ଭୁବନେଶ୍ୱର: 2024-25 ଆର୍ଥିକ ବର୍ଷର 26 ଅଗଷ୍ଟ ପର୍ଯ୍ୟନ୍ତ ମାତ୍ର 148 ଦିନ ମଧ୍ୟରେ ପୂର୍ବତଟ ରେଳପଥ ପଣ୍ୟ ପରିବହନ କ୍ଷେତ୍ରରେ 100.57 ନିୟୁତ ଟନ୍ (MT) ପଣ୍ୟ ବୋଝେଇ କରି ଏକ ନୂତନ ମାନଦଣ୍ଡ ହାସଲ କରିବା ସହିତ ପଣ୍ୟ ପରିବହନରେ ଦ୍ରୁତତମ ବୋଝେଇ ହାସଲ କରିଛି।
2023-24 ଆର୍ଥିକ ବର୍ଷର ସମାନ ସମୟ ଅବଧି ମଧ୍ୟରେ ଏହି ରେଳପଥ 100 ନିୟୁତ ଟନ୍ ପଣ୍ୟ ପରିବହନ ପାଇଁ 152 ଦିନ ସମୟ ନେଇଥିଲା। ଅଗଷ୍ଟ 26, 2024 ସୁଦ୍ଧା, ପୂର୍ବତଟ ରେଳପଥ ପଣ୍ୟ ପରିବହନରେ 3.37% ବୃଦ୍ଧି ରେକର୍ଡ କରିଛି, ଯାହା ପୂର୍ବ ବର୍ଷର ସମାନ ସମୟ ତୁଳନାରେ 3.282 ନିୟୁତ ଟନ୍ ଅଧିକ ଅଟେ। ପୂର୍ବ ଆର୍ଥିକ ବର୍ଷର ସମାନ ସମୟ ଅବଧି ମଧ୍ୟରେ ପୂର୍ବତଟ ରେଳପଥ 97.288 ନିୟୁତ ଟନ୍ ପଣ୍ୟ ବୋଝେଇ କରିଥିଲା।
ଏହି ଅତୁଳନୀୟ ସଫଳତାକୁ ପୂର୍ବତଟ ରେଳପଥର ତିନୋଟି ରେଳ ମଣ୍ଡଳ ଯଥା ଖୋର୍ଦ୍ଧା ରୋଡ଼, ୱାଲଟିୟର ଓ ସମ୍ବଲପୁର ରେଳ ମଣ୍ଡଳର ଉଲ୍ଲେଖନୀୟ ପ୍ରଦର୍ଶନ ସହିତ ବିଭିନ୍ନ ପ୍ରକାର ପଣ୍ୟ ବୋଝେଇ ସଫଳତାରେ ଉଲ୍ଲେଖନୀୟ ଅବଦାନ ରଖିଛି। ପୂର୍ବତଟ ରେଳପଥ ମଧ୍ୟରେ ବିଭିନ୍ନ ପ୍ରକାର ପଣ୍ୟ ବୋଝେଇ ହେଲା:
• କୋଇଲା: 60.93 ନିୟୁତ ଟନ୍ (ଆମଦାନୀ ହୋଇଥିବା କୋଇଲା 22.449 ନିୟୁତ ଟନ୍ ସହିତ)
• ଇସ୍ପାତ କାରଖାନା ପାଇଁ କଞ୍ଚାମାଲ: 3.812 ନିୟୁତ ଟନ୍
• ଲୁହା ଏବଂ ଇସ୍ପାତ: 8.168 ନିୟୁତ ଟନ୍
• ଲୁହାପଥର: 12.153 ନିୟୁତ ଟନ୍
• ସିମେଣ୍ଟ: 32.873 ନିୟୁତ ଟନ୍
• ଖାଦ୍ୟ ଶସ୍ୟ: 1.076 ନିୟୁତ ଟନ୍
• ସାର: 2.284 ନିୟୁତ ଟନ୍
• ଖଣିଜ ତୈଳ (ପେଟ୍ରୋଲିୟମ, ତୈଳ) ଏବଂ ଲୁବ୍ରିକାଣ୍ଟ: 1.24 ନିୟୁତ ଟନ୍
• କଣ୍ଟେନେରରେ ପଣ୍ୟ ପରିବହନ: 2.151 ନିୟୁତ ଟନ୍
• ଅନ୍ୟ ପଣ୍ୟ ପରିବହନ: 8.419 ନିୟୁତ ଟନ୍
ଏହି ପଣ୍ୟ ବୋଝେଇ ଓ ପରିବହନ ମାଇଲଖୁଣ୍ଟରେ ପ୍ରମୁଖ ଯୋଗଦାନକାରୀମାନେ ପ୍ରମୁଖ ଶିଳ୍ପ ହବ୍ ଏବଂ ବନ୍ଦରଗୁଡିକ ଯେପରିକି ତାଳଚେର, ପାରାଦୀପ, ଧାମରା, ବିଶାଖାପାଟନମ୍, ଗଙ୍ଗାଭରମ, କେନ୍ଦୁଝର, କର୍ତ୍ତଭାଲାସ-କିରନ୍ଦୁଲ ଲାଇନ, ଇସ୍ପାତ କାରଖାନା ଏବଂ ପୂର୍ବତଟ ରେଳପଥ ଅଧୀନରେ ଥିବା ଆଲୁମିନିୟମ୍ ପ୍ଲାଣ୍ଟ ଅନ୍ତର୍ଭୁକ୍ତ।
ଏହି ସମୟ ଅବଧି ମଧ୍ୟରେ ଖୋର୍ଦ୍ଧା ରୋଡ଼ ରେଳ ମଣ୍ଡଳ 64.32 ନିୟୁତ ଟନ୍ ପଣ୍ୟ ପରିବହନ କରିଥିବାବେଳେ ୱାଲଟିୟର ରେଳ ମଣ୍ଡଳ 27.675 ନିୟୁତ ଟନ୍ ଏବଂ ସମ୍ବଲପୁର ରେଳ ମଣ୍ଡଳ 8.575 ନିୟୁତ ଟନ୍ ପଣ୍ୟ ପରିବହନ କରି ଉପରୋକ୍ତ ସଫଳତା ଆଣି ପାରିଛନ୍ତି।
ଏହି ସଫଳତା ସମଗ୍ର ଦେଶରେ ଅତ୍ୟାବଶ୍ୟକ ସାମଗ୍ରୀର ଦକ୍ଷ ଏବଂ ଠିକ ସମୟରେ ପରିବହନକୁ ସୁନିଶ୍ଚିତ କରି ଦେଶର ଅର୍ଥନୈତିକ ଅଭିବୃଦ୍ଧିକୁ ପ୍ରୋତ୍ସାହନ କରିବାକୁ ପୂର୍ବ ତଟ ରେଳପଥର ପ୍ରତିବଦ୍ଧତାକୁ ସୂଚିତ କରୁଅଛି। ଯେହେତୁ ପୂର୍ବତଟ ରେଳପଥ ଏହାର କାର୍ଯ୍ୟକୁ ଅନୁକୂଳ ପରିସ୍ଥିତିରେ ଜାରି ରଖିଛି, ଏହା ଭାରତୀୟ ରେଳବାଇ ମଧ୍ୟରେ ପଣ୍ୟ ବୋଝେଇ ଏବଂ ପରିବହନ ପାଇଁ ଏକ ନୂତନ ମାନକ ସ୍ଥିର କରୁଅଛି।