ଆଜି କ୍ରିକେଟର ମକ୍କା କୁହାଯାଉଥିବା ଲର୍ଡ୍ସ ଠାରେ ୨୦୧୯ ବିଶ୍ଵକପ ଫାଇନାଲ ମ୍ୟାଚ ଖେଳାଯାଉଛି। ଏହି ମ୍ୟାଚ ଘରୋଇ ଇଂଲଣ୍ଡ ଦଳ ଏବଂ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଉଛି। ଏହି ଦୁଇ ଦଳ ମଧ୍ୟରୁ ଯେଉଁ ଦଳ ବିଜୟ ଲାଭ କରିବ, ସେହି ଦଳ ହିଁ ପ୍ରଥମ ଥର ପାଇଁ ବିଶ୍ଵ ଚମ୍ପିୟାନ ହେବାରେ ଗୌରବ ଲାଭ କରିବ।
ନ୍ୟୁଜିଲାଣ୍ଡ ଅଧିନାୟକ ଟସ ଜିଣି ପ୍ରଥମେ ବ୍ୟାଟିଂ କରିବାରେ ନିଷ୍ପତି ନେଇଥିଲେ। କିନ୍ତୁ ନ୍ୟୁଜିଲାଣ୍ଡ ନିର୍ଦ୍ଧାରିତ ଓଭରରେ ୮ଟି ମୂଲ୍ୟବାନ ୱିକେଟ ହରାଇ ସଂଗ୍ରହ କରିଛି ୨୪୧ ରନ। ତେଣୁ ଇଂଲଣ୍ଡ ପାଇଁ ୨୪୨ରନର ଲକ୍ଷ୍ୟ ପ୍ରଦାନ କରିଛି ୱିଲିଯମସନଙ୍କ ଦଳ। ଯଦିବା ଏହା ଏକ ଛୋଟ ଲକ୍ଷ୍ୟ ତଥାପି ଇଂଲଣ୍ଡ ଦଳ ଏହି ମ୍ୟାଚକୁ ଜିତିବା ପାଇଁ ସଂପୂର୍ଣ୍ଣ ଶକ୍ତି ଲଗାଇବ। କାରଣ ନ୍ୟୁଜିଲାଣ୍ଡ ଦଳର ବୋଲିଂ ବିଭାଗ ବହୁତ ଉଚ୍ଚକୋଟିର। ସେମିଫାଇନାଲ ମ୍ୟାଚରେ ଏହି ଦଳ ଶକ୍ତିଶାଳୀ ଭାରତକୁ ୨୨୧ରନରେ ସୀମିତ ରଖି ଭାରତ ପାଇଁ ବିପର୍ଯ୍ୟୟ ସୃଷ୍ଟି କରିଥିଲା। ଏହି ମ୍ୟାଚରେ ନ୍ୟୁଜିଲାଣ୍ଡ ୧୮ ରନରେ ବିଜୟ ଲାଭ କରି ଫାଇନାଲକୁ ଉନ୍ନୀତ ହୋଇଥିଲା।
ଆଜିର ଏହି ଫାଇନାଲ ମ୍ୟାଚରେ ଇଂଲଣ୍ଡ ବିପକ୍ଷରେ ନ୍ୟୁଜିଲାଣ୍ଡ ପକ୍ଷରୁ ହେନରୀ ନିକୋଲ୍ସ ସର୍ବାଧିକ ୭୭ ବଲରେ ୫୫ ରନ ପାଳି ଖେଳିଥିଲେ। ସେହିପରି ଅଧିନାୟକ ୱିଲିୟମସନ ୫୩ ବଲରେ ୩୦ରନ, ଗୁପ୍ଟିଲ ୧୮ ବଲରେ ୧୯ ରନ, ରସ ଟେଲର ୩୧ ବଲରେ ୧୫ରନ, ଲାଥମ ୫୬ ବଲରେ ୪୭ ରନ, ନୀଶାମ ୨୫ବଲ ରେ ୧୯ରନର ପାଳି ଖେଳିଥିଲେ। ତେବେ ଇଂଲଣ୍ଡ ପକ୍ଷରୁ ୱୋକସ ୯ ଓଭରରେ ୩୭ ରନ ଦେଇ ତିନୋଟି ୱିକେଟ, ପ୍ଲଙ୍କେଟ ୧୦ ଓଭରରେ ୪୨ ରନ ଦେଇ ତିନୋଟି ୱିକେଟ ଅକ୍ତିଆର କରିଥିଲେ।