ନୂଆଦିଲ୍ଲୀ: ୨୦୧୪ ପରଠାରୁ ପ୍ରଥମ ଥର ପାଇଁ ବିଜେପି ୨୭୨ ର ମ୍ୟାଜିକ୍ ନମ୍ବର ପଛରେ ପଡିଯାଇଛି। ଏଭଳି ପରିସ୍ଥିତିରେ ବିରୋଧୀ ଦଳ ‘ଇଣ୍ଡିଆ’ର ଆଖି ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟ ଏନ ଚନ୍ଦ୍ରବାବୁ ନାଇଡୁଙ୍କ ଉପରେ ରହିଛି, ଯିଏକି ବିଜେପି ନେତୃତ୍ୱାଧୀନ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ) ର ଅଂଶବିଶେଷ। ଏହି ସମୟରେ, ଦିଲ୍ଲୀରେ ସରକାରୀ ଗଠନ ଉପରେ ଆଲୋଚନା ପାଇଁ ଆଜି ହେବାକୁ ଥିବା ଏନଡିଏ ବୈଠକ ସମ୍ପର୍କରେ ଏନ ଚନ୍ଦ୍ରବାବୁ ନାଇଡୁ ସ୍ପଷ୍ଟ କରିଛନ୍ତି।
ଚନ୍ଦ୍ରବାବୁ ନାଇଡୁ ଆନ୍ଧ୍ରପ୍ରଦେଶର ବିଜୟୱାଡା ଠାରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରି କହିଛନ୍ତି ଯେ, ବ୍ୟସ୍ତ ହୁଅନ୍ତୁ ନାହିଁ। ଆପଣମାନେ ଖବର ଚାହୁଁଛନ୍ତି। ମୁଁ ଦେଶରେ ଅନେକ ରାଜନୈତିକ ପରିବର୍ତ୍ତନ ଘଟୁଥିବା ଦେଖିଛି, କିନ୍ତୁ ମୁଁ ଏନଡିଏରେ ରହିବି। ମୁଁ ଏନଡିଏ ବୈଠକରେ ଯୋଗଦେବାକୁ ଦିଲ୍ଲୀ ଯାଉଛି।
ଆନ୍ଧ୍ରପ୍ରଦେଶ ବିଧାନସଭା ନିର୍ବାଚନରେ ବିଜୟ ଏବଂ ଲୋକସଭା ନିର୍ବାଚନରେ ଟିଡିପିର ଉତ୍କୃଷ୍ଟ ପ୍ରଦର୍ଶନ ପାଇଁ ସେ ଭୋଟରଙ୍କୁ ଧନ୍ୟବାଦ ଜଣାଇବା ସହ କହିଛନ୍ତି ଯେ, ଆମେ ଏନଡିଏରେ ରହିବୁ।
ବିଜେପି ପାଇଁ ଟିଡିପିର ସମର୍ଥନ କାହିଁକି ଗୁରୁତ୍ୱପୂର୍ଣ୍ଣ?:
ଆନ୍ଧ୍ରପ୍ରଦେଶର ୧୭୫ ସିଟ୍ ବିଶିଷ୍ଟ ବିଧାନସଭାରେ ଟିଡିପି ୧୩୫ ଟି ଆସନ, ପୱନ କଲ୍ୟାଣଙ୍କ ଜନସେନା ୨୧ ଟି ଏବଂ ବିଜେପି ୮ ଟି ଆସନ ପାଇଛି। ଏହା ବ୍ୟତୀତ ଟିଡିପି ଲୋକସଭାରେ ୧୬ ଟି ସିଟ୍ ଜିତିଛି। ଏଥି ସହିତ ଲୋକସଭା ନିର୍ବାଚନରେ ବିଜେପି ୨୪୦ ଟି ଆସନ ଜିତିଛି। ଏଭଳି ପରିସ୍ଥିତିରେ ସରକାର ଗଠନ ପାଇଁ ଟିଡିପି ର ସମର୍ଥନ ଆବଶ୍ୟକ। ଏଭଳି ପରିସ୍ଥିତିରେ ଚନ୍ଦ୍ରବାବୁ ନାଇଡୁଙ୍କ ଆଭିମୁଖ୍ୟ ସ୍ପଷ୍ଟ କରିବା ଦ୍ଵାରା ବିଜେପିର କେନ୍ଦ୍ରରେ ସରକାର ଗଠନ ସହଜ ହେବ।
