ନୂଆଦିଲ୍ଲୀ: କେବଳ ଦେଶର ଲୋକ ନୁହଁନ୍ତି ପଡୋଶୀ ଦେଶର ଲୋକମାନେ ମଧ୍ୟ ଭାରତରେ ଅନୁଷ୍ଠିତ କୌଣସି ନିର୍ବାଚନରେ ବହୁତ ଆଗ୍ରହ ଦେଖାଉଛନ୍ତି। ସୀମା ପାର୍ଶ୍ୱରେ ଥିବା ଅନେକ ବିଶେଷଜ୍ଞ ମଧ୍ୟ ସେମାନଙ୍କର ମତାମତ ଦିଅନ୍ତି। ଏହି ପରିପ୍ରେକ୍ଷୀରେ ନିକଟରେ ହରିୟାଣା ଏବଂ ଜାମ୍ମୁ କାଶ୍ମୀର ନିର୍ବାଚନକୁ ନେଇ ପାକିସ୍ତାନରେ ଅନେକ ଚର୍ଚ୍ଚା ହୋଇଛି। ବିଶେଷକରି ଜାମ୍ମୁ କାଶ୍ମୀର ନିର୍ବାଚନକୁ ନେଇ ସେମାନଙ୍କ ମଧ୍ୟରେ କୌତୁହଳ ଦେଖିବାକୁ ମିଳିଛି। ଏହି ସମୟରେ ପାକିସ୍ତାନୀ ବିଶେଷଜ୍ଞ ତଥା ୟୁଟ୍ୟୁବର କମର ଚିମା ମଧ୍ୟ ଫଳାଫଳ ସମ୍ପର୍କରେ ନିଜର ମତ ପ୍ରକାଶ କରିଛନ୍ତି। ଜାମ୍ମୁ କାଶ୍ମୀରରେ ପରାଜୟର ସମ୍ମୁଖୀନ ହେଇଥିବାବେଳେ ହରିୟାଣାରେ ବିଜେପି ସଫଳ ହେବାରେ କେଉଁ କାରଣ ରହିଛି ତାହା ସେ କହିଛନ୍ତି।
ଜାମୁ-କାଶ୍ମୀର ଏବଂ ହରିୟାଣାର ନିର୍ବାଚନ ଫଳାଫଳ ସମ୍ପର୍କରେ କମର ଚିମା ତାଙ୍କର ଏକ ଭିଡିଓରେ ସେୟାର କରିଛନ୍ତି, ଯେଉଁଥିରେ ସେ ଭାରତୀୟ ଜନତା ପାର୍ଟି (ବିଜେପି) ର ପ୍ରଦର୍ଶନକୁ ଉଭୟ ଅଞ୍ଚଳର ରାଜନୀତିରେ ବିଶ୍ଳେଷଣ କରିଛନ୍ତି। ସେ କହିଛନ୍ତି ଯେ, ଜାମ୍ମୁ କାଶ୍ମୀରରେ କାଶ୍ମୀରବାସୀଙ୍କ କ୍ରୋଧର ସାମ୍ନା କରିବାକୁ ପଡିଛି। ୨୦୧୯ ରେ ମୋଦୀ ସରକାର କାଶ୍ମୀରର ସ୍ଵତନ୍ତ୍ର ରାଜ୍ୟର ମାନ୍ୟତା ହଟାଇବା ଏବଂ ବାହାର ଲୋକଙ୍କୁ ସ୍ଥାନାନ୍ତର କରିବାର ପ୍ରୟାସ ଯୋଗୁଁ ସେଠାରେ ଲୋକଙ୍କ କ୍ରୋଧର ମୁଖ୍ୟ କାରଣ ବୋଲି ସେ ଦର୍ଶାଇଛନ୍ତି। ତାଙ୍କ କହିବାନୁସାରେ, କାଶ୍ମୀରରେ ଯେଉଁଭଳି ଭାବରେ ଭୋଟ୍ ଦିଆଯାଇଥିଲା ଏବଂ ଫଳାଫଳ ଆସିଲା। ଏଥିରୁ ଏହା ସ୍ପଷ୍ଟ ହୋଇଛି ଯେ, କାଶ୍ମୀରର ଲୋକମାନେ ବିଜେପି ବିରୋଧରେ ଭୋଟ୍ ଦେଇଛନ୍ତି।
କମର ଚୀମା ଆହୁରି ମଧ୍ୟ କହିଛନ୍ତି ଯେ, ମୋଦୀ ସରକାର କରିଥିବା ପରିବର୍ତ୍ତନ କାଶ୍ମୀରବାସୀ ପସନ୍ଦ କରୁନାହାଁନ୍ତି, ଯେଉଁଥିପାଇଁ ବିଜେପି ପ୍ରତି ଅସନ୍ତୋଷ ବୃଦ୍ଧି ପାଇଛି। ତେବେ ଜାମ୍ମୁ ଅଞ୍ଚଳରେ ବିଜେପିର ପ୍ରଦର୍ଶନ ଭଲ ଥିଲା ଯେଉଁଠାରେ ଦଳ ବହୁ ସଂଖ୍ୟକ ଆସନ ଜିତିଥିଲା। ଏହା ସ୍ପଷ୍ଟ କରେ ଯେ, ଜାମ୍ମୁ ଲୋକଙ୍କ ମଧ୍ୟରେ ବିଜେପିର ଅପିଲ ଏବେ ମଧ୍ୟ ପ୍ରଭାବଶାଳୀ ଥିବାବେଳେ କାଶ୍ମୀରରେ ଦଳ ବିରୋଧରେ ଅସନ୍ତୋଷର ବାତାବରଣ ଦେଖିବାକୁ ମିଳିଥିଲା। ସେ କହିଛନ୍ତି ଯେ, କାଶ୍ମୀରକୁ ନେଇ ପାକିସ୍ତାନ ଦ୍ୱାରା ସୃଷ୍ଟି ହୋଇଥିବା କାହାଣୀ ଏହି ନିର୍ବାଚନରେ ପରାଜୟର କାରଣ ହୋଇଛି। କାଶ୍ମୀରର ଲୋକମାନେ ପାକିସ୍ତାନର ଅପ୍ରଚାରକୁ ପ୍ରତ୍ୟାଖ୍ୟାନ କରିଛନ୍ତି ଏବଂ ସେମାନେ ଏକ ସ୍ପଷ୍ଟ ବାର୍ତ୍ତା ଦେଇଛନ୍ତି ଯେ ସେମାନେ ଆଉ ପାକିସ୍ତାନଠାରୁ ଅଧିକ ଆଶା କରନ୍ତି ନାହିଁ। ଚିମା ଏହା ମଧ୍ୟ ସ୍ୱୀକାର କରିଛନ୍ତି ଯେ, ପାକିସ୍ତାନର ସାମ୍ପ୍ରତିକ ପରିସ୍ଥିତିକୁ ଦେଖି କାଶ୍ମୀରବାସୀ ସେମାନଙ୍କଠାରୁ ଆଉ ଅଧିକ ଆଶା କରନ୍ତି ନାହିଁ।
ହରିୟାଣା ନିର୍ବାଚନ ଫଳାଫଳ ଉପରେ ଚୀମାଙ୍କ ମତ:
ହରିୟାଣାର ନିର୍ବାଚନ ଫଳାଫଳ ସମ୍ପର୍କରେ ଚୀମା କହିଛନ୍ତି ଯେ, ସେମାନେ ବହୁତ ଚକିତ କରିଛନ୍ତି। ଯଦିଓ ବିଶ୍ବାସସ କରାଯାଉଥିଲା ଯେ ଏଥର କଂଗ୍ରେସ ଜିତିବ, କିନ୍ତୁ ବିଜେପି କ୍ରମାଗତ ତୃତୀୟ ଥର ପାଇଁ ସରକାର ଗଠନ କରିଛି। ଏହା ସ୍ପଷ୍ଟ କରେ ଯେ ନରେନ୍ଦ୍ର ମୋଦିଙ୍କ ଅପିଲ ଭାରତରେ ଏବେ ବି ପ୍ରଭାବଶାଳୀ। ସେ ଏହା ମଧ୍ୟ କହିଛନ୍ତି ଯେ, ହରିୟାଣାର ଜାଟ ସମ୍ପ୍ରଦାୟ ବିଜେପି ବିରୋଧରେ ଥିଲା, କିନ୍ତୁ ଅନ୍ୟ ଜାତି ବିଜେପିକୁ ସମ୍ପୂର୍ଣ୍ଣ ସମର୍ଥନ କରିଥିଲା, ଯାହା ବିଜେପିକୁ ଆଉ ଏକ ବିଜୟ ହାସଲ କରିବାରେ ସାହାଯ୍ୟ କରିଥିଲା।
