ମୁମ୍ବାଇ: ବିକଶିତ ରାଷ୍ଟ୍ରର ବିଚାରକୁ ପ୍ରୋତ୍ସାହନ ଦେବା ଏବଂ ଏ ଦିଗରେ ଏକ ସହଭାଗୀ ପ୍ରତିବଦ୍ଧତା ଉଦ୍ଦେଶ୍ୟରେ ମୁମ୍ବାଇ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଏମଆଇଏଫଏଫ)ର ଅଷ୍ଟାଦଶ ସଂସ୍କରଣରେ ଚଳିତ ବର୍ଷର ସ୍ୱତନ୍ତ୍ର ବିଷୟବସ୍ତୁ ‘‘ଅମୃତ କାଳରେ ଭାରତ’’ ଅଧୀନରେ ଛଅଟି ବଛାବଛା ଚଳଚ୍ଚିତ୍ରର ମିଶ୍ରଣ ପ୍ରଦର୍ଶିତ କରାଯିବ। ପ୍ରଦର୍ଶିତ ହେବାକୁ ଥିବା ଛଅଟି ଅସାଧାରଣ ଚଳଚ୍ଚିତ୍ର ଭାରତର ଅଭିବୃଦ୍ଧି, ବିକାଶ ଓ ସମୃଦ୍ଧିକୁ ଦର୍ଶାଇବ।
ପ୍ରତି ବର୍ଷ ଜାତୀୟ ପ୍ରତିଯୋଗିତା ଶ୍ରେଣୀ ଅଧୀନରେ ଏହି ବର୍ଗ ପାଇଁ ଏକ ସ୍ୱତନ୍ତ୍ର ବିଷୟ ଚୟନ କରାଯାଇଥାଏ। ଏମଆଇଏଫଏଫର ଅଷ୍ଟାଦଶ ସଂସ୍କରଣର ବିଷୟ ହେଉଛି ‘‘ଅମୃତ କାଳରେ ଭାରତ’’। ବିଜେତାଙ୍କୁ ଟ୍ରଫି ଓ ପ୍ରମାଣପତ୍ର ସହିତ ୧ ଲକ୍ଷ ଟଙ୍କାର ନଗଦ ରାଶି ପ୍ରଦାନ କରାଯିବ।
ଅଷ୍ଟାଦଶ ଏମଆଇଏଫଏଫ ଲାଗି ଜାତୀୟ ପ୍ରତିଯୋଗିତା ନିମନ୍ତେ ନିର୍ଣ୍ଣାୟକ ବିଚାରକମଣ୍ଡଳୀରେ ଏଡେଲ ସିଲମନ-ଏଗ୍ଜେବର୍ଟ, ଡକ୍ଟର ବବି ଶର୍ମା ବରୁଆ, ଅପୂର୍ବ ବକ୍ସି, ମୁଞ୍ଜାଲ ଶ୍ରଫ ଏବଂ ଆନ୍ନା ହେଙ୍କେଲ-ଡୋନରସ୍ମାର୍କଙ୍କ ଭଳି ପ୍ରମୁଖ ବ୍ୟକ୍ତିବିଶେଷ ସାମିଲ ରହିଛନ୍ତି । ଏମାନେ ସର୍ବଶ୍ରେଷ୍ଠ ଭାରତୀୟ ପ୍ରାମାଣିକ ଚଳଚ୍ଚିତ୍ର, କ୍ଷୁଦ୍ର ଚଳଚ୍ଚିତ୍ର, ଆନିମେସନ, ସର୍ବୋତ୍ତମ ପଦାର୍ପଣକାରୀ ଚଳଚ୍ଚିତ୍ର ପୁରସ୍କାର (ମହାରାଷ୍ଟ୍ର ସରକାରଙ୍କ ଦ୍ୱାରା ପ୍ରାୟୋଜିତ) ବ୍ୟତୀତ ଅନେକ ବୈଷୟିକ ପୁରସ୍କାର ଏବଂ ‘ଅମୃତ କାଳରେ ଭାରତ’ ଉପରେ ଆଧାରିତ ସର୍ବୋତ୍ତମ କ୍ଷୁଦ୍ର ଚଳଚ୍ଚିତ୍ର ପାଇଁ ସ୍ୱତନ୍ତ୍ର ପୁରସ୍କାର ପ୍ରଦାନ କରିବେ ।
‘ଅମୃତ କାଳରେ ଭାରତ’ ବର୍ଗରେ ସ୍ୱତନ୍ତ୍ର ପୁରସ୍କାର ପାଇବାକୁ ବଛା ହୋଇଥିବା ଚଳଚ୍ଚିତ୍ରଗୁଡ଼ିକ ହେଲେ
ଅଜୟ ଧ୍ୱଜା
ଏହି ସଙ୍ଗୀତ ଭିଡିଓ ହେଉଛି ନିଜ ଦେଶ ପ୍ରତି ଏକ ଦେଶାତ୍ମବୋଧକ ଶ୍ରଦ୍ଧାଞ୍ଜଳି, ଯାହା ପ୍ରତି ଅନୁଭୂତ ହେଉଥିବା ଗଭୀର ସମ୍ପର୍କ ଏବଂ ଗୌରବ ଉପରେ ଗୁରୁତ୍ୱ ଦେଇଥାଏ। ଏହା ରାଷ୍ଟ୍ରର କଲ୍ୟାଣ ପାଇଁ ବଳିଦାନ ଏବଂ ଉତ୍ସବ ପାଳନ ପ୍ରତି ପ୍ରତିବଦ୍ଧତାକୁ ପ୍ରକାଶ କରେ। “ଆପଣଙ୍କ ମାଟିରୁ ନିର୍ମିତ” ହେବାର ଚିତ୍ର ମାଟିରୁ ଉତ୍ପନ୍ନ ହୋଇଥିବା ନିଜସ୍ୱ ଏବଂ ପରିଚୟର ଭାବନାକୁ ରେଖାଙ୍କିତ କରିଥାଏ।
ଓନକେ ଓବବ୍ବା
ଓନାକେ ଓବାବ୍ବା ହେଉଛି ଜଣେ ସାହସୀ ମହିଳା, ଓନାକେଙ୍କ ବିଷୟରେ ଏକ ଚଳଚ୍ଚିତ୍ର। ଯେତେବେଳେ ଚିତ୍ରଦୁର୍ଗା ଦୁର୍ଗର ପ୍ରାଚୀର ଭାଙ୍ଗିବା ପାଇଁ ହାଇଦର୍ ଅଲ୍ଲୀଙ୍କ ବାରମ୍ବାର ପ୍ରୟାସକୁ ଦୃଢ଼ ପ୍ରତିରୋଧର ସମ୍ମୁଖୀନ ହେବାକୁ ପଡ଼ିଥିଲା ଏବଂ ସାଧାରଣ ଦୁର୍ଗ ଶ୍ରମିକଙ୍କ ଛଦ୍ମବେଶରେ ତାଙ୍କ ସେନା ଏକ ଗୁପ୍ତ ମାର୍ଗରେ ପ୍ରବେଶ କରିବାରେ ସଫଳ ହୋଇଥିଲା, ଜଣେ ସାଧାରଣ ଗୃହିଣୀ ଓବାବ୍ବା ଅନୁପ୍ରବେଶକାରୀମାନେ ଗୁପ୍ତ ପଥ ଦେଇ ଖସିଯିବାକୁ ଦେଖିଥିଲେ। ବିନା ଦ୍ୱିଧାରେ, ସେ ଏକ ଅଣପାରମ୍ପରିକ ଅସ୍ତ୍ର ଭାବରେ ନିକଟରେ ପଡ଼ିଥିବା ଏକ ସାଧାରଣ ପିଟଣ ବା ଓନାକେ ଉଠାଇଥିଲେ ଏବଂ ଅନୁପ୍ରବେଶକାରୀମାନଙ୍କୁ ଜଣଙ୍କ ପରେ ଜଣଙ୍କୁ ସାମ୍ନା କରିଥିଲେ । ସେ ଦକ୍ଷତାର ସହ ତାଙ୍କ ପିଟଣକୁ ମାରାତ୍ମକ ପ୍ରଭାବ ପାଇଁ ବ୍ୟବହାର କରିଥିଲେ।
ଏଭ୍ରିହ୍ୱେର୍
ଏଭ୍ରିହ୍ୱେର ଚଳଚ୍ଚିତ୍ରଟି ଦ୍ରୁତ ଫେଶନ ଜୀବନଶୈଳୀ ବିଷୟରେ ଆଲୋଚନା କରେ ଯେଉଁଠି ଆମେ ଆମର ଉପଭୋଗ ଭାବନା ଦ୍ୱାରା କିପରି ପରିଚାଳିତ ହୋଇପାରୁ ତାହା ଦର୍ଶାଯାଇଛି। ଅଧିକାଂଶ ପଲିମରରେ ତିଆରି ହୋଇଥିବା ଆମ ପୋଷାକଗୁଡ଼ିକ ବିଷୟରେ ଆମେ ପ୍ରାୟତଃ ଅଜ୍ଞ ଥାଉ। ଯେତେବେଳେ ଏକ ପୋଷାକ ନଷ୍ଟ ହୋଇଯାଏ, ଏହା ଅଳିଆଗଦାରେ ପୋତି ହୋଇଯାଏ। ଏହି ଚଳଚ୍ଚିତ୍ରଟି ଆମକୁ ଅହମ୍ମଦାବାଦର ସର୍ବବୃହତ ଅଳିଆଗଦା ପିରାନାକୁ ନେଇଯାଏ, ଯେଉଁଠାରେ ଅସ୍ଥିର ଫେଶନର ପ୍ରଭାବକୁ ଚିତ୍ରଣ କରିବା ପାଇଁ ଚରିତ୍ରମାନେ ପ୍ଲାଷ୍ଟିକ୍ ପିନ୍ଧିଥା’ନ୍ତି।
ଇଣ୍ଡିଆ –ହୋପ୍ସ 24
୨୦୨୪ ମସିହାରେ ସାରା ଦେଶର ବିଭିନ୍ନ ପିଢ଼ିର ଭାରତୀୟମାନେ, ଯେଉଁ ଭାଷାରେ ସେମାନେ ସବୁଠାରୁ ସହଜ, ସେହି ଭାଷାରେ ଭାରତ ପ୍ରତି ସେମାନଙ୍କ ଆଶା ବିଷୟରେ କୁହନ୍ତି। ଆମ ଦେଶର ବିଭିନ୍ନ ସ୍ଥାନରୁ ଦୃଶ୍ୟ ରହିଥିବା ଏହି ଚଳଚ୍ଚିତ୍ରଟି ଭାରତର ଗୌରବମୟ ବିବିଧତା ପ୍ରତି ଏକ ଶ୍ରଦ୍ଧାଞ୍ଜଳି।
ମୋରିଙ୍ଗା– ନେଚର୍ସ ପାନସିଆ ବା ସଜନା – ପ୍ରକୃତିର ଦିବ୍ୟ ଔଷଧି
‘‘ଅମୃତ କାଳ’’ରେ ସଜନା ଗଛ (ମୋରିଙ୍ଗା ଓଲିଫେରା) ଏକ ସୁପରଫୁଡ ଉତ୍ସ ଭାବେ ଉଭା ହେଉଛି। ସଜନା ପତ୍ରକୁ ଅପପୁଷ୍ଟି ଦୂରୀକରଣ କାର୍ଯ୍ୟକ୍ରମରେ ସାମିଲ କରିବାର ଭଲ ସମ୍ଭାବନା ଅଛି କାରଣ ଏହା ପୋଷକ ତତ୍ତ୍ୱରେ ବହୁତ ସମୃଦ୍ଧ ଏବଂ ପୁଷ୍ଟିକର ପରିପୂରକ ତୁଳନାରେ ଶସ୍ତା। ଏହି ପ୍ରମାଣିକ ଚଳଚ୍ଚିତ୍ର ସଜନାର ଲାଭ ଏବଂ ଏକ ଲାଭଜନକ ଫସଲ ଭାବରେ ଏହାର ସମ୍ଭାବନା ଉଜାଗର କରେ ଯାହା ଜଳବାୟୁ ପରିବର୍ତ୍ତନକୁ ପ୍ରତିରୋଧ କରିପାରିବ ଏବଂ ବିଦେଶୀ ମୁଦ୍ରା ପ୍ରଦାନ କରିପାରିବ।
ବିଗାରୀ କାମଗର
ଏହି କ୍ଷୁଦ୍ର ପ୍ରମାଣିକ ଚଳଚ୍ଚିତ୍ରଟି ଭାରତର ପୁଣେରେ ସଫେଇ କର୍ମଚାରୀଙ୍କ ଆହ୍ୱାନପୂର୍ଣ୍ଣ ଜୀବନକୁ ବର୍ଣ୍ଣନା କରିଛି, ଯେଉଁଥିରେ ଜଣେ ମଧ୍ୟବୟସ୍କ ମହିଳା କର୍ମଚାରୀଙ୍କ ଅନୁଭୂତି ଉପରେ ଧ୍ୟାନ ଦିଆଯାଇଛି। ତାଙ୍କ କାହାଣୀ ମାଧ୍ୟମରେ, ଏହି ଚଳଚ୍ଚିତ୍ରଟି ଶ୍ରମିକମାନେ ସମ୍ମୁଖୀନ ହେଉଥିବା ଦୈନନ୍ଦିନ ସଂଘର୍ଷ ଏବଂ ସମସ୍ୟାଗୁଡ଼ିକ ଉପରେ ଆଲୋକପାତ କରିଥାଏ, ସେମାନଙ୍କ କାର୍ଯ୍ୟ ଅବସ୍ଥା ଏବଂ ସମ୍ପ୍ରଦାୟର ବର୍ଜ୍ୟ ପରିଚାଳନା ଅଭ୍ୟାସକୁ ଦର୍ଶାଇଥାଏ। ଏହା ବର୍ଜ୍ୟବସ୍ତୁ ନିଷ୍କାସନ ପ୍ରତି ସ୍ଥାନୀୟ ବାସିନ୍ଦାଙ୍କ ମନୋଭାବକୁ ମଧ୍ୟ ପ୍ରଦର୍ଶିତ କରିଥାଏ।
