ନୂଆଦିଲ୍ଲୀ: ଜିମ୍ବାୱେ ଗସ୍ତକୁ ଯିବା ପୂର୍ବରୁ ବିସିସିଆଇ ୧୫ ଜଣିଆ ଦଳରେ ତିନୋଟି ବଡ଼ ପରିବର୍ତ୍ତନ କରିଛି। ପ୍ରାୟ ଏକ ସପ୍ତାହ ପୂର୍ବରୁ ଜିମ୍ବାୱେ ବିପକ୍ଷ ଟି -୨୦ ସିରିଜ ପାଇଁ ଭାରତୀୟ ଦଳ ଘୋଷଣା କରାଯାଇଥିଲା। କିନ୍ତୁ ଏହି ସମୟରେ ନୀତୀଶ ରେଡ୍ଡୀ ଆହତ କାରଣରୁ ବାଦ୍ ପଡିଥିଲେ ଏବଂ ତାଙ୍କ ସ୍ଥାନ ଶିବମ ଦୁବେଙ୍କୁ ଦିଆଯାଇଥିଲା। କିନ୍ତୁ ବର୍ତ୍ତମାନ ଟି-୨୦ ସିରିଜର ପ୍ରଥମ ୨ ଟି ମ୍ୟାଚରୁ ଯଶସ୍ୱୀ ଜୟସ୍ଵାଲ, ଶିବମ ଦୁବେ ଏବଂ ସଞ୍ଜୁ ସାମସନଙ୍କ ନାମ ହଟାଇ ଦିଆଯାଇଛି ଏବଂ ସେମାନଙ୍କ ସ୍ଥାନରେ ସାଇ ସୁଦର୍ଶନ, ଜିତେଶ ଶର୍ମା ଏବଂ ହର୍ଷିତ ରାଣାଙ୍କୁ ଦିଆଯାଇଛି। ଜିତେଶ ଶର୍ମା ଏବଂ ସାଇ ସୁଦର୍ଶନ ପୂର୍ବରୁ ଟିମ୍ ଇଣ୍ଡିଆ ପାଇଁ ଖେଳିଛନ୍ତି, କିନ୍ତୁ ହର୍ଷିତ ରାଣାଙ୍କ ପାଇଁ ଏହା ପଦାର୍ପଣ ସିରିଜ ହେବ। ୨୦୨୪ ଆଇପିଏଲ୍ ରେ କୋଲକାତା ନାଇଟ୍ ରାଇଡର୍ସ ପାଇଁ ଖେଳୁଥିବାବେଳେ ହର୍ଷିତ ମୋଟ ୧୯ ୱିକେଟ୍ ନେଇଥିଲେ।
କାହିଁକି ପରିବର୍ତ୍ତନ ହେଲା?:
ପ୍ରକାଶ ଯେ, ଶିବମ୍ ଦୁବେ, ସଞ୍ଜୁ ସାମସନ୍ ଏବଂ ଯଶସ୍ୱୀ ଜୟସ୍ଵାଲ୍, ଏହି ତିନି ଖେଳାଳି ଭାରତର ଟି -୨୦ ବିଶ୍ୱକପ୍ ଦଳର ଅଂଶ ଥିଲେ। ଯେହେତୁ ଝଡ଼ ତୋଫାନ କାରଣରୁ ଟିମ୍ ଇଣ୍ଡିଆ ବର୍ତ୍ତମାନ ବାରବାଡୋସରେ ଅଟକି ରହିଛି। ଏଭଳି ପରିସ୍ଥିତିରେ ସାଇ ସୁଦର୍ଶନ, ଜିତେଶ ଶର୍ମା ଏବଂ ହର୍ଷିତ ରାଣା ପ୍ରଥମ ୨ ଟି -୨୦ ମ୍ୟାଚରେ ତାଙ୍କ ସ୍ଥାନରେ ଖେଳିବେ।
ସିରିଜ୍ କେବେ ଆରମ୍ଭ ହେବ?:
ଭାରତ ଏବଂ ଜିମ୍ବାୱେ ମଧ୍ୟରେ ୫ ଟି ମ୍ୟାଚ୍ ୬ ଜୁଲାଇରୁ ଆରମ୍ଭ ହୋଇ ୧୪ ଜୁଲାଇ ପର୍ଯ୍ୟନ୍ତ ଚାଲିବ। ସିରିଜର ସମସ୍ତ ୫ ଟି ମ୍ୟାଚ୍ ହରାରେରେ ଖେଳାଯିବ। ଗୋଟିଏ ପଟେ ଭାରତ ଏହି ସିରିଜ ପାଇଁ ନିଜର ସମସ୍ତ ବରିଷ୍ଠ ଖେଳାଳିଙ୍କୁ ବିଶ୍ରାମ ଦେଇଛି, ଅନ୍ୟପଟେ ଜିମ୍ବାୱେ ଆଗାମୀ ସିରିଜ୍ ପାଇଁ ଏକ ଯୁବ ଦଳ ମଧ୍ୟ ପ୍ରସ୍ତୁତ କରିଛି, ଯେଉଁଥିପାଇଁ କ୍ରେଗ୍ ଇରୱିନ୍ ଏବଂ ଶନ ୱାଲ୍ଟମ୍ୟାନ୍ ଭଳି ଅଭିଜ୍ଞ ଖେଳାଳିଙ୍କୁ ବାହାରେ ରଖାଯାଇଛି।
