ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ପୂର୍ବତନ ବ୍ରିଟିଶ ପ୍ରଧାନମନ୍ତ୍ରୀ ରୁଷି ସୁନକ ଏବଂ ତାଙ୍କ ପରିବାରଙ୍କୁ ଭେଟିଛନ୍ତି। ଉଭୟ ନେତା ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ ଏବଂ ପ୍ରଧାନମନ୍ତ୍ରୀ ମୋଦୀ ରୁଷି ସୁନକଙ୍କୁ ଭାରତର ଜଣେ ଭଲ ବନ୍ଧୁ ବୋଲି ବର୍ଣ୍ଣନା କରିଥିଲେ।
ତାଙ୍କ ପତ୍ନୀ ଅକ୍ଷତା ମୁର୍ତ୍ତୀ, ଝିଅ କୃଷ୍ଣା ଓ ଅନୁଷ୍କା ଏବଂ ଶାଶୁ ସୁଧା ମୁର୍ତ୍ତୀଙ୍କ ସହ ରୁଷି ସୁନକ ମଧ୍ୟ ଯୋଗ ଦେଇଥିଲେ। ସୋସିଆଲ ମିଡିଆ ପ୍ଲାଟଫର୍ମରେ ସାକ୍ଷାତର ଫଟୋ ସେୟାର କରିବାବେଳେ ପ୍ରଧାନମନ୍ତ୍ରୀ ଲେଖିଛନ୍ତି ଯେ, ”ସୁନକଙ୍କ ପରିବାର ସହ ମିଶି ଖୁସି ଅନୁଭବ ହେଲା। ଆମେ ଅନେକ ବିଷୟ ଉପରେ ଭଲ ଆଲୋଚନା କଲୁ। ସୁନକ ଭାରତର ବହୁତ ଭଲ ବନ୍ଧୁ ଅଟନ୍ତି। ଭାରତ-ବ୍ରିଟେନ ସମ୍ପର୍କ ଆହୁରୀ ମଜବୁତ କରିବାକୁ ଇଚ୍ଛୁକ।”
ମଙ୍ଗଳବାର ଦିନ ରୁଷି ସୁନକ ମଧ୍ୟ ତାଙ୍କ ପତ୍ନୀ ଏବଂ ପିଲାମାନଙ୍କ ସହ ସଂସଦ ଗୃହରେ ପହଞ୍ଚିଥିଲେ। ରାଜ୍ୟସଭା ସାଂସଦ ସୁଧା ମୁର୍ତ୍ତୀ ମଧ୍ୟ ତାଙ୍କ ସହ ଥିଲେ। ଏହି ସମୟରେ ଲୋକସଭା ସାଧାରଣ ସମ୍ପାଦକ ଉତ୍କଳ କୁମାର ସିଂ ସଂସଦ ଭବନ ପରିସରରେ ରୁଷି ସୁନକଙ୍କୁ ସ୍ୱାଗତ କରିଥିଲେ।
ଏହାପୂର୍ବରୁ ରୁଷି ସୁନକ ନୂଆଦିଲ୍ଲୀରେ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଭେଟିଥିଲେ। ଅର୍ଥ ମନ୍ତ୍ରଣାଳୟ ଏକ୍ସପୋଷ୍ଟରେ ଲେଖିଛି ଯେ, “କେନ୍ଦ୍ର ଅର୍ଥମନ୍ତ୍ରୀ ଏବଂ କର୍ପୋରେଟ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ ଆଜି ନୂଆଦିଲ୍ଲୀରେ ପୂର୍ବତନ ବ୍ରିଟିଶ ପ୍ରଧାନମନ୍ତ୍ରୀ ରୁଷି ସୁନକଙ୍କୁ ଭେଟିଛନ୍ତି। ବଜାର ଭିତ୍ତିକ ଆର୍ଥିକ ସମ୍ପର୍କକୁ ସୁଦୃଢ କରିବା ତଥା ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ଦୁଇ ନେତା ସମ୍ଭାବ୍ୟ ନୂତନ ପଥ ଉପରେ ଆଲୋଚନା କରିଛନ୍ତି।
ଏହାପୂର୍ବରୁ ଫେବୃଆରୀ ୧୭ ତାରିଖରେ ସୁନକ ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କୁ ଭେଟିଥିଲେ। ଏସ ଜୟଶଙ୍କରଙ୍କୁ ଭେଟିବା ପରେ କହିଛନ୍ତି ଯେ, ଭାରତ-ବ୍ରିଟେନ ସମ୍ପର୍କକୁ ମଜବୁତ କରିବାରେ ସୁନକଙ୍କ ସମର୍ଥନକୁ ସେ ପ୍ରଶଂସା କରିଛନ୍ତି।
X ରେ ଏକ ପୋଷ୍ଟରେ ସେ କହିଛନ୍ତି ଯେ, “ଆଜି ଦିଲ୍ଲୀରେ ପୂର୍ବତନ ବ୍ରିଟିଶ ପ୍ରଧାନମନ୍ତ୍ରୀ ରୁଷି ସୁନକଙ୍କୁ ଭେଟିବା ଭଲ ଥିଲା। ଭାରତ-ବ୍ରିଟେନ ସମ୍ପର୍କକୁ ମଜବୁତ କରିବାରେ ତାଙ୍କର ଜାରି ସମର୍ଥନକୁ ମୁଁ ପ୍ରଶଂସା କରୁଛି।”