କର୍ଣ୍ଣାଟକ ରାଜନୈତିକ ଯୁଦ୍ଧକୁ ନେଇ ଏବେ ଭାରତୀୟ ରାଜନୀତି ପୂରା ସରଗରମ । ଏହି ମାମଲା ଏବେ ସୁପ୍ରିମ୍କୋର୍ଟଙ୍କ ବିଚରାଧୀନ ରହିଛି । ଏହି ମାମଲାକୁ ନେଇ ପଶ୍ଚିମ ବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରତିକ୍ରିୟା ରଖିଛନ୍ତି । ମମତା ବିଜେପିକୁ ଟାର୍ଗେଟ କରିବା ସହ ଆଗାମୀ ସମୟରେ ମଧ୍ୟପ୍ରଦେଶ ଓ ରାଜସ୍ଥାନ ପାଇଁ ବିପଦ ସୃଷ୍ଟି ହେବ ବୋଲି କହିଛନ୍ତି । ବାନାର୍ଜୀ କହିଛନ୍ତି ଯେ, ‘ମିଡ଼ିଆ ଦ୍ବାରା ଖବର ମିଳିଲା ଯେ, କଂଗ୍ରେସ ବିଧାୟକଙ୍କୁ ବନ୍ଦ କରିଦିଆଯାଇଛି । ଭାରତୀୟ ଜନତା ପାର୍ଟି ବିଧାୟକଙ୍କୁ କିଣାବିକା କରୁଛନ୍ତି । କିଛିଦିନ ପୂର୍ବରୁ ବିଜେପି ଲୋକସଭା ନିର୍ବାଚନ ଜିତିଛି । ଦେଶର ଦେଖାରଖା କରିବା ଦରକାର, କିନ୍ତୁ ବିଜେପି ସ୍ବାର୍ଥପର ହୋଇ ଏବେ ଖରାପ ରାଜନୀତି କରୁଛି । ଆଜି କିଏ ସତ୍ତାରେ ଅଛି, କାଲି କିଏ ସତ୍ତାରେ । ଏବେ ସଂକଟର ସମୟ । ଆମେ ସମସ୍ତ ଆଞ୍ଚଳିକ ଦଳର ସମର୍ଥନ କରୁଛୁ । କର୍ଣ୍ଣାଟକ ପରେ ବିଜେପି ମଧ୍ୟପ୍ରଦେଶ ଓ ରାଜସ୍ଥାନରେ ଏପରି କନ୍ଦଳ ସୃଷ୍ଟି କରିବ । ଏପରି ସମୟରେ ସମସ୍ତ ଆଞ୍ଚଳିକ ଦଳ ଏକଜୁଟ୍ ରହିବା ଦରକାର ବୋଲି କହିଛନ୍ତି ମମତା । ଏପରିକି ଗଣମାଧ୍ୟମ ମଧ୍ୟ ଏହାର ବିରୋଧ କରିବା ସହିତ ଏକତ୍ରିତ ହେବା ଜରୁରୀ ହେବା ପାଇଁ କହିଛନ୍ତି ମମତା । କର୍ଣ୍ଣାଟକର ରାଜନୈତିକ ସଂକଟ ଏବେ ଖୁବ୍ ଚର୍ଚ୍ଚାରେ । କଂଗ୍ରେସ- ଜେଡିଏସ୍ର ୧୩ ବିଧାୟକ ନିଜ ପଦବୀରୁ ଇସ୍ତଫା ଦେଇଥିବାବେଳେ ବିଜେପି ସଂଖ୍ୟା ଗରିଷ୍ଠତା ନେଇ ଦାବି ଜଣାଇଛି । କର୍ଣ୍ଣାଟକର ରାଜନୈତିକ ସମସ୍ୟା ଏବେ ସୁପ୍ରିମ୍କୋର୍ଟଙ୍କ ବିଚାରଧୀନ ରହିଛି ।