ନୂଆଦିଲ୍ଲୀ: ଉତ୍ତରପ୍ରଦେଶର ୯ ଟି ଆସନରେ ହେବାକୁ ଥିବା ଉପ-ନିର୍ବାଚନରୁ ଭାରତୀୟ ଜାତୀୟ କଂଗ୍ରେସ ଦୂରତା ରଖିପାରେ। ସୂଚନାନୁସାରେ, କଂଗ୍ରେସ-ସମାଜବାଦୀ ପାର୍ଟି ମେଣ୍ଟରେ ଫାଟ ସୃଷ୍ଟି ହୋଇଛି। ସମାଜବାଦୀ ପାର୍ଟି ୯ ରୁ କେବଳ ଦୁଇଟି ଆସନ ପ୍ରଦାନ କରିଥିବାରୁ କଂଗ୍ରେସ ଅସହମତି ପ୍ରକାଶ କରି ଉପ-ନିର୍ବାଚନରୁ ଦୂରଇ ରହିବାକୁ ବିଚାର କରୁଛି। ସମାଜବାଦୀ ପାର୍ଟି ଦ୍ୱାରା ପ୍ରାର୍ଥୀଙ୍କ ଏକପାଖିଆ ଘୋଷଣାକୁ ନେଇ କଂଗ୍ରେସ ମଧ୍ୟ ଅସନ୍ତୁଷ୍ଟ ଅଛି।
ଯଦିଓ ୟୁପି କଂଗ୍ରେସର କିଛି ନେତା ସମସ୍ତ ଆସନରେ ପ୍ରାର୍ଥୀ ଦେବା ସପକ୍ଷରେ ଅଛନ୍ତି, ତେବେ ଅଧିକ ସମ୍ଭାବନା ହେଉଛି ଉପ-ନିର୍ବାଚନରେ କଂଗ୍ରେସ ଗୋଟିଏ ବି ପ୍ରାର୍ଥୀ ମଧ୍ୟ ଦେଇନପାରେ। ଆସନ୍ତାକାଲି ଏହି ବିଷୟରେ ଏକ ଔପଚାରିକ ଘୋଷଣା ହେବାର ସମ୍ଭାବନା ଅଛି।
ୟୁପି କଂଗ୍ରେସ ସଭାପତି ଅଜୟ ରାୟ କହିଛନ୍ତି ଯେ, ଉପ-ନିର୍ବାଚନରେ ଦଳ ନିଜ ପ୍ରାର୍ଥୀଙ୍କୁ ମଇଦାନକୁ ଓହ୍ଳାଇବ। ଆମର ୫ ଟି ଆସନ ପାଇଁ ଏସପି ସହ ଆଲୋଚନା ଚାଲିଛି। ଚୂଡାନ୍ତ ନିଷ୍ପତ୍ତି ଜାତୀୟ ନେତୃତ୍ୱ ନେବ।
ୟୁପିରେ ୧୦ ଟି ଆସନରେ ଉପ-ନିର୍ବାଚନ ଅନୁଷ୍ଠିତ ହେବାକୁ ଯାଉଥିଲା, କିନ୍ତୁ ମିଲ୍କିପୁର ବ୍ୟତୀତ ନିର୍ବାଚନ ଆୟୋଗ କେବଳ ବାକି ୯ ଟି ଆସନରେ ନିର୍ବାଚନ ଘୋଷଣା କରିଛନ୍ତି।
ୟୁପି ଉପ-ନିର୍ବାଚନ ପାଇଁ ଭୋଟ୍ ୧୩ ନଭେମ୍ବରରେ ହେବ ଏବଂ ଗଣନା ୨୩ ନଭେମ୍ବରରେ ହେବ। ମିଲ୍କିପୁର ସମେତ ମୋଟ ୭ ଟି ସିଟ୍ ପାଇଁ ଏସପି ଏପର୍ଯ୍ୟନ୍ତ ପ୍ରାର୍ଥୀ ଘୋଷଣା କରିଛି। କଂଗ୍ରେସକୁ ଆଲିଗଡର ଖୈର ଏବଂ ଗାଜିଆବାଦ ସଦର ଆସନ ପ୍ରଦାନ କରାଯାଇଛି।