ମୁମ୍ବାଇ: ମହାରାଷ୍ଟ୍ର ଭାରତୀୟ ଜନତା ପାର୍ଟିର ସାଧାରଣ ସମ୍ପାଦକ ବିନୋଦ ତାୱଡେ ନିର୍ବାଚନର ଗୋଟିଏ ଦିନ ପୂର୍ବରୁ ମୁମ୍ବାଇର ଏକ ହୋଟେଲରେ ଭୋଟରଙ୍କୁ ୫ କୋଟି ଟଙ୍କା ବଣ୍ଟନ କରିଥିବା ଅଭିଯୋଗ ହୋଇଥିଲା। ଏହି ପ୍ରସଙ୍ଗରେ ତାୱଡେ ବର୍ତ୍ତମାନ କଂଗ୍ରେସ ନେତା ରାହୁଲ ଗାନ୍ଧୀ, ମଲ୍ଲିକାର୍ଜୁନ ଖଡଗେ ଏବଂ ସୁପ୍ରିୟା ଶ୍ରୀନେତଙ୍କୁ ନୋଟିସ ପଠାଇ କ୍ଷମା ମାଗିବାକୁ କହିଛନ୍ତି।
ବିନୋଦ ତାୱଡେ କହିଛନ୍ତି ଯେ, “ମହାରାଷ୍ଟ୍ର ବିଧାନସଭାର ଗୋଟିଏ ଦିନ ପୂର୍ବରୁ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ, କଂଗ୍ରେସ ନେତା ରାହୁଲ ଗାନ୍ଧୀ ଏବଂ କଂଗ୍ରେସ ମୁଖପାତ୍ର ସୁପ୍ରିୟା ଶ୍ରୀନେତ ମୋତେ ଏବଂ ଆମ ଦଳକୁ ବଦନାମ କରିବାକୁ ଚେଷ୍ଟା କରିଥିଲେ। କଂଗ୍ରେସ ନେତାମାନେ ମୋ ବିଷୟରେ ମିଥ୍ୟା ପ୍ରଚାର କରୁଛନ୍ତି। ମୋତେ ଜାଣିଶୁଣି ବଦନାମ କରାଯାଇଥିଲା, ତେଣୁ ଆଜି ମୁଁ ସେହି ସମସ୍ତ ନେତାଙ୍କୁ ଏକ ଆଇନଗତ ନୋଟିସ୍ ପଠାଇଛି। ଯଦି ସେମାନେ ସର୍ବସାଧାରଣରେ କ୍ଷମା ମାଗନ୍ତି ନାହିଁ, ତେବେ ମୁଁ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବି।
କଂଗ୍ରେସ ନେତାମାନଙ୍କୁ ଦିଆଯାଇଥିବା ନୋଟିସର ନକଲ ବାଣ୍ଟିବାବେଳେ ବିଜେପି ସାଧାରଣ ସମ୍ପାଦକ ଟ୍ୱିଟରରେ ଲେଖିଛନ୍ତି ଯେ, “କଂଗ୍ରେସର ଏକମାତ୍ର କାମ ହେଉଛି ମିଥ୍ୟା ପ୍ରଚାର କରିବା! ମିଥ୍ୟା ନାଲାସୋପରା ମାମଲାରେ ମୁଁ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ, ରାହୁଲ ଗାନ୍ଧୀ ଏବଂ ଦଳର ମୁଖପାତ୍ର ସୁପ୍ରିୟା ଶ୍ରୀନତଙ୍କୁ ମାନହାନୀ ନୋଟିସ୍ ପଠାଇଛି, କାରଣ ସେମାନେ ଏହି ମାମଲାରେ ମିଥ୍ୟା ପ୍ରଚାର କରି ମୋର ଏବଂ ଭାରତୀୟ ଜନତା ପାର୍ଟିର ଭାବମୂର୍ତ୍ତିକୁ କ୍ଷତି ପହଞ୍ଚାଇଛନ୍ତି।
ସମସ୍ତଙ୍କ ଆଗରେ ସତ୍ୟ ହେଉଛି ଯେ, ନିର୍ବାଚନ ଆୟୋଗ ଏବଂ ପୋଲିସ ଅନୁସନ୍ଧାନରେ ୫ କୋଟି ଟଙ୍କା ଜବତ କରାଯାଇ ନାହିଁ। ଏହି ପ୍ରସଙ୍ଗ କଂଗ୍ରେସର ନିମ୍ନ ସ୍ତରର ରାଜନୀତିର ସମ୍ପୂର୍ଣ୍ଣ ପ୍ରମାଣ।
ନଭେମ୍ବର ୨୦ ତାରିଖ ୨୦୨୪ରେ ମହାରାଷ୍ଟ୍ରରେ ବିଧାନସଭା ନିର୍ବାଚନ ପାଇଁ ଭୋଟ୍ ଅନୁଷ୍ଠିତ ହୋଇଥିଲା, ମାତ୍ର ଏହାର ଗୋଟିଏ ଦିନ ପୂର୍ବରୁ ଭାରତୀୟ ଜନତା ପାର୍ଟିର ସାଧାରଣ ସମ୍ପାଦକ ବିନୋଦ ତାୱଡେଙ୍କ ବିରୋଧରେ ଭୋଟ୍ ବଦଳରେ ଟଙ୍କା ବାଣ୍ଟିବା ନେଇ ଗୁରୁତର ଅଭିଯୋଗ ହୋଇଥିଲା। ଭୋଟରଙ୍କ ମଧ୍ୟରେ ବାଣ୍ଟିବା ପାଇଁ ସେ ୫ କୋଟି ଟଙ୍କା ନେଇ ମୁମ୍ବାଇର ଏକ ହୋଟେଲକୁ ଯାଇଥିବା ଅଭିଯୋଗ ହୋଇଥିଲା। ବହୁଜନ ବିକାଶ ଅଘାଡି କର୍ମୀମାନେ ତାଙ୍କୁ ସେହି ହୋଟେଲରେ ଘେରି ରହିଥିଲେ। ତେବେ ଏହି ଅଭିଯୋଗକୁ ପ୍ରତ୍ୟାଖ୍ୟାନ କରି ବିନୋଦ ତାୱଡେ କହିଥିଲେ ଯେ, ନିର୍ବାଚନ ସହ ଜଡିତ ନିୟମ ସେ ଭଲଭାବେ ଜାଣିଛନ୍ତି ଏବଂ ରାଜନୈତିକ ପ୍ରତିଦ୍ୱନ୍ଦ୍ୱୀଙ୍କ ହୋଟେଲରେ ସେ ଏପରି କରିବା ମୂର୍ଖ ନୁହଁନ୍ତି।
ନିର୍ବାଚନ ବାତାବରଣ ମଧ୍ୟରେ ଏହି ନଗଦ ଟଙ୍କା କାରବାର ଯୋଗୁଁ ରାଜନୈତିକ ମହଲରେ ଅନେକ ଉତ୍ତେଜନା ଦେଖାଦେଇଥିଲା। ନିର୍ବାଚନ ଆୟୋଗ ମଧ୍ୟ ଏ ବାବଦରେ ଏଫଆଇଆର ପଞ୍ଜିକରଣ କରିଛନ୍ତି। କଂଗ୍ରେସ ଏବଂ ଅନ୍ୟ ବିରୋଧୀ ଦଳ ମହାରାଷ୍ଟ୍ରରୁ ଦିଲ୍ଲୀ ପର୍ଯ୍ୟନ୍ତ ଭାରତୀୟ ଜନତା ପାର୍ଟି ଉପରେ ଆକ୍ରମଣ କରିଥିଲେ।