ନୂଆଦିଲ୍ଲୀ: ଦେଶରେ ଅଣସଂକ୍ରାମକ ରୋଗ (ଏନସିଡି) ର ବୃଦ୍ଧି ପାଉଥିବା ସମସ୍ୟାକୁ ଦୃଷ୍ଟିରେ ରଖି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଆଜି ଏକ ସ୍ୱତନ୍ତ୍ର ଏନସିଡି ଯାଂଚ ଅଭିଯାନ ଆରମ୍ଭ କରିଛନ୍ତି। ୨୦ ଫେବୃଆରୀରୁ ୩୧ ମାର୍ଚ୍ଚ ୨୦୨୫ ପର୍ଯ୍ୟନ୍ତ ଚାଲୁଥିବା ଏହି ମହତ୍ୱାକାଂକ୍ଷୀ ପଦକ୍ଷେପ, ମଧୁମେହ, ଉଚ୍ଚ ରକ୍ତଚାପ ଏବଂ ତିନୋଟି ସାଧାରଣ କର୍କଟ – ମୁଖ, ସ୍ତନ ଏବଂ ସର୍ଭିକାଲ କର୍କଟ ସହିତ 30 ବର୍ଷରୁ ଅଧିକ ବୟସର ସମସ୍ତ ବ୍ୟକ୍ତିଙ୍କର ୧୦୦% ପରୀକ୍ଷଣ ଲକ୍ଷ୍ୟ ହାସଲ କରିବାକୁ ଉଦ୍ଦେଶ୍ୟ ରଖିଛି।
ଅଣସଂକ୍ରାମକ ରୋଗର ନିରାକରଣ ଏବଂ ନିୟନ୍ତ୍ରଣ ପାଇଁ ଜାତୀୟ କାର୍ଯ୍ୟକ୍ରମ (ଏନପି – ଏନସିଡି) ଅଧୀନରେ ଆୟୁଷ୍ମାନ ଆରୋଗ୍ୟ ମନ୍ଦିର (ଏଏଏମ) ଏବଂ ଦେଶବ୍ୟାପୀ ବିଭିନ୍ନ ସ୍ୱାସ୍ଥ୍ୟ କେନ୍ଦ୍ରରେ ଏହି ଅଭିଯାନ କାର୍ଯ୍ୟକାରୀ ହେବ।
ଅଭିଯାନର ମୁଖ୍ୟ ଆକର୍ଷଣଗୁଡ଼ିକ ହେଉଛି:
- ଦ୍ୱାରରୁ ଦ୍ୱାର ପ୍ରସାରଣ: ତାଲିମ ପ୍ରାପ୍ତ ଆଶାକର୍ମୀ, ଏଏନ୍ଏମ୍ ଏବଂ ଆଗଧାଡ଼ିର କର୍ମୀମାନେ ସର୍ବାଧିକ ସ୍କ୍ରିନିଂ କଭରେଜ୍ ନିଶ୍ଚିତ କରିବା ପାଇଁ କ୍ଷେତ୍ର ପରିଦର୍ଶନ କରିବେ, ଘରେ ଘରେ ଲୋକମାନଙ୍କ ନିକଟରେ ପହଞ୍ଚିବେ।
- ଅତ୍ୟାବଶ୍ୟକ ଯୋଗାଣ : ରାଜ୍ୟ ଏବଂ କେନ୍ଦ୍ରଶାସିତ ଅଂଚଳ ସମସ୍ତ ସ୍ଵାସ୍ଥ୍ୟସେବା କେନ୍ଦ୍ରରେ ବିପି ମନିଟର, ଗ୍ଲୁକୋମିଟର ଏବଂ ଆବଶ୍ୟକ ଔଷଧ ସମେତ ଅତ୍ୟାବଶ୍ୟକ ଚିକିତ୍ସା ସାମଗ୍ରୀର ଉପଲବ୍ଧତାକୁ ନିଶ୍ଚିତ କରିବେ।
- ବାସ୍ତବ ସମୟ ପରୀକ୍ଷଣ : ଯାଂଚ ପରୀକ୍ଷଣ, ଚିକିତ୍ସା ଏବଂ ଅନୁସରଣ ସମ୍ବନ୍ଧୀୟ ତଥ୍ୟ ପ୍ରତିଦିନ ଏନପି- ଏନସିଡି ପୋର୍ଟାଲରେ ଅପଲୋଡ୍ କରାଯିବ, ଯାହା ସ୍ୱଚ୍ଛତା ଏବଂ ଉତ୍ତରଦାୟିତ୍ୱକୁ ସୁନିଶ୍ଚିତ କରିବ।
- ବହୁ ସ୍ତରୀୟ ସମନ୍ୱୟ: ଅଭିଯାନର ନିରବଚ୍ଛିନ୍ନ କାର୍ଯ୍ୟକାରିତାକୁ ସୁଗମ କରିବା ପାଇଁ ବିଭିନ୍ନ କେନ୍ଦ୍ରରେ, ବ୍ଲକ, ଜିଲ୍ଲା ଏବଂ ରାଜ୍ୟ ସ୍ତରରେ ନୋଡାଲ୍ ଅଧିକାରୀଙ୍କୁ ନିଯୁକ୍ତ କରାଯିବ।
- ଦୈନିକ ପ୍ରଗତି ସମୀକ୍ଷା: ରାଜ୍ୟ ଏବଂ କେନ୍ଦ୍ରଶାସିତ ଅଂଚଳଗୁଡିକ ମନ୍ତ୍ରଣାଳୟକୁ ପ୍ରତିଦିନ ସନ୍ଧ୍ୟା ୬ଟା ସୁଦ୍ଧା ଅପଡେଟ୍ ପ୍ରଦାନ କରିବେ, ଯାହା ନିରନ୍ତର ତଦାରଖ ଏବଂ ବୈଷୟିକ ସହାୟତା ପାଇଁ ଅନୁମତି ଦେବ।
ଜୋରଦାର ଯାଂଚ ଅଭିଯାନ ନିମ୍ନଲିଖିତ ଲକ୍ଷ୍ୟ ହାସଲ କରିବାକୁ ଉଦ୍ଦେଶ୍ୟ ନେଇ କାର୍ଯ୍ୟକରୁଛି:
- ୧୦୦% ସ୍କ୍ରିନିଂ କଭରେଜ୍: ଏନସିଡିଗୁଡିକୁ ଶୀଘ୍ର ଚିହ୍ନଟ କରିବା ଏବଂ ଠିକ୍ ସମୟରେ ହସ୍ତକ୍ଷେପ ନିଶ୍ଚିତ କରିବା ହେଉଛି ଏହି ଅଭିଯାନର ଲକ୍ଷ୍ୟ।
- ଯତ୍ନ ସହ ଉନ୍ନତ ସଂଯୋଗ : ଗଠନମୂଳକ ଚିକିତ୍ସା ଏବଂ ଅନୁସରଣ ପ୍ରୋଟୋକଲ୍ ପ୍ରତିଷ୍ଠା କରି, ଏହି ଅଭିଯାନ ଅଣସଂକ୍ରାମକ ରୋଗ ସହିତ ଜଡିତ ଜଟିଳତାକୁ କମ୍ କରିବାକୁ ଚେଷ୍ଟା କରେ।
- ଉତ୍ତମ ସ୍ୱାସ୍ଥ୍ୟ ଫଳାଫଳ: ଏହି ପଦକ୍ଷେପ ସାରା ଦେଶରେ ସ୍ୱାସ୍ଥ୍ୟସେବା ଖର୍ଚ୍ଚ ହ୍ରାସ କରିବ ଏବଂ ସମଗ୍ର ଦେଶରେ ବ୍ୟକ୍ତିବିଶେଷଙ୍କ ଜୀବନଶୈଳୀକୁ ଉନ୍ନତ କରିବ ବୋଲି ଆଶା କରାଯାଉଛି।
ଆୟୁଷ୍ମାନ ଭାରତ ପଦକ୍ଷେପ ଅନୁଯାୟୀ ପ୍ରତିଷେଧକ ସ୍ୱାସ୍ଥ୍ୟସେବାକୁ ମଜବୁତ କରିବା ଏବଂ ଗୁଣାତ୍ମକ ସ୍ୱାସ୍ଥ୍ୟ ସେବାରେ ସର୍ବଭାରତୀୟ ସୁବିଧା ସୁନିଶ୍ଚିତ କରିବା ପାଇଁ ଭାରତ ସରକାର ପ୍ରତିବଦ୍ଧ ଅଟନ୍ତି। ଏହି ସ୍ୱତନ୍ତ୍ର ଅଭିଯାନ ଏକ ସ୍ଵାସ୍ଥ୍ୟକର ତଥା ଅଣସଂକ୍ରାମକ ରୋଗମୁକ୍ତ ଭାରତ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ, ଯାହା ନାଗରିକମାନଙ୍କୁ ସେମାନଙ୍କର ସ୍ୱାସ୍ଥ୍ୟ ଏବଂ ସୁସ୍ଥତାର ଦାୟିତ୍ୱ ନେବାକୁ ସକ୍ଷମ କରିଥାଏ।