ନୂଆଦିଲ୍ଲୀ: ଗାୟକ କହ୍ନେୟା ମିତ୍ତଲ କଂଗ୍ରେସରେ ଯୋଗଦେବେ ନାହିଁ। ସେ କଂଗ୍ରେସରେ ଯୋଗଦେବା ନିଷ୍ପତ୍ତି ପ୍ରତ୍ୟାହାର କରି ନେଇଛନ୍ତି। ‘ଜୋ ରାମ କୋ ଲାଏ ହେଁ, ହମ୍ ଉନକୋ ଲାଏଙ୍ଗେ’ ଗୀତରେ ପ୍ରସିଦ୍ଧ ହୋଇଥିବା କହ୍ନେୟା ମିତ୍ତଲ କଂଗ୍ରେସରେ ଯୋଗଦେବାକୁ ଘୋଷଣା କରିଥିଲେ। ହରିୟାଣାର ପଞ୍ଚକୁଲା ଆସନରୁ ସେ ବିଜେପି ଟିକେଟ ଚାହୁଁଛନ୍ତି ବୋଲି ଆଲୋଚନା ହୋଇଥିଲା। ବିଜେପି ଜ୍ଞାନ ଚାନ୍ଦ ଗୁପ୍ତାଙ୍କୁ ଏଠାରୁ ପ୍ରାର୍ଥୀ କରିଥିଲା। ତେବେ ସେ ଟିକେଟ ଚାହୁଁ ନାହାଁନ୍ତି ବୋଲି ସ୍ପଷ୍ଟ କରିଛନ୍ତି।
କଂଗ୍ରେସରେ ଯୋଗ ନଦେବା ନିଷ୍ପତ୍ତି ଉପରେ କହ୍ନେୟା ମିତ୍ତଲ ଏକ ଭିଡିଓ ଜାରି କରିଛନ୍ତି। କହ୍ନେୟା ମିତ୍ତଲ କହିଛନ୍ତି ଯେ, “ଗତ ଦୁଇ ଦିନ ହେଲା ମୁଁ ଅନୁଭବ କଲି ଯେ ମୋର ସମସ୍ତ ସନାତନ ଭାଇ ଓ ଭଉଣୀ ଏବଂ ବିଶେଷକରି ବିଜେପିର ଶୀର୍ଷ ନେତୃତ୍ୱ ମୋତେ ବହୁତ ଭଲ ପାଆନ୍ତି, ମୋତେ ବହୁତ ଯତ୍ନ ନିଅନ୍ତି। ଗତ ଦୁଇ ଦିନ ଧରି ମୁଁ ଦେଖିଲି ସମସ୍ତେ ଚିନ୍ତିତ ଅଛନ୍ତି, ମୁଁ ଏଥିପାଇଁ କ୍ଷମା ପ୍ରାର୍ଥନା କରୁଛି, ମୁଁ କଂଗ୍ରେସରେ ଯୋଗଦେବାକୁ କହିଥିଲି, କିନ୍ତୁ ଏହି ନିଷ୍ପତ୍ତିକୁ ମୁଁ ପ୍ରତ୍ୟାହାର କରୁଛି।
କହ୍ନେୟା ମିତ୍ତଲ ଆହୁରି ମଧ୍ୟ କହିଛନ୍ତି ଯେ, “ମୁଁ ଚାହେଁ ନାହିଁ ଯେ କୌଣସି ସନାତନୀଙ୍କ ବିଶ୍ୱାସ ଭାଙ୍ଗିଯାଉ। ଯଦି ମୁଁ ଆଜି ଭାଙ୍ଗିଯାଏ, ତେବେ କେତେ ଜଣ ଭାଙ୍ଗିବେ ମୁଁ ଜାଣେ ନାହିଁ। ଆମେ ସମସ୍ତେ ରାମଙ୍କର ଅଟୁ ଏବଂ ସର୍ବଦା ରାମଙ୍କର ରହିବି। ମୁଁ ପୁନର୍ବାର ଆପଣଙ୍କୁ କ୍ଷମା ପ୍ରାର୍ଥନା କରୁଛି, ଯେଉଁଥିପାଇଁ ଆପଣମାନେ ବିବ୍ରତ ହେଲେ।”
ୟୁପିରେ ବିଜେପି ନିର୍ବାଚନ ପ୍ରଚାର ସମୟରେ କହ୍ନେୟା ମିତ୍ତଲଙ୍କ ଗୀତ ବହୁତ ଶୁଣିବାକୁ ମିଳିଥିଲା। ସେ ବିଜେପି କାର୍ଯ୍ୟକ୍ରମରେ ଭାଗ ନେଉଥିବାର ନଜର ଆସିଥିଲେ। ସେ ଚଣ୍ଡିଗଡ଼ର ବାସିନ୍ଦା। ତାଙ୍କର ଅନେକ ଭଜନ ହିଟ୍ ହୋଇଛି। ଫେସବୁକରେ ତାଙ୍କର ୧.୯ ମିଲିୟନ୍ ଅନୁସରଣକାରୀ ଅଛନ୍ତି। ୟୁଟ୍ୟୁବରେ ୨.୬୫ ମିଲିୟନ୍ ସବସ୍କ୍ରାଇବର ଅଛନ୍ତି।
