ଭୁବନେଶ୍ଵର: ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ବ୍ଲକ ସୀମାନ୍ତ ଛତିଶଗଡ ରାଜ୍ୟର ବକାୱଣ୍ଡ ନିକଟସ୍ଥ ରାଜନଗର ଗ୍ରାମ ନିକଟରେ ପିକଅପ ଓ ଟ୍ରାକ୍ଟର ଧକ୍କାରେ ୩ ଓଡ଼ିଆ ମହିଳା ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ୧୬ ଜଣ ଆହତ ହୋଇଛନ୍ତି। ଆହତଙ୍କୁ ଛତିଶଗଡ ରାଜ୍ୟର ଡିମରାପାଲ ସରକାରୀ ଚିକିତ୍ସାଳୟରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ମୃତକ ମହିଳା ଶ୍ରମିକ ମାନେ ହେଲେ ନବରଙ୍ଗପୁର ଜିଲ୍ଲା କୋଷାଗୁମୁଡା ବ୍ଲକ ଅନ୍ତର୍ଗତ ଏମ.କେରାଗାଁ ଗ୍ରାମର ପୂର୍ଣ୍ଣି ଭତରା ହୋଇଥିବା ବେଳେ ଆଉ ଦୁଇଜଣ ଉକ୍ତ ପଞ୍ଚାୟତ ଅନ୍ତର୍ଗତ ଶିରିଗୁଡ଼ା ଗ୍ରାମର ଧନାଇ ଭତ୍ରା ଓ ଦୟାବତୀ ସରାବୁ।
ସୂଚନା ଅନୁଯାୟୀ, ନବରଙ୍ଗପୁର ସୀମାନ୍ତ କୋଷାଗୁମୁଡା ବ୍ଲକ ର ଏମ.କେରାଗାଁ ଓ ମଦେଗାଁ ପଞ୍ଚାୟତର ଅଧିକାଂଶ ଲୋକ ଛତିଶଗଡ ରାଜ୍ୟର ସୀମାନ୍ତକୁ ଯାଇ କୃଷି କାର୍ଯ୍ୟ କରି ପ୍ରତିଦିନ ଘରକୁ ଫେରିଥାନ୍ତି। ଛତିଶଗଡ ରାଜ୍ୟ ବାକାୱଣ୍ଡ ଥାନା ପଣ୍ଡାନାର ଗୁଜୁରାତି କୃଷି ଫାର୍ମରେ ଶ୍ରମିକ ଭାବେ ଏମ.କେରାଗାଁ ଓ ଶିରାଗୁଡ଼ା ଗ୍ରାମର ୧୯ ଜଣ ଶ୍ରମିକ କାମ କରି ଘରକୁ ପିକଅପ ଯୋଗେ ଫେରୁଥିଲା ବେଳେ ବକାୱଣ୍ଡ ଥାନା ଅନ୍ତର୍ଗତ ରାଜନଗର ନିକଟରେ ଧାନ ଭାର ଆଣୁଥିବା ଟ୍ରାକ୍ଟର ଟ୍ରାଲି ସହ ପିକଅପର ଧକ୍କା ହେଇଥିଲା। ଫଳରେ ଘଟଣା ସ୍ଥଳରୁ ସମସ୍ତ ଆହତ ମହିଳା ଶ୍ରମିକଙ୍କୁ ଡିମରାପାଲ ସରକାରୀ ମେଡିକାଲକୁ ଚିକିତ୍ସା ପାଇଁ ନିଆଯାଇଥିଲା।
ଚିକିତ୍ସାଧୀନ ଅବସ୍ଥାରେ ୩ ମହିଳା ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ୧୬ ଆହତଙ୍କ ବର୍ତ୍ତମାନ ଚିକିତ୍ସା ଚାଲିଛି। ସେମାନଙ୍କ ମଧ୍ୟରୁ ୨ ଜଣ ଗୁରୁତର ରହିଥିବା ସୂଚନା ମିଳିଛି।
ଖବର ପାଇଁ ଡାବୁଗାଁ ବିଧାୟକ ମନୋହର ରନ୍ଧାରୀ ଡିମାରାପାଲା ସ୍ଥିତ ସରକାରୀ ମେଡ଼ିକାଲକୁ ପହଞ୍ଚି ଚିକିତ୍ସାଧୀନ ଥିବା ଗୁରୁତରଙ୍କ ସ୍ୱାସ୍ଥ୍ୟ ଅବସ୍ଥା ବୁଝିବା ସହ ଛତିଶଗଡର ଅଧିକାରୀଙ୍କ ସହ କଥାବାର୍ତ୍ତା ହୋଇ ଉନ୍ନତ ଚିକିତ୍ସା ଯୋଗାଇ ଦେବାକୁ ଅନୁରୋଧ କରିଛନ୍ତି। ଏଥିସହ ଓଡିଶାର ସରକାରଙ୍କୁ ଏଥିରେ ହସ୍ତକ୍ଷେପ କରି ଆହତଙ୍କ ପରିବାରଙ୍କୁ ଚିକିତ୍ସା ପାଇଁ ଆର୍ଥିକ ସହାୟତା ସହ ମୃତକଙ୍କ ପରିବାର ପାଇଁ ଅନୁକମ୍ପା ରାଶି ଘୋଷଣା କରିବାକୁ ଦାବି କରିଛନ୍ତି।
