ଜାମନଗର: ଦୀପାବଳୀ ଅବସରରେ ତିନିଟି ଆଫ୍ରିକୀୟ ହାତୀଙ୍କୁ ଟ୍ୟୁନିସିଆରୁ ଉଦ୍ଧାର କରାଯାଇ ଭାରତର ଜାମନଗର ସ୍ଥିତ ବନତାରାକୁ ଅଣାଯାଇଛି। ଏହି ୨୮ ରୁ ୨୯ ବର୍ଷ ବୟସ୍କ ଆଫ୍ରିକୀୟ ହାତୀ ମଧ୍ୟରେ ଦୁଇଟି ମାଈ ଏବଂ ଗୋଟିଏ ପୁରୁଷ ହାତୀ ଅଛନ୍ତି। ଅନନ୍ତ ମୁକେଶ ଅମ୍ବାନୀଙ୍କ ସ୍ୱପ୍ନର ପ୍ରକଳ୍ପ ବନତାରା ହେଉଛି ବିଶ୍ୱର ଅନ୍ୟତମ ପ୍ରତିଷ୍ଠିତ ବନ୍ୟଜନ୍ତୁ ଉଦ୍ଧାର କେନ୍ଦ୍ର। ବାସ୍ତବରେ ଟ୍ୟୁନିସିଆର ଏକ ଘରୋଇ ପ୍ରାଣୀ ଉଦ୍ୟାନ, ଯାହା ଖରାପ ଆର୍ଥିକ ଅବସ୍ଥା ହେତୁ ହାତୀମାନଙ୍କର ଖାଇବା, ଗୃହ ଏବଂ ପ୍ରାଣୀ ଚିକିତ୍ସା ଆବଶ୍ୟକତା ପୂରଣ କରିବାରେ ଅସମର୍ଥ ହୋଇଥିଲା, ବନତାରା ସହିତ ଯୋଗାଯୋଗ କରିଥିଲା। ଜାତୀୟ ତଥା ଆନ୍ତର୍ଜାତୀୟ ନିୟମ ଅନୁଯାୟୀ ଏକ ଚାର୍ଟାର୍ଡକାର୍ଗୋ ବିମାନରେ ହାତୀମାନଙ୍କୁ ଭାରତ ଅଣାଯାଇଛି। ବନତାରା ବର୍ତ୍ତମାନ ଏହି ଆଫ୍ରିକୀୟ ହାତୀମାନଙ୍କର ନୂତନ ଘର ହେବ।
ଖର୍ଚ୍ଚ କମ କରିବା ପାଇଁ ଟ୍ୟୁନିସିଆର ପ୍ରାଣୀ ଉଦ୍ୟାନ ଫ୍ରିଗୁୟା ପାର୍କ ସମସ୍ତ ତିନୋଟି ଆଫ୍ରିକୀୟ ହାତୀଙ୍କୁ ହଟାଇବାକୁ ନିଷ୍ପତ୍ତି ନେଇଥିଲା। ଅଚତମ୍, କାନି ଏବଂ ମୀନା ନାମକ ଏହି ହାତୀମାନଙ୍କୁ ଜଙ୍ଗଲକୁ ଫେରାଇନେବା ସମ୍ଭବ ନଥିବାରୁ ଏଭଳି ପରିସ୍ଥିତିରେ ସେମାନେ ଏପରି ଏକ ସ୍ଥାନ ଖୋଜୁଥିଲେ ଯେଉଁଠାରେ ହାତୀମାନଙ୍କର ଭଲଭାବେ ଯତ୍ନ ନିଆଯାଇପାରିବ। ବହୁ ଅନୁସନ୍ଧାନ ପରେ ସେମାନଙ୍କୁ ଅଚତମ, କାନି ଏବଂ ମୀନାଙ୍କ ପାଇଁ ବନତାରାରେ ଏକ ନୂତନ ଘର ମିଳିଲା।
ବନତାରାରେ ଆଫ୍ରିକୀୟ ହାତୀମାନଙ୍କର ଡାକ୍ତରୀ ପରୀକ୍ଷାରୁ ଜଣାପଡିଛି ଯେ ଅଚତମ୍, କାନି ଏବଂ ମୀନା ଅନେକ ରୋଗରେ ପୀଡିତ ଅଛନ୍ତି। ସେମାନଙ୍କୁ ଶାରୀରିକ ଏବଂ ମାନସିକ ସହାୟତା ଆବଶ୍ୟକ। କେତେକ କ୍ଷେତ୍ରରେ ଅସ୍ତ୍ରୋପଚାର ମଧ୍ୟ ଆବଶ୍ୟକ ହୋଇପାରେ। ବନତାରାର ପ୍ରାଣୀ ଚିକିତ୍ସକ ଦିନରାତି ସେମାନଙ୍କ ଉପରେ ନଜର ରଖିଛନ୍ତି। ବନତାରା ପକ୍ଷରୁ ଦେଶୀ ଉଦ୍ଭିଦ, ମାଟି ପୋଖରୀ ଏବଂ ଖାଦ୍ୟ ସମୃଦ୍ଧ ବୃହତ ଏନକ୍ଲୋଜର ଗୁଡିକ ସୁଚିନ୍ତିତ ଭାବରେ ଡିଜାଇନ୍ କରାଯାଇଛି। ବନତାରାରେ ସେମାନଙ୍କର ନୂତନ ଘର ଅଚତମ୍, କାନି ଏବଂ ମୀନାଙ୍କୁ ଏଭଳି ଏକ ପରିବେଶ ପ୍ରଦାନ କରିବା ଯାହା ସେମାନଙ୍କ ବନ୍ୟ ବାସସ୍ଥାନ ସଦୃଶ ହୋଇଛି।