ଷୋଡଶ ବିଧାନସଭାର ପ୍ରଥମ ଅଧିବେଶନର ପ୍ରଥମ ଦିନରେ କଂଗ୍ରେସ ଉଭୟ ବିଜେପି ଓ ବିଜେଡିକୁ ଘେରିଛି । ଚଳିତଥର ପ୍ରଥମ ଥର ପାଇଁ ବିଜେପି ବିରୋଧୀ ଦଳର ଭୂମିକା ନିଭାଉଛି । ବିଜେପି ତରଫରୁ ବିରୋଧୀ ଦଳର ନେତା ଭାବେ ପ୍ରଦୀପ୍ତ ନାଏକ ରହିଥିବାବେଳେ ତାଙ୍କ ନାମ ଗୃହରେ ଘୋଷଣା କରାଯାଇ ନଥିଲା । ବିନା ବୈଧାନିକ ଘୋଷଣାରେ ବାଚସ୍ପତି ବିରୋଧୀ ଦଳ ନେତାଙ୍କୁ ସମ୍ବୋଧନ କରିଥିବା ହେତୁ କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର ଏହାକୁ ନେଇ ପ୍ରଶ୍ନ ଉଠାଇଛନ୍ତି । ବିଧାନସଭା ଇତିହାସରେ ଏହା ଏକ ଦୁର୍ଭାଗ୍ୟଜନକ ଘଟଣା ବୋଲି କହିଛନ୍ତି ନରସିଂହ ମିଶ୍ର । ବିରୋଧୀ ଦଳ ନେତା କିଏ, ବାଚସ୍ପତି ଗୃହରେ ଘୋଷଣା କରିନାହାନ୍ତି । ଘୋଷଣା ନ କରି କିଭଳି ତାଙ୍କୁ ଭାଷଣ ଦେବାକୁ ଡାକିଲେ ବୋଲି ଶ୍ରୀ ମିଶ୍ର ପ୍ରଶ୍ନ କରିଛନ୍ତି । ସରକାରୀ ଦଳ ମୁଖ୍ୟ ସଚେତକ ବି ତାଙ୍କୁ ଧନ୍ୟବାଦ ଦେଲେ । ମେଣ୍ଟ ଘୋଷଣା ନହେଲେ ବି ଉଭୟ ଦଳ ଏକାଠି ଅଛନ୍ତି ବୋଲି କହିଛନ୍ତି ନରସିଂହ ମିଶ୍ର । ରାଜ୍ୟସଭା ଆସନ ବିଜେପିକୁ ଛାଡ଼ିଦେବା ଫଳରେ ବିଜେପି ବିଜେଡ଼ିର ଅଂଶୀଦାର ଦଳ ବୋଲି ସୂଚାଉଛି । ତେଣୁ ରାଜ୍ୟପାଳଙ୍କ ଅଭିଭାଷଣରେ କେନ୍ଦ୍ର ଅବହେଳା କଥା ଉଠାଇନାହାନ୍ତି ବୋଲି କହିଛନ୍ତି କଂଗ୍ରେସ ନେତା ।
