ଜମ୍ମୁ କାଶ୍ମୀରର ସୋପିଆଁରେ ସୁରକ୍ଷାବଳଙ୍କୁ ସଫଳତା ମିଳିଛି। ସୁରକ୍ଷା ବଳ ଏବଂ ଆତଙ୍କୀଙ୍କ ମଧ୍ୟରେ ଘଟିଥିବା ଏନ୍କାଉଣ୍ଟରରେ ୪ ଆତଙ୍କୀଙ୍କୁ ନିପାତ କରିଛନ୍ତି ସୁରକ୍ଷା ବଳ। ଦକ୍ଷିଣ କାଶ୍ମୀରରେ ସୁରକ୍ଷା ବଳ ଅଧିକାରୀଙ୍କ ସର୍ଚ୍ଚ ଅପରେସନ୍ ସମୟରେ ଆତଙ୍କୀମାନେ ପ୍ରଥମେ ସୁରକ୍ଷା ବଳଙ୍କ ଉପରକୁ ଗୁଳି ଚଳାଇଥିଲେ। ପାଲଟା ଗୁଳି ଚାଳନାରେ ୪ ଆତଙ୍କୀ ନିପାତ ହୋଇଥିଲେ। ସୂଚନାଯୋଗ୍ୟ ଯେ, ଆଜି ସକାଳେ ୩୩ ରାଷ୍ଟ୍ରୀୟ ରାଇଫଲ୍ସ, ଏସ୍ଓଜି ଯବାନ ଏବଂ ଜମ୍ମୁ କଶ୍ମୀର ପୋଲିସ ପକ୍ଷରୁ ମିଳିତ ସର୍ଚ୍ଚ ଅପରେସନ୍ କରାଯାଇଥିଲା। ସୋପିଆଁରେ ଉଭୟ ପକ୍ଷଙ୍କ ମଧ୍ୟରେ ବର୍ତ୍ତମାନ ମଧ୍ୟ ଗୁଳିକାଣ୍ଡ ଜାରି ରହିଛି। ପ୍ରାରମ୍ଭରୁ ଦୁଇ ଆତଙ୍କୀ ନିହତ ହୋଇଥିବା ବେଳେ ପରବର୍ତ୍ତୀ ସମୟରେ ଏହି ସଂଖ୍ୟା ୪କୁ ବୃଦ୍ଧି ପାଇଥିଲା। ମୃତ ଆତଙ୍କୀଙ୍କୁ ଚିହ୍ନଟ କରିବାର ପ୍ରୟାସ ଚଳାଇଛି ସୁରକ୍ଷା ବଳ। ଉଲ୍ଲେଖଯୋଗ୍ୟ ଯେ, ଶନିବାର ମଧ୍ୟ ବୋନିୟାରରେ ଘଟିଥିବା ଏନ୍କାଉଣ୍ଟରରେ ଜଣେ ଆତଙ୍କୀ ପ୍ରାଣ ହରାଇଥିଲେ।
army kills terrorist