ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ଦିନ ସର୍ବଦଳୀୟ ବୈଠକ ଡାକିଛନ୍ତି । ଏହି ବୈଠକରେ ତିନି ପ୍ରମୁଖ ଏଜେଣ୍ଡା ବିଷୟରେ ଆଲୋଚନା ହେବା ବୋଲି ସୂଚନା ରହିଛି । ପ୍ରଥମରେ ‘ଏକ ଦେଶ, ଏକ ନିର୍ବାଚନ’ ନେଇ ସବୁ ରାଜନୈତିକ ଦଳଙ୍କ ମତାମତ ସହ ସହମତି ବିଷୟରେ ଚର୍ଚ୍ଚା ହେବାକୁ ରହିଛି । ସେହିପରି ୨୦୨୨ ମସିହାରେ ଭାରତ ସ୍ବାଧୀନତା ପାଇବାର ୭୫ ବର୍ଷ ପାଳନ କରିବ, ଏହି ଅବସରରେ ହେବାକୁ ଥିବା କାର୍ଯ୍ୟକ୍ରମ ପାଇଁ ପ୍ରସ୍ତୁତି ଓ ଚଳିତ ବର୍ଷ ମହାତ୍ମା ଗାନ୍ଧିଙ୍କର ୧୫୦ ବର୍ଷ ଜୟନ୍ତୀ ପାଳନ କରିବା ନେଇ ପ୍ରସ୍ତୁତି ଉପରେ ଆଲୋଚନା କରାଯିବ। କିନ୍ତୁ ଏହି ବୈଠକକୁ ଅଧିକରୁ ଅଧିକ ବିପକ୍ଷ ଦଳ ଯୋଗଦେବେନ ନାହିଁ ବୋଲି ସୂଚନା ଦେଇଛନ୍ତି । ପ୍ରଥମେ ଏହି ବୈଠକକୁ ବର୍ଜନ କରିଥିଲେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ପରବର୍ତ୍ତୀ ସମୟରେ ବିଏସ୍ପି ଅଧ୍ୟକ୍ଷା ମାୟାବତୀ, ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର୍, ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରୀଓ୍ବାଲ, ଟିଡିପି ଅଧ୍ୟକ୍ଷ ଏନ୍. ଚନ୍ଦ୍ରବାବୁ ନାଇଡ ଓ ଡିଏମ୍କେ ଅଧ୍ୟକ୍ଷ ଏମ୍କେ ଷ୍ଟାଲିନ୍ ପ୍ରମୁଖ ଏହି ବୈଠକରେ ଅଂଶଗ୍ରହଣ ନ କରିବା ନେଇ ସ୍ପଷ୍ଟ କରିଛନ୍ତି । ତେବେ ମାୟାବତୀ, ମମତା ଓ ଷ୍ଟାଲିନ୍ଙ୍କ ବ୍ୟତୀତ ଅନ୍ୟ ବିରୋଧୀ ଦଳର ନେତାମାନଙ୍କ ନିଜ ନିଜର ପ୍ରତିନିଧିଙ୍କୁ ଏହି ବୈଠକରେ ଅଂଶଗ୍ରହଣ କରିବେ ବୋଲି ସୂଚନା ଦେଇଛନ୍ତି । ସେହିପରି ଏନ୍ସିପି ଅଧ୍ୟକ୍ଷ ଶରଦ ପାଓ୍ବାର ଏହି ବୈଠକରେ ଯୋଗ ଦେବେ ବୋଲି ସୂଚନା ରହିଛି । ମମତା ’ଏକ ଦେଶ ଏକ ନିର୍ବାଚନ’କୁ ନେଇ ତରବରିଆ ନିଷ୍ପତ୍ତି ନ ନେବାକୁ କହିବା ସହିତ ଏଥିନିମେନ୍ତ ସରକାର ଶ୍ବେତପତ୍ର ଆଣିବା ଜରୁରୀ ବୋଲି କହିଛନ୍ତି । ସେହିପରି ମାୟାବତୀ ’ଏକ ଦେଶ ଏକ ନିର୍ବାଚନ’କୁ ନେଇ କହିଛନ୍ତି ଯେ, କୌଣସି ଲୋକତାନ୍ତ୍ରିକ ଦେଶରେ ନିର୍ବାଚନ କେବେ ସମସ୍ୟା ହୋଇପାରିବ ନାହିଁ । ଏବଂ ନିର୍ବାଚନକୁ କେବେ ଧନ ତଥା ବ୍ୟୟ ଅପବ୍ୟୟରେ ତୁଳନା କରିବା ଉଚିତ୍ । ’ଏକ ଦେଶ ଏକ ନିର୍ବାଚନ’ ଜରିଆରେ ଦେଶରେ ଥିବା ବାସ୍ତବ ସମସ୍ୟା ଯଥା – ଗରିବ, ବେରେଜାଗାରୀ, ବଢୁଥିବା ହିଂସା, ଦରଦାମ ବୃଦ୍ଧି ପରି ରାଷ୍ଟ୍ରୀୟ ସମସ୍ୟାରୁ ଧ୍ୟାନ ହଟାଇବା ପାଇଁ ଏକ ପ୍ରୟାସ ବା ଛଳନା ମାତ୍ର । ଏହି ବୈଠକରେ ଆପ୍ ପକ୍ଷରୁ ରାଘବ ଚଢା ଓ ଟିଡିପି ତରଫରୁ ଜୟଦେବ ଗଲ୍ଲା ବୈଠକରେ ଅଂଶଗ୍ରହଣ କରିବେ ବୋଲି ସୂଚନା ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ଦ୍ବିପ୍ରହର ୩ ଘଟିକା ସମୟରେ ସଂସଦ ଭବନ ସମୟରେ ସର୍ବଦଳୀୟ ବୈଠକ ଅନୁଷ୍ଠିତ ହେବ ।
