ଜି-୨୦ ସମ୍ମିଳନୀରେ ଭାଗ ନେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାପାନରେ ପହଞ୍ଚିଛନ୍ତି । ଏହି ଅବସରରେ ସେ ଭାରତୀୟ ସମୁଦାୟଙ୍କୁ ସମ୍ବୋଧନ କରିଛନ୍ତି । ମୋଦୀ କହିଛନ୍ତି ଯେ, ୭ମାସ ପରେ ଏଠାକୁ ଆସି ସେ ନିଜକୁ ଭାଗ୍ୟଶାଳୀ ଅନୁଭବ କରୁଛନ୍ତି । ଆଜି ଯଦି ସେ ଏଠାରେ ଅଛନ୍ତି ତେବେ ଏହା କେବଳ ଲୋକତନ୍ତ୍ର କାରଣରୁ ଏବଂ ଲୋକଙ୍କ ବିଶ୍ୱାସ ଭରସା କାରଣରୁ ହୋଇ ପାରିଛି । ୧୩୦ କୋଟି ଭାରତୀୟ ମଜବୁତ ସରକାର ଗଠନ କରିଛନ୍ତି । ତିନି ଦଶକ ପରେ ପ୍ରଥମ ଥର ପାଇଁ ପୂର୍ଣ୍ଣ ବହୁମତ ସହ ଦ୍ୱିତୀୟ ଥର ପାଇଁ ଆମେ ସରକାର ଗଠନ କରି ପାରିଛୁ । ଆମେ ଏହି ମନ୍ତ୍ର ସହ ଆଗକୁ ବଢିବୁ । ଭାରତ ଏକ ଶକ୍ତିଶାଳୀ ରାଷ୍ଟ୍ର ହେବ । ସେ ଆହୁରି କହିଛନ୍ତି ଯେ, ଯେତେବେଳେ ଦୁନିଆ ସହ ଭାରତର ସମ୍ବନ୍ଧ ବିଷୟରେ ବାର୍ତ୍ତାଳାପ ହୁଏ ସେହି ସମୟରେ ଜାପାନ ଏକ ମହତ୍ତ୍ବପୂର୍ଣ୍ଣ ଭୂମିକା ନିର୍ବାହନ କରେ । ଏହି ସମ୍ବନ୍ଧ ଆଜିର ନୁହେଁ ଏହା ବହୁ ବର୍ଷର ପୁରୁଣା ସମ୍ପର୍କ । ଉଭୟ ଉଭୟଙ୍କ ସଂସ୍କୃତିକୁ ନେଇ ସମ୍ମାନ ଏବଂ ସାମଞ୍ଜସ୍ୟତା ରଖିଛନ୍ତି ବୋଲି ମୋଦୀ କହିଛନ୍ତି । ପ୍ରାୟ ଦୁଇ ଦଶକ ପୂର୍ବରୁ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ଓ ପ୍ରଧାନମନ୍ତ୍ରୀ ୟୋଶିଣ୍ ମୋରୀ ମିଶି ଆମ ସମ୍ପର୍କକୁ ବିଶ୍ବସ୍ତରୀୟ ଭାଗିଦାରୀତାକୁ ରୂପ ଦେଇଥିଲେ ବୋଲି କହିଛନ୍ତି ମୋଦି । ଭାରତରେ ଏପରି କିଛି ସ୍ଥାନ ନାହିଁ ଯେଉଁଠାରେ ଜାପାନର ପରିଯୋଜନା ଏବଂ ନିବେଶର ଛାପ ରହିନାହିଁ । ସେହିପରି ଭାରତର ପ୍ରତିଭା ଓ ଲୋକବଳ ଜାପାନକୁ ମଜବୁତ୍ କରିବାରେ ଯୋଗଦାନ ଦେଉଛି । ଜାପାନ ସହ ଭାରତର ସଂପର୍କ ମଜବୁତ ହେବାରେ ଲାଗିଛି । ଜାପାନ ଭାରତର ଆର୍ଥିକ ବିକାଶରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି । ଆଗାମୀ ୫ବର୍ଷରେ ଭାରତ ପାଂଚ ଲକ୍ଷ କୋଟି ଡଲାରର ଅର୍ଥବ୍ୟବସ୍ଥା ଲକ୍ଷ୍ୟ ନେଇ ଆଗକୁ ବଢୁଛି । ଫଳରେ ଦୁଇ ଦେଶ ମଧ୍ୟରେ ଥିବା ସଂପର୍କ ପୂର୍ବାପେକ୍ଷା ମଜବୁତ ହେବ । ମୋଦିଙ୍କ ସମ୍ବୋଧନ ପରେ ଜୟଶ୍ରୀରାମ ଓ ଭାରତ ମାତା କି ଜୟର ନାରା ଶୁଣିବାକୁ ମିଳିଥିଲା ।
