ନୂଆଦିଲ୍ଲୀ: ପଞ୍ଚଦଶ ଅର୍ଥ ଆୟୋଗ ଚକ୍ରରେ ସମନ୍ୱିତ ପ୍ରଧାନମନ୍ତ୍ରୀ ଅନ୍ନଦାତା ଆୟ ସଂରକ୍ଷଣ ଅଭିଯାନ (ପିଏମ-ଆଶା) ଯୋଜନାକୁ ୨୦୨୫-୨୬ ପର୍ଯ୍ୟନ୍ତ ଜାରି ରଖିବାକୁ ଭାରତ ସରକାର ଅନୁମୋଦନ କରିଛନ୍ତି । ସମନ୍ୱିତ ପିଏମ-ଆଶା ଯୋଜନା କ୍ରୟ କାର୍ଯ୍ୟରେ ଅଧିକ ଫଳପ୍ରଦତା ଆଣିବା ପାଇଁ କାର୍ଯ୍ୟକାରୀ କରାଯାଇଛି, ଯାହା କେବଳ କୃଷକମାନଙ୍କୁ ସେମାନଙ୍କ ଉତ୍ପାଦର ଲାଭଦାୟକ ମୂଲ୍ୟ ପାଇବାରେ ସାହାଯ୍ୟ କରିବ ନାହିଁ ବରଂ ଉପଭୋକ୍ତାଙ୍କ ପାଇଁ ସୁଲଭ ମୂଲ୍ୟରେ ଉପଲବ୍ଧତା ସୁନିଶ୍ଚିତ କରି ଅତ୍ୟାବଶ୍ୟକ ସାମଗ୍ରୀର ମୂଲ୍ୟ ଅସ୍ଥିରତାକୁ ମଧ୍ୟ ନିୟନ୍ତ୍ରଣ କରିବ । ପିଏମ-ଆଶାର ମୂଲ୍ୟ ସମର୍ଥନ ଯୋଜନା ଅଧୀନରେ କେନ୍ଦ୍ରୀୟ ନୋଡାଲ ଏଜେନ୍ସି (ସିଏନଏ) ଦ୍ୱାରା ରାଜ୍ୟସ୍ତରୀୟ ଏଜେନ୍ସି ମାଧ୍ୟମରେ ପ୍ରାକ୍-ପଞ୍ଜୀକୃତ କୃଷକମାନଙ୍କଠାରୁ ନିର୍ଦ୍ଧାରିତ ଫେୟାର ଏଭରେଜ୍ କ୍ୱାଲିଟି (ଏଫ୍ଏକ୍ୟୁ) ଅନୁଯାୟୀ ବିଜ୍ଞାପିତ ଡାଲି, ତୈଳବୀଜ ଏବଂ କୋପ୍ରା ସିଧାସଳଖ ଏମଏସପିରେ କ୍ରୟ କରାଯାଏ ।
ଡାଲିର ଘରୋଇ ଉତ୍ପାଦନ ବୃଦ୍ଧିରେ ଯୋଗଦାନ କରୁଥିବା କୃଷକମାନଙ୍କୁ ପ୍ରୋତ୍ସାହିତ କରିବା ଏବଂ ଆମଦାନୀ ଉପରେ ନିର୍ଭରଶୀଳତା ହ୍ରାସ କରିବା ପାଇଁ ସରକାର ୨୦୨୪-୨୫ କ୍ରୟ ବର୍ଷ ପାଇଁ ରାଜ୍ୟମାନଙ୍କ ଉତ୍ପାଦନର ୧୦୦% ସମାନ ମୂଲ୍ୟ ସହାୟକ ଯୋଜନା (ପିଏସଏସ) ଅଧୀନରେ ହରଡ଼, ମୁଗ ଏବଂ ମସୁର ଡାଲି କିଣିବାକୁ ଅନୁମତି ଦେଇଛନ୍ତି।
ସରକାର ୨୦୨୫ ବଜେଟରେ ଘୋଷଣା କରିଛନ୍ତି ଯେ ଦେଶରେ ଡାଲିରେ ଆତ୍ମନିର୍ଭରଶୀଳତା ହାସଲ କରିବା ପାଇଁ ଆସନ୍ତା ୪ ବର୍ଷ ପର୍ଯ୍ୟନ୍ତ କେନ୍ଦ୍ରୀୟ ନୋଡାଲ ଏଜେନ୍ସି ଜରିଆରେ ରାଜ୍ୟମାନଙ୍କ ଉତ୍ପାଦନର ୧୦୦% ପର୍ଯ୍ୟନ୍ତ ହରଡ଼, ମୁଗ ଓ ଡାଲି କ୍ରୟ ଜାରି ରହିବ।
କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶ୍ରୀ ଶିବରାଜ ସିଂ ଚୌହାନ ଆନ୍ଧ୍ରପ୍ରଦେଶ, ଛତିଶଗଡ଼, ଗୁଜରାଟ, ହରିୟାଣା, କର୍ଣ୍ଣାଟକ, ମଧ୍ୟପ୍ରଦେଶ, ମହାରାଷ୍ଟ୍ର, ତେଲେଙ୍ଗାନା ଏବଂ ଉତ୍ତରପ୍ରଦେଶରେ ଖରିଫ ୨୦୨୪-୨୫ ଋତୁ ପାଇଁ ମୂଲ୍ୟ ସହାୟକ ଯୋଜନା ଅଧୀନରେ ମୋଟ ୧୩.୨୨ ଲକ୍ଷ ମେଟ୍ରିକ ଟନ୍ ହରଡ଼ କିଣିବାକୁ ଅନୁମୋଦନ କରିଛନ୍ତି।
ଆନ୍ଧ୍ରପ୍ରଦେଶ, କର୍ଣ୍ଣାଟକ, ମହାରାଷ୍ଟ୍ର ଏବଂ ତେଲେଙ୍ଗାନାରେ କ୍ରୟ ଆରମ୍ଭ ହୋଇସାରିଛି ଏବଂ ୧୫.୦୨.୨୦୨୫ ସୁଦ୍ଧା ଏହି ରାଜ୍ୟଗୁଡ଼ିକରେ ମୋଟ ୦.୧୫ ଲକ୍ଷ ମେଟ୍ରିକ ଟନ୍ ହରଡ଼ କ୍ରୟ କରାଯାଇଛି, ଯାହା ଦ୍ୱାରା ଫେବ୍ରୁଆରି ୧୫ ସୁଦ୍ଧା ଏହି ରାଜ୍ୟଗୁଡ଼ିକର ୧୨,୦୦୬ ଜଣ କୃଷକ ଉପକୃତ ହୋଇଛନ୍ତି। ଅନ୍ୟ ରାଜ୍ୟରେ ମଧ୍ୟ ଖୁବଶୀଘ୍ର ହରଡ଼ (ଅରହର) କ୍ରୟ ଆରମ୍ଭ ହେବ। କୃଷକମାନଙ୍କ ଦ୍ୱାରା ଉତ୍ପାଦିତ ହରଡ଼ର ୧୦୦% କେନ୍ଦ୍ରୀୟ ନୋଡାଲ ଏଜେନ୍ସି ଯଥା ନାଫେଡ୍ ଏବଂ ଏନସିସିଏଫ ମାଧ୍ୟମରେ କିଣିବାକୁ ଭାରତ ସରକାର ପ୍ରତିଶ୍ରୁତିବଦ୍ଧ ।