ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ଶେଷ ହେବା ପରେ ସମସ୍ତ ଏକଜିଟ୍ ପୋଲ ସାମ୍ନାକୁ ଆସିଛି। ଏହି ଏକଜିଟ୍ ପୋଲ ପରେ ରାଜନୈତିକ ନେତାମାନଙ୍କ ପ୍ରତିକ୍ରିୟା କ୍ରମାଗତ ଭାବେ ଆସୁଛି। ଏହି ପ୍ରସଙ୍ଗରେ ଆମ୍ ଆଦମୀ ପାର୍ଟିର ବିଦ୍ରୋହୀ ରାଜ୍ୟସଭା ସାଂସଦ ସ୍ୱାତୀ ମାଲିୱାଲ ଏକ ବଡ଼ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ, ଦିଲ୍ଲୀର ଲୋକମାନେ ବହୁତ ବୁଦ୍ଧିମାନ। ସେ ଭାବିବା ପରେ ହିଁ ଭୋଟ୍ ଦେଇଛନ୍ତି। ଏକଜିଟ୍ ପୋଲ୍ ବେଳେବେଳେ ଠିକ୍, ବେଳେବେଳେ ଭୁଲ୍। ଏହା ଏକ ଅତି କଡ଼ା ପ୍ରତିଯୋଗିତା ଅଟେ।
ସ୍ଵାତୀ ମାଲିୱାଲ ଆହୁରି କହିଛନ୍ତି ଯେ, “ମୁଁ ଆଶା କରୁଛି ଆଗାମୀ ସରକାର ଦିଲ୍ଲୀର ଲୋକଙ୍କ ପାଇଁ କାମ କରିବେ। ଆଗାମୀ ପାଞ୍ଚ ବର୍ଷ ପାଇଁ ରାସ୍ତା, ଜଳ, ଯମୁନା ଏବଂ ବାୟୁ ପ୍ରଦୂଷଣ ଭଳି ସମସ୍ୟା ଉପରେ କାର୍ଯ୍ୟ କରାଯାଉ। କାହାର ସରକାର ଗଠନ ହେଉନା କାହିଁକି, ଲୋକଙ୍କ ପାଇଁ କାମ କରିବା ଉଚିତ୍। ଯେଉଁମାନେ ଦିଲ୍ଲୀକୁ ପ୍ୟାରିସ କରିବା ପାଇଁ ପ୍ରତିଶ୍ରୁତି ଦେଇଥିଲେ, ସେମାନେ ଏହାକୁ ସୁଦାନ ଭଳି କରିଛନ୍ତି।”
ପ୍ରକାଶ ଯୋଗ୍ୟ ଯେ, ଦିଲ୍ଲୀ ବିଧାନସଭା ନିର୍ବାଚନରେ ଭୋଟ୍ ଦେବା ପରେ ଗଣନା ଉପରେ ନଜର ରହିଛି। ନିର୍ବାଚନ ସମ୍ପର୍କରେ ଏକଜିଟ୍ ପୋଲ୍ ସାମ୍ନାକୁ ଆସିଛି। ଅଧିକାଂଶ ଏକଜିଟ୍ ପୋଲ୍ ରେ ବିଜେପି ସଂପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରୁଥିବା ଜଣାପଡିଛି। ତେବେ ଦିଲ୍ଲୀରେ କାହାର ସରକାର ଗଠନ ହେବ ତାହା କେବଳ ଫେବୃଆରୀ ୮ ତାରିଖରେ ଜଣାପଡିବ ଯେତେବେଳେ ଭୋଟ୍ ଗଣାଯିବ ଏବଂ ଫଳାଫଳ ଆସିବ। ଦିଲ୍ଲୀରେ ସରକାର ଗଠନ ପାଇଁ ସଂଖ୍ୟାଗରିଷ୍ଠତା ହେଉଛି ୩୬। ଦିଲ୍ଲୀ ବିଧାନସଭା ନିର୍ବାଚନରେ ମୋଟ ୬୯୯ ପ୍ରାର୍ଥୀ ନିଜ ଭାଗ୍ୟ ପରୀକ୍ଷା କରୁଛନ୍ତି, ସେଥିମଧ୍ୟରୁ ୬୦୩ ଜଣ ପୁରୁଷ ଏବଂ ୯୬ ଜଣ ମହିଳା ପ୍ରାର୍ଥୀ ଅଟନ୍ତି।