ଦିଲ୍ଲୀସ୍ଥିତ ସିବିଆଇର ଏକ ସ୍ୱତନ୍ତ୍ର ଅଦାଲତ ଗୁରୁବାର ଆଇଏନଏକ୍ସ ମିଡିଆ ଦୁର୍ନୀତି ମାମଲାରେ ଇନ୍ଦ୍ରାଣୀ ମୁଖାର୍ଜୀଙ୍କୁ ସରକାରୀ ସାକ୍ଷୀ ହେବା ପାଇଁ ଅନୁମତି ପ୍ରଦାନ କରିଛନ୍ତି । ଏହି ମାମଲାରେ କଂଗ୍ରେସ ବରିଷ୍ଠ ନେତା ତଥା ପୂର୍ବତନ କେନ୍ଦ୍ର ମନ୍ତ୍ରୀ ପି ଚିଦମ୍ବରମ ଏବଂ ତାଙ୍କ ପୁଅ କାର୍ତ୍ତି ଚିଦମ୍ବରମ ଅଭିଯୁକ୍ତ ଅଛନ୍ତି । ଏହି ମାମଲାର ପରବର୍ତ୍ତୀ ଶୁଣାଣି ଜୁଲାଇ ୧୧ରେ ହେବ । ଶୁଣାଣି ଦିନ ଇନ୍ଦ୍ରାଣୀଙ୍କୁ ଅଦାଲତରେ ହାଜର କରାଯିବ । ନିଜ ଇଚ୍ଛାରେ ସରକାରୀ ସାକ୍ଷୀ ହେବାକୁ ରାଜି ହୋଇଥିବାରୁ ସିବିଆଇର ସ୍ୱତନ୍ତ୍ର ବିଚାରପତି ଅରୁଣ ଭରଦ୍ୱାଜ ଏହି ମାମଲାରେ ଇନ୍ଦ୍ରାଣୀ ମୁଖାର୍ଜୀଙ୍କୁ କ୍ଷମା କରିଛନ୍ତି । ଇନ୍ଦ୍ରାଣୀ ମଧ୍ୟ ଏହି ମାମଲାରେ ଅଭିଯୁକ୍ତ ଥିଲେ । ଏବେ ସେ ଅନ୍ୟ ଏକ ମାମଲାରେ ମୁମ୍ବଇ ଜେଲରେ ବନ୍ଦୀ ଅଛନ୍ତି । ଇନ୍ଦ୍ରାଣୀ ଚଳିତ ବର୍ଷ ଫେବୃଆରୀ ୮ ତାରିଖରେ ସରକାରୀ ସାକ୍ଷୀ ହେବାକୁ ଆବେଦନ କରିଥିଲେ । ସେତେବେଳେ ଇନ୍ଦ୍ରାଣୀ ମୁମ୍ବଇର ଭାୟଖଲା ଜେଲରୁ ଭିଡିଓ କନଫ୍ରେନ୍ସିଂ ଜରିଆରେ ପଟିୟାଲା ହାଉସ କୋର୍ଟର ସ୍ୱତନ୍ତ୍ର ସିବିଆଇ ଜଜ ସୁନୀଲ କୁମାର ରାଣାଙ୍କ ଆଗରେ ହାଜର ହୋଇଥିଲେ ଓ ସେ ସରକାରୀ ସାକ୍ଷୀ ହେବାକୁ ଚାହୁଁଛନ୍ତି ବୋଲି କହିଥିଲେ ।
