ନୂଆଦିଲ୍ଲୀ: ଦୀର୍ଘ ୧୭ ବର୍ଷର ସ୍ଵପ୍ନ ସାକାର ହୋଇଛି। ଭାରତ ବିଶ୍ଵ କ୍ରିକେଟରେ ନୂଆ ଚମ୍ପିୟାନ ହୋଇଛି। ଦକ୍ଷିଣ ଆଫ୍ରିକାକୁ ହରାଇ ରୋହିତ ବାହିନୀ ବିଶ୍ଵ ବିଜେତା ହୋଇଛି। ଭାରତକୁ ବିଶ୍ଵ ବିଜେତା କରିବାରେ ମୁଖ୍ୟ ଭୂମିକା ବିରାଟ କୋହିଲି, ହାର୍ଦ୍ଧିକ ପାଣ୍ଡ୍ୟା, ଜସପ୍ରିତ ବୁମରାହ, ଅର୍ଶଦୀପ ସିଂ ପ୍ରମୁଖ ମୁଖ୍ୟ ଭୂମିକା ଗ୍ରହଣ କରିଥିଲେ। ବିରାଟ କୋହିଲିଙ୍କୁ ଶ୍ରେଷ୍ଠ ଖେଳାଳି ଭାବେ ବିବେଚନା କରାଯାଇଥିଲା। ସେ ଟିମ ଇଣ୍ଡିଆ ପକ୍ଷରୁ ସର୍ବାଧିକ ୭୬ ରନ କରିଥିଲେ। ତେବେ ଅକ୍ସର ପଟେଲ ଏକ ଉପଯୋଗୀ ପାଳି ଖେଳିଥିଲେ। ସେ ୩୧ ବଲରେ ୪୭ ରନର ଏକ ଆକ୍ରମଣାତ୍ମକ ପାଳି ଖେଳିଥିଲେ।
ବୋଲିଂ ବିଭାଗରେ ହାର୍ଦିକ ପାଣ୍ଡ୍ୟା ଅବିଶ୍ଵସନୀୟ ପାଳି ଖେଳିଥିଲେ। ସେ ୩ ଓଭରରେ ୨୦ ରନ ଦେଇ ୩ ଟି ୱିକେଟ ନେଇଥିଲେ। ସେହିଭଳି ଜସପ୍ରିତ ବୁମରାହ ୪ ଓଭରରେ ୧୮ ରନ ଦେଇ ୨ ଟି ୱିକେଟ ନେଇଥିବା ବେଳେ ଅର୍ଶଦୀପ ସିଂ ୪ ଓଭରରେ ୨୦ ରନ ଦେଇ ୨ ଟି ୱିକେଟ ଅକ୍ତିଆର କରିଥିଲେ।
ଭାରତ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୧୭୬ ରନ ସଂଗ୍ରହ କରିଥିଲା। ଜବାବରେ ଦକ୍ଷିଣ ଆଫ୍ରିକା ୮ ୱିକେଟ ହରାଇ ୧୬୯ ରନ କରିପାରିଥିଲା। ଟିମ ଇଣ୍ଡିଆ ଟାଇଟଲ ମ୍ୟାଚରେ ୭ ରନ ରେ ଜିତି ବିଶ୍ଵ ବିଜେତା ହୋଇପାରିଥିଲା।
ଦକ୍ଷିଣ ଆଫ୍ରିକାକୁ ଅନ୍ତିମ ୩ ଓଭରରେ ଜିତିବା ପାଇଁ ମାତ୍ର ୨୨ ରନ ଆବଶ୍ୟକ ଥିବା ବେଳେ ହାତରେ ୫ ଟି ୱିକେଟ ଥିଲା। ୧୮ ତମ ଓଭରରେ ଜସପ୍ରିତ ବୁମରାହଙ୍କ ମାପିଚୁପି ବୋଲିଂ ବଳରେ ଦକ୍ଷିଣ ଆଫ୍ରିକା ଗୋଟିଏ ୱିକେଟ ହରାଇବା ସହ ମାତ୍ର ୨ ରନ କରିପାରିଥିଲା। ୧୯ ତମ ଓଭରେ ଦକ୍ଷିଣ ଆଫ୍ରିକା ପାଇଁ ମାତ୍ର ୪ ରନ ଆସିଥିଲା। ଏବଂ ଅନ୍ତିମ ଓଭରରେ ୧୬ ରନ ଆବଶ୍ୟକତା କରୁଥିବା ଦକ୍ଷିଣ ଆଫ୍ରିକାକୁ ପ୍ରଥମ ବଲରେ ଡେଭିଡ ମିଲରଙ୍କ ରୂପରେ ଝଟକା ଲାଗିଥିଲା। ଡେଭିଡ ମିଲରଙ୍କ ସଟରେ ସୂର୍ଯ୍ୟକୁମାର ସୀମାରେଖାରେ ଏକ ଅବିଶ୍ଵସନୀୟ କ୍ୟାଚ ନେଇ ଭାରତକୁ ଆହୁରୀ ମଜବୁତ କରିପାରିଥିଲେ। ଅନ୍ତିମ ୫ ବଲରେ ୧୬ ରନ ଥିବା ବେଳେ ରାବଡା ଥାର୍ଡ ମ୍ୟାନ ଅଞ୍ଚଳକୁ ଚୌକା ମାରି ମ୍ୟାଚକୁ ଆକର୍ଷଣ କରିଥିଲେ। ହେଲେ ହାର୍ଦ୍ଦିକ ଅନ୍ତିମ ୪ ବଲରେ ଗୋଟିଏ ୱିକେଟ ନେବା ସହ ଭାରତକୁ ୭ ରନରେ ବିଜୟୀ କରିଥିଲେ।