ଭୁବନେଶ୍ଵର: ଆଜି ଭୁବନେଶ୍ଵରରେ ଓଡିଶା ଯୁବ ସାଂସ୍କୃତିକ ସଂସଦ ପକ୍ଷରୁ ନାରୀ ହିଂସା ବିରୋଧରେ ଏକ ବିଶାଳ ଶୋଭାଯାତ୍ରା ଅନୁଷ୍ଠିତ ହୋଇଯାଇଛି। ଉକ୍ତ ଶୋଭାଯାତ୍ରାରେ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟ ଓ କିଟ ବିଶ୍ୱବିଦ୍ୟାଳୟର ଶତାଧିକ ଛାତ୍ରଛାତ୍ରୀ, ମହିଳା ସ୍ଵୟଂ ସହାୟକ ଗୋଷ୍ଠୀର ଶତାଧିକ ମହିଳା ସାମିଲ ହୋଇଥିବା ବେଳେ ଓଲିଉଡ ଅଭିନେତ୍ରୀ ଅର୍ଚ୍ଚିତା ସାହୁ ମଧ୍ୟ ଅଂଶଗ୍ରହଣ କରିଥିଲେ। ଉକ୍ତ ଶୋଭାଯାତ୍ରା ରାମମନ୍ଦିରରୁ ଆରମ୍ଭ ହୋଇ ବୁଦ୍ଧ ମନ୍ଦିରଠାରେ ଶେଷ ହୋଇଥିଲା।
ଓଡିଶା ଯୁବ ସାଂସ୍କୃତିକ ସଂସଦର ପ୍ରତିଷ୍ଠାତା ସଭାପତି ମାନସୀ ପ୍ରଧାନ ଏହାର ନେତୃତ୍ଵ ନେଇଥିଲେ। ଏହି ଅବସରରେ ମହିଳାମାନଙ୍କୁ ସମାଜରେ ଯେଉଁଭଳି ଅତ୍ୟାଚାର, ହିଂସା ହେଉଛି, ତାହାର ସୁରକ୍ଷା ପାଇଁ ଆମେ ସର୍ବଦା ଚେଷ୍ଟା କରିବୁ ବୋଲି ଶ୍ରୀମତୀ ପ୍ରଧାନ କହିଥିଲେ। ଏହି ସମୟରେ ଶିଶୁ କନ୍ୟାଠାରୁ ବୃଦ୍ଧା ପର୍ଯ୍ୟନ୍ତ ସମସ୍ତଙ୍କ ସୁରକ୍ଷା ପାଇଁ ଓଡିଶା ଯୁବ ସାଂସ୍କୃତିକ ସଂସଦ (ଓୱାଇଏସଏସ) ୧୯୮୭ ମସିହାରୁ ଏପର୍ଯ୍ୟନ୍ତ କାର୍ଯ୍ୟ କରିଆସୁଛି ବୋଲି ପ୍ରତିଷ୍ଠାତା ସଭାପତି କହିଥିଲେ। ବର୍ତ୍ତମାନ ପରିସ୍ଥିତିରେ ନାରୀମାନଙ୍କ ପ୍ରତି ହେଉଥିବା ହିଂସା ଉପରେ ଉଲ୍ଲେଖ କରି ଶ୍ରୀମତୀ ପ୍ରଧାନ କହିଥିଲେ ଯେ, ”ଯାହାର କେହି ନାହିଁ, ତାହା ପାଇଁ ଓୱାଇଏସଏସ ଅଛି।”
ଉଲ୍ଲେଖ ଯୋଗ୍ୟ ଯେ, ଶୋଭାଯାତ୍ରା ପରେ ବୁଦ୍ଧ ମନ୍ଦିର ଅଡିଟୋରିୟମ ହଲରେ ସାଂସ୍କୃତିକ କାର୍ଯ୍ୟକ୍ରମ ଆରମ୍ଭ ହୋଇଥିଲା। ଯେଉଁଥିରେ ମିଳିତ ଜାତିସଂଘର ଅଧିକାରିଣୀ ବୈଶାଳୀ ମହାନ୍ତି ଓଡିଶୀ ନୃତ୍ୟ ପରିବେଷଣ କରିଥିଲେ। ବୈଶାଳୀ କେବଳ ମିଳିତ ଜାତିସଂଘର ଅଧିକାରିଣୀ ଭାବେ କାର୍ଯ୍ୟ କରି ଓଡିଶା ପାଇଁ ଗୌରବ ଆଣିନାହାନ୍ତି, ସେ ଓଡିଶା ସଂସ୍କୃତିକୁ ମଧ୍ୟ ବିଶ୍ଵ ଦରବାରରେ ପହଞ୍ଚାଇଛନ୍ତି। ସେ ବିଦେଶର ରୋମ, ପ୍ୟାରିସ ଭଳି ସହରରେ ଓଡଶୀ ନୃତ୍ୟର ପ୍ରଚାର ପ୍ରସାର କରୁଛନ୍ତି।
ତେବେ ଆଜିର ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ପୂର୍ବତନ ସାଂସଦ ଡାଃ. ପ୍ରସନ୍ନ ପାଟ୍ଟଶାଣୀ ଭାବେ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଅଭିନେତ୍ରୀ ଅର୍ଚ୍ଚିତା ସାହୁ, ବେଦାନ୍ତ କମ୍ପାନୀର ସିଓଓ ନିତିନ କୁମାର ତିୱାରୀ, ସୋସିଆଲ ୱେଲଫେୟାର ବୋର୍ଡର ପୂର୍ବତନ ଅଧ୍ୟକ୍ଷା ନିବେଦିତା ନାୟକ, କବି ତଥା ଲେଖିକା ବିଜୟଲକ୍ଷ୍ମୀ ପଟ୍ଟନାୟକ ଯୋଗ ଦେଇଥିଲେ। ଏହି ସମୟରେ ନାରୀ ହିଂସା ଏବଂ ଏହାକୁ ସମାଜରୁ ମୂଳୋତ୍ପାଟନ କରିବା ପାଇଁ ଉପସ୍ଥିତ ଛାତ୍ରଛାତ୍ରୀଙ୍କ ସହିତ ଅତିଥିମାନେ ବାର୍ତ୍ତାଳାପ କରିଥିଲେ। ଏହାପରେ ଓୱାଇଏସଏସ ର ପ୍ରତିଷ୍ଠାତା ସଭାପତି ମାନସୀ ପ୍ରଧାନଙ୍କ ବ୍ୟକ୍ତିଗତ ୱେବସାଇଟର ଶୁଭାରମ୍ଭ ହୋଇଥିଲା।
ଉକ୍ତ କାର୍ଯ୍ୟକ୍ରମରେ ଅନେକ ଛାତ୍ରଛାତ୍ରୀ, ମହିଳାଙ୍କୁ ସମ୍ମାନିତ କରାଯାଇଥିବା ବେଳେ ଚାରୁଲତା ମହାନ୍ତି, ବିଷ୍ଣୁପ୍ରିୟା ସାମନ୍ତରାୟ, ସୁଶ୍ରୀ ସୋନାଲି ନାୟକ ସହଯୋଗ କରିଥିଲେ।
ସଭା ଶେଷରେ ଜାନକୀ ମଲ୍ଲିକ ଧନ୍ୟବାଦ ଅର୍ପଣ କରିଥିଲେ।