ଭୁବନେଶ୍ଵର: ମଣ୍ଡିର ଧାର୍ଯ୍ୟ ଲକ୍ଷ୍ୟ ବୃଦ୍ଧି ଦାବୀରେ ଚାଷୀମାନେ ମାଲକାନଗିରି ଜିଲ୍ଲାର ନାୟକଗୁଡାସ୍ଥିତ ୩୨୬ ଜାତୀୟ ରାଜପଥକୁ ଆଜି ଅବରୋଧ କରାଯାଇଥିଲା। ମାଥିଲି ବ୍ଲକ ଅନ୍ତର୍ଗତ ନାୟକଗୁଡା ମଣ୍ଡିରେ ୧ ହଜାର କୁଇଣ୍ଟାଲ ଧାନ କ୍ରୟ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିବା ବେଳେ ଏହାକୁ ବୃଦ୍ଧି କରି ୨ ହଜାର କୁଇଣ୍ଟାଲ କରିବାକୁ ଚାଷୀମାନେ ଦାବୀ କରି ଏହି ରାସ୍ତାରୋକ କରିଥିଲେ।
ଏହା ଫଳରେ ପ୍ରାୟ ୩ ଘଣ୍ଟା ଧରି ଜୟପୁର ରୁ ମାଲକାନଗିରି ମଧ୍ୟରେ ଯାନବାହନ ଚଳାଚଳ ବନ୍ଦ ରହିଥିଲା। ପରେ ଉପ ଜିଲ୍ଲାପାଳ ଦୁର୍ଯ୍ୟୋଧନ ଭୋଇଙ୍କ ନେତୃତ୍ୱରେ ମାଲକାନଗିରି ଅତିରିକ୍ତ ଯୋଗାଣ ଅଧିକାରୀ, ମାଲକାନଗିରି ଓ ମାଥିଲି ଥାନା ଭାରପ୍ରାପ୍ତ ଅଧିକାରୀ ପ୍ରମୁଖ ଚାଷୀଙ୍କୁ ବୁଝାସୁଝା କରିବା ସହ ବଳକା ଧାନ କ୍ରୟ ପାଇଁ ସରକାରଙ୍କୁ ପ୍ରସ୍ତାବ ଦିଆଯିବ ବୋଲି ପ୍ରତିଶ୍ରୁତି ଦେଇଥିଲେ। ଏହାପରେ ଯାନବାହନ ଚଳାଚଳ ସ୍ବାଭାବିକ ହୋଇଛି।
