ନୂଆଦିଲ୍ଲୀ: ୨୦୨୪ ଲୋକସଭା ନିର୍ବାଚନ ପୂର୍ବରୁ କଂଗ୍ରେସ ମୁଖପାତ୍ର ରଣଦୀପ ସିଂ ସୁରଜେୱାଲା ଏକ ବଡ଼ ଅସୁବିଧାର ସମ୍ମୁଖୀନ ହୋଇଛନ୍ତି। ରଣଦୀପଙ୍କ ନିର୍ବାଚନ ପ୍ରଚାର ଉପରେ ଆଜି ନିର୍ବାଚନ ଆୟୋଗ (ECI) ପ୍ରତିବନ୍ଧକ ଲଗାଇଛନ୍ତି। ଭାରତୀୟ ଜନତା ପାର୍ଟି (ବିଜେପି) ସାଂସଦ ହେମା ମାଳିନୀଙ୍କ ବିବାଦୀୟ ବିବୃତ୍ତି ଉପରେ କଂଗ୍ରେସ ନେତାଙ୍କ ବିରୋଧରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ନିର୍ବାଚନ ଆୟୋଗ ରଣଦୀପ ସୁରଜେୱାଲାଙ୍କୁ ପ୍ରଚାର ଏବଂ କୌଣସି ପ୍ରକାରର ମିଡିଆ ସାକ୍ଷାତକାର ଦେବା ଉପରେ ୪୮ ଘଣ୍ଟିଆ ପ୍ରତିବନ୍ଧକ ଲଗାଇଛନ୍ତି।
ନିର୍ବାଚନ ଆୟୋଗଙ୍କ ଅନୁଯାୟୀ, “ଭାରତର ସମ୍ବିଧାନର ଧାରା ୩୨୪ ଏବଂ ଏହି ବାବଦରେ ଅନ୍ୟ ସମସ୍ତ କ୍ଷମତା ଅନୁଯାୟୀ ନିର୍ବାଚନ ଆୟୋଗ ତାଙ୍କୁ (ରଣଦୀପ ସୁରଜେୱାଲା) ଆସନ୍ତା ୪୮ ଘଣ୍ଟା ପାଇଁ ଅର୍ଥାତ ଏପ୍ରିଲ୍ ୧୬ ତାରିଖ ୨୦୨୪ ସନ୍ଧ୍ୟା ୬ ଟା ପର୍ଯ୍ୟନ୍ତ କୌଣସି ଶୋଭାଯାତ୍ରା, ସାଧାରଣ ସଭା ଇତ୍ୟାଦିରେ ଯୋଗଦେବାକୁ ବାରଣ କରିଛନ୍ତି।
ହେମା ମାଳିନୀଙ୍କ ଉପରେ କଂଗ୍ରେସର ବରିଷ୍ଠ ନେତାଙ୍କ ବିବାଦୀୟ ମନ୍ତବ୍ୟ ପରେ ବିଜେପି ନିର୍ବାଚନ ଆୟୋଗରେ ଅଭିଯୋଗ କରିଥିଲା। ଏହା ପରେ ନିର୍ବାଚନ ଆୟୋଗ ରଣଦୀପ ସୁରଜେୱାଲାଙ୍କୁ ନୋଟିସ ଜାରି କରି ଏହାର ଜବାବ ମାଗିଥିଲେ। ଏପ୍ରିଲ୍ ୨୦୨୪ ପ୍ରାରମ୍ଭରେ ପଠାଯାଇଥିବା ଏହି କାରଣ ଦର୍ଶାଅ ବିଜ୍ଞପ୍ତିରେ ନିର୍ବାଚନ ଆୟୋଗ ବିଜେପି ସାଂସଦଙ୍କ ବିରୋଧରେ ଦେଇଥିବା ମନ୍ତବ୍ୟକୁ ଅଶ୍ଳୀଳ, ଅଶୋଭନୀୟ ତଥା ଅସଭ୍ୟ ବୋଲି କହିଛି। ତେବେ ରଣଦୀପ ସୁରଜେୱାଲା ଉତ୍ତର ଦେଇଛନ୍ତି ଯେ, ଯେଉଁ ଭିଡିଓ ଉପରେ ଅଭିଯୋଗ କରାଯାଇଛି ତାହା ଉପରେ ଟ୍ୟାମ୍ପରିଂ କରାଯାଇଛି।