ନୂଆଦିଲ୍ଲୀ: ମଧ୍ୟପ୍ରଦେଶର ସାଗର ଠାରେ ଏକ ଭୟଙ୍କର ଦୁର୍ଘଟଣା ଘଟିଛି। ଯେଉଁଠାରେ କାନ୍ଥ ଭୁଶୁଡ଼ିବା କାରଣରୁ ୮ ଜଣଙ୍କର ମୃତ୍ୟୁ ହୋଇଥିବାବେଳେ ୪ ଜଣ ଗୁରୁତର ଆହତ ହୋଇଛନ୍ତି। ଯେଉଁମାନେ ମୃତ୍ୟୁବରଣ କରିଛନ୍ତି, ସେମାନେ ୧୦ ରୁ ୧୪ ବର୍ଷର ଶିଶୁ ଥିଲେ। ସୂଚନା ଅନୁଯାୟୀ, ଲୋକମାନେ ଶାହପୁରାର ମନ୍ଦିର ନିକଟରେ ପାର୍ଥିବ ଶିବଲିଙ୍ଗ ତିଆରି କରୁଥିଲେ। ଏହି ସମୟରେ ୫୦ ବର୍ଷ ପୁରୁଣା ଘରର କାନ୍ଥ ଭୁଶୁଡି ପିଲାମାନଙ୍କ ଉପରେ ପଡିଥିଲା।
ଏହି ଦୁର୍ଘଟଣାରେ ଆଠ ଜଣ ଶିଶୁଙ୍କର ମୃତ୍ୟୁ ଘଟିଥିବା ବେଳେ ଅନେକ ଶିଶୁ ଆହତ ହୋଇ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି। ମୁଖ୍ୟମନ୍ତ୍ରୀ ଡକ୍ଟର ମୋହନ ଯାଦବ ଏହି ଘଟଣାରେ ଦୁଃଖ ପ୍ରକାଶ ପ୍ରକାଶ କରି ପୀଡିତାଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ ଆର୍ଥିକ ସହାୟତା ଘୋଷଣା କରିଛନ୍ତି।
ସାଗର ଜିଲ୍ଲାର ପ୍ରଶାସନିକ ତଥା ପୋଲିସ ଅଧିକାରୀଙ୍କଠାରୁ ମିଳିଥିବା ସୂଚନା ଅନୁଯାୟୀ, ବହୁ ସଂଖ୍ୟାରେ ସ୍କୁଲ ଛାତ୍ର ଶାହପୁରା ଅଞ୍ଚଳର ହରାଦୋଇ ଶିବ ମନ୍ଦିରରେ ଏକାଠି ହୋଇଥିଲେ। ଏଠାରେ ଶ୍ରାବଣ ମାସରେ ଭଗବାନ ଶିବଙ୍କ ପୂଜା ସହିତ ଭଗବତ କଥାର ମଧ୍ୟ ଆୟୋଜନ କରାଯାଉଛି। ମନ୍ଦିର ପରିସର ନିକଟରେ ଯେଉଁଠାରେ ଛାତ୍ରମାନେ ଭଗବାନ ଶିବଙ୍କ ଶିବଲିଙ୍ଗ ତିଆରି କରୁଥିଲେ, ସେଠାରେ ମଲ୍ଲୁ କୁଶୱା ନାମକ ଜଣେ ବ୍ୟକ୍ତିଙ୍କ ଘର ଥିଲା ଯାହାକି ବହୁତ ପୁରୁଣା ଥିଲା। ପ୍ରବଳ ବର୍ଷା ହେତୁ ଏହି ଘରର କାନ୍ଥ ଦୁର୍ବଳ ହୋଇଯାଇଥିଲା।