ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଇଁ ଆଉ କିଛି ଦିନ ବାକି ଅଛି। ଫେବୃଆରୀ ୫ ତାରିଖରେ ଦେଶର ରାଜଧାନୀରେ ମତଦାନ ହେବ ଏବଂ ଫଳାଫଳ ଫେବୃଆରୀ ୮ ତାରିଖରେ ଘୋଷଣା କରାଯିବ। ଏହାପୂର୍ବରୁ ଦୁର୍ନୀତି ବିରୋଧରେ ସାମାଜିକ କାର୍ଯ୍ୟକର୍ତ୍ତା ତଥା ପ୍ରଚାରକ ଆନ୍ନା ହାଜାରେ ଏକ ବଡ଼ ବିବୃତ୍ତି ଦେଇଛନ୍ତି। ସେ ଶନିବାର ଦିନ ଦିଲ୍ଲୀ ଭୋଟରଙ୍କୁ ଅନୁରୋଧ କରିଛନ୍ତି ଯେ, ସ୍ୱଚ୍ଛ ଚିନ୍ତାଧାରା ଓ ଉତ୍ତମ ଚରିତ୍ରର ବ୍ୟକ୍ତି, ଯିଏ ଦେଶ ପାଇଁ ବଳିଦାନ ଦେଇ ପାରିବେ ଏବଂ ଅପମାନକୁ ସହ୍ୟ କରିପାରିବେ, ତାଙ୍କୁ ଭୋଟ ଦିଅନ୍ତୁ।
ଆନ୍ନା ହାଜାରେ ଏକ ଭିଡିଓ ସେୟାର କରି ଖରପା ଲୋକଙ୍କୁ ଭୋଟ୍ ନଦେବାକୁ ଅନୁରୋଧ କରିଛନ୍ତି। କାରଣ ଏହା ଦେଶକୁ ଧ୍ୱଂସ କରିଦେବ। ସେ କହିଛନ୍ତି ଯେ, “ଦିଲ୍ଲୀରେ ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ମୁଁ ଭୋଟରମାନଙ୍କୁ ଅନୁରୋଧ କରୁଛି ଯେ, ”ଏଭଳି ନେତାଙ୍କୁ ଭୋଟ ଦିଅନ୍ତୁ, ଯିଏ ସ୍ୱଚ୍ଛ ଏବଂ ଉତ୍ତମ ଚରିତ୍ରର ହୋଇଥିବ, ସତ୍ୟ ପଥରେ ଚାଲୁଥିବ, ଦେଶ ପାଇଁ ବଳିଦାନ ଦେଇପାରିବ ଏବଂ ଅପମାନକୁ ସହ୍ୟ କରିପାରିବ।”
ଉଲ୍ଲେଖ ଯୋଗ୍ୟ ଯେ, ଆନ୍ନା ହଜାରେ ଦିଲ୍ଲୀରେ ଦୁର୍ନୀତି ବିରୋଧୀ ଆନ୍ଦୋଳନ ଆରମ୍ଭ କରିଥିଲେ। ଏହି ଆନ୍ଦୋଳନ ପରେ ଅରବିନ୍ଦ କେଜ୍ରିୱାଲ ୨୦୧୨ ରେ ଆମ୍ ଆଦମୀ ପାର୍ଟି ଗଠନ କରିଥିଲେ, ଯାହା ୨୦୧୩ ରେ କ୍ଷମତାକୁ ଆସିଥିଲା। ତଥାପି ଆନ୍ନା ହଜାରେ କେଜ୍ରିୱାଲଙ୍କ ରାଜନୀତିରେ ପ୍ରବେଶକୁ ଗ୍ରହଣ କରିନଥିଲେ।
