ବିହାରରେ ଶିଶୁ ମୃତ୍ୟୁକୁ ନେଇ ସଙ୍ଗୀନ ଅବସ୍ଥା ରହିଥିବାବେଳେ ନେତାମାନଙ୍କର ବୟାନାବାଜି ଏହାକୁ ରାଜନୀତି ରଙ୍ଗ ଦେଉଛି । ୧୨୯ ପାଖାପାଖି ଶିଶୁ ମସ୍ତିଷ୍କ ଜ୍ବରରେ ମୃତ୍ୟୁବରଣ କରିଥିବାବେଳେ ୪୦୦ ପାଖାପାଖି ଶିଶୁ ଏହି ରୋଗରେ ଆକ୍ରାନ୍ତ ହୋଇ ହସ୍ପିଟାଲରେ ରହିଛନ୍ତି । ଏହି ରୋଗର ନିରାକରଣ କରିବାରେ ସରକାର ବିଫଳ ରହିଥିବାବେଳେ ନେତାମାନଙ୍କର ବୟାନବାଜି ବିବାଦ ସୃଷ୍ଟି କରୁଛି । ଭାରତୀୟ ଜନତା ପାର୍ଟିର ସାଂସଦ ଅଜୟ ନିଷାଦ ଏହି ରୋଗକୁ ନେଇ ଦାୟିତ୍ବହୀନ ବୟାନବାଜି କରିଛନ୍ତି । ଏହି ରୋଗ ପାଇଁ ୪ଜୀକୁ ସେ ଦାୟୀ କରିଛନ୍ତି । ତାଙ୍କ ମତରେ ଏହି ରୋଗ ପାଇଁ ଗାଁଓ୍ବ (ଗାଁ), ଗରମୀ(ଗରମ), ଗରୀବ୍ (ଗରିବ) ଓ ଗନ୍ଦଗୀ (ଅସନା)କୁ ଦାୟୀ କରିଛନ୍ତି । ବିଜେପି ସାଂସଦ କହିଛନ୍ତି ଯେ, ଏହି ରୋଗ ପଛୁଆ ଜାତି ତଥା ସମାଜର ଲୋକଙ୍କୁ ଏହି ବେମାରୀ ହେଉଛି । ସେମାନଙ୍କର ରହିବା ତଥା ଚଳିବା ବହୁତ ନୀଚରହିଛି, ସେଥିପାଇଁ ଶିଶୁମାନେ ଏପରି ବେମାରରେ ପଡୁଛନ୍ତି । ଆଜି ମୁଖ୍ୟମନ୍ତ୍ରୀ ନିତୀଶ୍ କୁମାର ହସ୍ପିଟାଲ ଗସ୍ତ କରି ସ୍ଥିତି ସମୀକ୍ଷା କରିଛନ୍ତି । ଆଗାମୀ ସମୟରେ ଏହି ରୋଗ ଉପରେ ନିୟନ୍ତ୍ରଣ କରାଯାଇପାରିବ ବୋଲି ଅଜୟ କହିଛନ୍ତି । ସେହିପରି ଜେଡିୟୁର ସାଂସଦ ଦିନେଶ୍ ଚନ୍ଦ୍ର ଯାଦବ ଶିଶୁ ମୃତ୍ୟୁକୁ ଦୁର୍ଭାଗ୍ୟପୂର୍ଣ୍ଣ କହିବା ସହିତ ଗରମ ସମୟରେ ଏପରି ରୋଗ ବଢିଯାଉଛି, ବର୍ଷା ଆସିଲେ ଏହି ରୋଗ କମିଯିବ ବା ଭଲ ହୋଇଯିବ ବୋଲି କହିଛନ୍ତି । ବିହାରରେ ଶିଶୁ ମୃତ୍ୟୁକୁ ନେଇ ଜାତୀୟ ମାନବାଧିକାରୀ ଆୟୋଗ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କୁ ନୋଟିସ୍ ଜାରି କରିସାରିଛନ୍ତି ।
