ଆଜି ନବୀନ ନିବାସରେ ବିଜେଡି ବିଧାୟକଙ୍କ ବୈଠକ ଅନୁଷ୍ଠିତ ହେବ। ଦଳୀୟ ଆଭ୍ୟନ୍ତରୀଣ ବ୍ୟାପାର ଏବଂ ଆଗାମୀ ଉପ ନିର୍ବାଚନ ପ୍ରସଙ୍ଗରେ ବୈଠକରେ ଆଲୋଚନା ହେବା ନେଇ ସୂଚନା ମିଳିଛି। ଲଗାତାର ପଞ୍ଚମ ଥର ପାଇଁ ବିଜୁ ଜନତା ଦଳ ରାଜ୍ୟରେ ସଂଖ୍ୟା ଗରିଷ୍ଠତା ଲାଭ କରିଛି। ଏହାସହ ଅନେକ ନୂଆ ମୁହଁ ବିଧାୟକ ହୋଇଛନ୍ତି। ଆଜି ଦିନ ୧୦ଟା ୩୦ରୁ ଦଳର ସମସ୍ତ ପୁରୁଣା ଏବଂ ନବ ନିର୍ବାଚିତ ବିଧାୟକଙ୍କ ସହ ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଲୋଚନା କରିବେ। ପ୍ରଥମେ ସେ ନବ ନିର୍ବାଚିତ ବିଧାୟକଙ୍କ ସହ ଆଲୋଚନା କରିବେ। ଏହାପରେ ସେ ପୁରୁଣା ବିଧାୟକଙ୍କ ସହ ଆଲୋଚନା କରିବା ନେଇ ଜଣାପଡିଛି। ଦଳର ସାଙ୍ଗଠନିକ ସ୍ଥିତି ପ୍ରସଙ୍ଗରେ ବୈଠକରେ ଆଲୋଚନା ହେବା ନେଇ ସମ୍ଭାବନା ରହିଛି। ଏହାସହ ଆଗାମୀ ଦିନରେ ପାଟକୁରା ନିର୍ବାଚନ ଏବଂ ବିଜେପୁରରେ ଉପ ନିର୍ବାଚନ ରହିଛି। ଏପରିକି ପୌର ନିର୍ବାଚନ ମଧ୍ୟ ରହିଛି। ଏହି ବାବଦରେ ମଧ୍ୟ ନବୀନ ବିଧାୟକଙ୍କ ସହ ଆଲୋଚନା କରିବେ। ଏପରିକି ବିଧାୟକଙ୍କ ଆଚରଣ ଏବଂ ଶୃଙ୍ଖଳାକୁ ନେଇ ନବୀନ ସେମାନଙ୍କୁ କିଛି ଟିପ୍ସ ଦେଇପାରନ୍ତି ବୋଲି ସୂଚନା ରହିଛି।
