ନୂଆଦିଲ୍ଲୀ: ପ୍ରଧାନମନ୍ତ୍ରୀଙ୍କ ସଂଗ୍ରହାଳୟ ଏବଂ ଲାଇବ୍ରେରୀ (PMML) ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ ନେହେରୁଙ୍କ ଦ୍ୱାରା ଲିଖିତ ବ୍ୟକ୍ତିଗତ ଚିଠି ଫେରସ୍ତ ପାଇଁ ଆନୁଷ୍ଠାନିକ ଭାବେ ଅନୁରୋଧ କରିଛି। ଏହି ଚିଠିଗୁଡିକ ସୋନିଆ ଗାନ୍ଧୀଙ୍କୁ ୨୦୦୮ ରେ UPA ଶାସନ ସମୟରେ ପଠାଯାଇଥିଲା।
ଡିସେମ୍ବର ୧୦ ତାରିଖ ଦିନ ଏକ ଚିଠିରେ PMML ସଦସ୍ୟ ରିଜୱାନ କାଦ୍ରି କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ସୋନିଆ ଗାନ୍ଧୀଙ୍କ ମୂଳ ଚିଠିକୁ ଫେରାଇ ଆଣିବାକୁ କିମ୍ବା ଫଟୋଗ୍ରାଫି କିମ୍ବା ଡିଜିଟାଲ କପି ପ୍ରଦାନ କରିବାକୁ ଅନୁରୋଧ କରିଛନ୍ତି। ଚଳିତ ବର୍ଷ ସେପ୍ଟେମ୍ବରରେ ମଧ୍ୟ PMML ସୋନିଆ ଗାନ୍ଧୀଙ୍କୁ ଚିଠି ଫେରସ୍ତ କରିବାକୁ ଅନୁରୋଧ କରିଥିଲା।
ଜବାହରଲାଲ ନେହେରୁଙ୍କ ଦ୍ୱାରା ଲିଖିତ ଏହି ପତ୍ରଗୁଡ଼ିକୁ ଐତିହାସିକ ବିବେଚନା କରାଯାଏ। ୧୯୭୧ ମସିହାରେ ଜବାହରଲାଲ ନେହେରୁ ମେମୋରିଆଲ ଦ୍ୱାରା ଏଗୁଡିକ ନେହେରୁ ମେମୋରିଆଲ ମ୍ୟୁଜିୟମ ଏବଂ ଲାଇବ୍ରେରୀ (ବର୍ତ୍ତମାନ PMML) କୁ ହସ୍ତାନ୍ତର କରାଯାଇଥିଲା। ତେବେ ୨୦୦୮ରେ ସେମାନେ ୫୧ ଟି ବାକ୍ସରେ ପ୍ୟାକ୍ କରି ସୋନିଆ ଗାନ୍ଧୀଙ୍କୁ ପଠାଯାଇଥିବା ଜଣାଯାଇଛି।
ଏହି ସଂଗ୍ରହାଳୟରେ ନେହେରୁ ଏବଂ ଏଡୱିନା ମାଉଣ୍ଟବ୍ୟାଟେନ୍, ଆଲବର୍ଟ ଆଇନଷ୍ଟାଇନ, ଜୟପ୍ରକାଶ ନାରାୟଣ, ପଦ୍ମଜା ନାଇଡୁ, ବିଜୟ ଲକ୍ଷ୍ମୀ ପଣ୍ଡିତ, ଅରୁଣା ଆସଫ ଅଲି, ବାବୁ ଜଗଜୀବନ ରାମ ଏବଂ ଗୋବିନ୍ଦ ବଲ୍ଲବ ପନ୍ତଙ୍କ ପରି ବିଶିଷ୍ଟ ବ୍ୟକ୍ତିଙ୍କ ଚିଠି ରହିଛି।
ଚିଠିରେ ଏହା କୁହାଯାଇଛି:
PMML ଏହାର ଚିଠିରେ ଲେଖିଛି ଯେ ଏହି ଚିଠିଗୁଡ଼ିକ ଭାରତୀୟ ଇତିହାସର ଏକ ଗୁରୁତ୍ୱପୂର୍ଣ୍ଣ ସମୟ ବିଷୟରେ ଅମୂଲ୍ୟ ସୂଚନା ପ୍ରଦାନ କରିଥାଏ। ଏହି କାରଣରୁ, PMML ସେମାନଙ୍କୁ ସଂଗଠନର ଅଭିଲେଖାଗାରକୁ ପଠାଇବାକୁ ଦାବି କରିଛି।
ଚିଠିରେ ଆହୁରି ଲେଖା ଅଛି ଯେ, “ଆମେ ବୁଝିପାରୁଛୁ ଯେ ଏହି ଦଲିଲଗୁଡ଼ିକ ‘ନେହେରୁ ପରିବାର’ ପାଇଁ ବ୍ୟକ୍ତିଗତ ମହତ୍ତ୍ଵ ରଖେ। PMML ବିଶ୍ୱାସ କରେ ଯେ ଏହି ଐତିହାସିକ ସାମଗ୍ରୀ ପଣ୍ଡିତ ଏବଂ ଅନୁସନ୍ଧାନକାରୀଙ୍କ ପାଇଁ ବହୁତ ଲାଭଦାୟକ ହେବ।