ନୂଆଦିଲ୍ଲୀ: ବିଜେପି ପ୍ରାର୍ଥୀ ତଥା ଅଭିନେତା ରବି କିଶନ ମୁମ୍ବାଇ କୋର୍ଟରୁ ଆଶ୍ଵସ୍ତି ପାଇଛନ୍ତି। ପ୍ରକୃତରେ ଆଜି କୋର୍ଟ ୨୫ ବର୍ଷ ବୟସ୍କା ମହିଳାଙ୍କ ଆବେଦନକୁ ଖାରଜ କରିଛନ୍ତି ଯେଉଁଥିରେ ସେ ବିଜେପିର ଗୋରଖପୁର ପ୍ରାର୍ଥୀ ତଥା ଅଭିନେତା ରବି କିଶନଙ୍କ ଡିଏନ୍ଏ ପରୀକ୍ଷା କରିବାକୁ ଦାବି କରିଥିଲେ। ଏହି ଆବେଦନରେ ଦାବି କରାଯାଇଥିଲା ଯେ, ରବି କିଶାନ ତାଙ୍କର ପିତା।
ମୁମ୍ବାଇ ବାସିନ୍ଦା ଅପର୍ଣ୍ଣା ସୋନିଙ୍କ ଝିଅ ଶିନୋଭାଙ୍କୁ ଅଭିନେତା-ରାଜନେତାଙ୍କ ଝିଅ ବୋଲି ଦାବି କରିବାର ଏକ ସପ୍ତାହ ପରେ କୋର୍ଟର ଏହି ନିଷ୍ପତ୍ତି ନିଆଯାଇଛି। ଆଜି ଅନୁଷ୍ଠିତ ଶୁଣାଣି ସମୟରେ ମୁମ୍ବାଇର ଡିଣ୍ଡୋସି ସେସନ୍ସ କୋର୍ଟ କହିଛନ୍ତି ଯେ, ପ୍ରାଥମିକ ସାକ୍ଷୀରେ ଏପରି କୌଣସି ମାମଲା ନାହିଁ ଯାହା ଦର୍ଶାଏ ଯେ ଅପର୍ଣ୍ଣା ସୋନି ଏବଂ ରବି କିଶନଙ୍କ ମଧ୍ୟରେ କୌଣସି ସମ୍ପର୍କ ଅଛି।
ପ୍ରକାଶ ଯେ, ଗୁରୁବାର କୋର୍ଟରେ ଶିନୋଭା ଦାବି କରିଛନ୍ତି ଯେ ଯଦିଓ ସେ ଅଭିନେତାଙ୍କୁ “ଦାଦା” ବୋଲି ଡାକନ୍ତି, ସେ ପ୍ରକୃତରେ ତାଙ୍କର ଜନ୍ମକଲା ପିତା। ସେହିଭଳି ରବି କିଶାନଙ୍କ ପକ୍ଷରୁ ହାଜର ହୋଇଥିବା ଓକିଲ ଅମିତ ମେହେଟ୍ଟା ଯୁକ୍ତି ଦର୍ଶାଇଥିଲେ ଯେ, ଅଭିନେତା ଏବଂ ଅପର୍ଣ୍ଣା ସୋନିଙ୍କ ମଧ୍ୟରେ କୌଣସି ସମ୍ପର୍କ ନାହିଁ। ତେବେ ମେହେଟ୍ଟା ସ୍ୱୀକାର କରିଛନ୍ତି ଯେ, ଅଭିନେତା ଅପର୍ଣ୍ଣା ସୋନିଙ୍କୁ ଜାଣିଥିଲେ, କିନ୍ତୁ କେବଳ ଜଣେ ଭଲ ବନ୍ଧୁ ଭାବରେ ଯେହେତୁ ଉଭୟ ଫିଲ୍ମ ଇଣ୍ଡଷ୍ଟ୍ରିରେ ଏକାଠି କାମ କରିଥିଲେ। ହେଲେ ଦୁହେଁ କେବେବି ସଂପର୍କରେ ନଥିଲେ।
ଶିନୋଭାଙ୍କ ଓକିଲ କ’ଣ କହିଥିଲେ?:
ଶିନୋଭାଙ୍କ ଆବେଦନ ଉପରେ ଯୁକ୍ତି ରଖୁଥିବାବେଳେ ଓକିଲ ଅଶୋକ ସାରୋଗୀ ଏକ ପିତୃତ୍ୱ ପରୀକ୍ଷା ପାଇଁ ଦାବି କରିଥିଲେ। ସାରୋଗୀ କହିଛନ୍ତି ଯେ, ଅପର୍ଣ୍ଣା ସୋନି ୧୯୯୧ ରେ ରାଜେଶ ସୋନିଙ୍କୁ ବିବାହ କରିଥିଲେ। କିନ୍ତୁ କିଛି ବିବାଦ ଏବଂ ମତଭେଦ ହେତୁ ସେ ୧୯୯୫ ରେ ନିଜ ବୈବାହିକ ଘର ଛାଡିଥିଲେ। ସେ କହିଥିଲେ ଯେ, ଅପର୍ଣ୍ଣା ସୋନି ଜଣେ ସାମ୍ବାଦିକ ଭାବରେ ଫିଲ୍ମ ଇଣ୍ଡଷ୍ଟ୍ରିରେ ଯୋଗ ଦେଇଥିଲେ, ଏହା ପରେ ସେ ଏବଂ ରବି କିଶନ ପ୍ରେମରେ ପଡ଼ି ଏକ ସମ୍ପର୍କ ଆରମ୍ଭ କରିଥିଲେ।
ଓକିଲ କହିଛନ୍ତି ଯେ, ଶିନୋଭାଙ୍କ ଜନ୍ମ ପରେ ଅଭିନେତା ତାଙ୍କ ଯତ୍ନ ନେଉଥିଲେ, କିନ୍ତୁ ଗତ କିଛି ବର୍ଷ ମଧ୍ୟରେ ସେ ସେମାନଙ୍କ ସମ୍ପର୍କକୁ ଅସ୍ୱୀକାର କରିବା ସହ ସମର୍ଥନ ଯୋଗାଇବା ମଧ୍ୟ ବନ୍ଦ କରିଥିଲେ। ସାରୋଗୀ କହିଛନ୍ତି ଯେ, ରବି କିଶନ ଶିନୋଭାଙ୍କୁ ତାଙ୍କର ଜନ୍ମିତ ବାପା ଭାବରେ ଗ୍ରହଣ କରିବାକୁ ମନା କରିଦେଇଥିବାରୁ ଏହାର ସତ୍ୟତା ଜାଣିବା ପାଇଁ ଏକ ପିତୃତ୍ୱ ପରୀକ୍ଷା କରାଯିବା ଉଚିତ୍।