତ୍ତିରେ ପୁଷ୍ପମାଲ୍ୟ ଅର୍ପଣ କରିବା ସହ କନ୍ଧରା ସ୍ମୁତି ପୀଠ ଏବଂ କାଙ୍କଣପଡାକୁ ଯାଇ ଥିଲେ । ଅପରାହ୍ନ ୩ ଟାରେ ରେଢାଖୋଲ ମିନିଷ୍ଟାଡିୟମକୁ ଯାଇ ଥିଲେ।
ଏହି କାର୍ଯ୍ୟକ୍ରମରେ ଜିଲ୍ଲା ପ୍ରଶାସନ ତରଫରୁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଥିଲା। ମହାମହିମ ରାଷ୍ଟ୍ରପତି ଙ୍କ ଗସ୍ତକୁ ନେଇ ରେଢାଖୋଲ ସହର ଉତ୍ସବ ମୁଖର ହୋଇଥିଲା। ପଶ୍ଚିମ ଓଡିଶାର ଶହ ଶହ ମହିମା ଭକ୍ତ ଉପସ୍ଥିତ ଥିଲେ।
