ସଂକଟରେ ଏବେ ଜାତୀୟ କଂଗ୍ରେସ ଦଳ । କିଛିଦିନ ହେଲାଣି ନେତୃତ୍ବ ବିହୀନ କଂଗ୍ରେସରେ ନୂଆ ଅଧ୍ୟକ୍ଷ ପାଇ ଦାବି ହେଉଛି । କଂଗ୍ରେସର ପୂର୍ବ ମହାସଚିବ ଜ୍ୟୋତିରାଦିତ୍ୟ ସିନ୍ଧି ଗୁରୁବାର କହିଛନ୍ତି ଯେ, କଂଗ୍ରେସ ପାଇଁ ଏହା ଏକ କଠିନ ସମୟ । ଆମେ ସମୟ ନଷ୍ଟ ନ କରି ନୂଆ ଅଧ୍ୟକ୍ଷ ଖୋଜିବା ଦରକାର । ଏବେ କଂଗ୍ରେସ ଭିତରେ ବ୍ୟକ୍ତିଗତ ଏଜେଣ୍ଡା ର ସମୟ ନୁହେଁ । ସାମୂହିକ ନିର୍ଣ୍ଣୟ ନେବା ଜରୁରୀ । କଂଗ୍ରେସ ଅଧ୍ୟକ୍ଷ ପଦରୁ ରାହୁଲ୍ ଗାନ୍ଧି ଇସ୍ତଫା ଦେବାର ସାତ ସପ୍ତାହ ହୋଇଗଲାଣି । ଏବେ ନିର୍ଣ୍ଣୟ ନେବାର ସମୟ ଉପନୀତ । ରାହୁଲ୍ ଗାନ୍ଧି କଂଗ୍ରେସ ଅଧ୍ୟକ୍ଷ ପଦରୁ ଇସ୍ତଫା ଦେବା ପରେ ପରେ ଜ୍ୟୋତିରାଦିତ୍ୟ ମଧ୍ୟ ନିଜ ପଦବୀରୁ ଇସ୍ତଫା ଦେଇଥିଲେ । ଭୋପାଳର କଂଗ୍ରେସ ମୁଖ୍ୟାଳୟ ବାହାରେ କଂଗ୍ରେସ କାର୍ଯ୍ୟକର୍ତ୍ତା ସିନ୍ଧିଆଙ୍କୁ କଂଗ୍ରେସର ଅଧ୍ୟକ୍ଷ କରିବା ନେଇ ଦାବି କରିବା ସହିତ ପୋଷ୍ଟର ମଧ୍ୟ ଲଗାଯାଇଥିଲା । ଏବେ କର୍ଣ୍ଣାଟକ ଓ ଗୋଆରେ ମଧ୍ୟ କଂଗ୍ରେସ ପାଇଁ ବେଶ୍ ସଂକଟର ସମୟ ଆସିଛି । ତେଣୁ ଏପରି ସମୟରେ କଂଗ୍ରେସର ନୂତନ ଅଧ୍ୟକ୍ଷ ଚୟନ କରାଯିବ ବିଶେଷ ଗୁରୁତ୍ବପୂର୍ଣ୍ଣ ।
