କଂଗ୍ରେସରେ ମୋର ଭୂମିକା କ’ଣ?: ରାହୁଲ ଗାନ୍ଧୀଙ୍କୁ ପ୍ରଶ୍ନ କଲେ ଶଶି ଥରୁର, ମୋଦୀଙ୍କୁ ପ୍ରଶଂସା କରିଛନ୍ତି?

ନୂଆଦିଲ୍ଲୀ: କଂଗ୍ରେସ ସାଂସଦ ଶଶି ଥରୁର ଏବଂ ଦଳର ନେତୃତ୍ୱ ମଧ୍ୟରେ ତିକ୍ତତା ଜାରି ରହିଛି। ନିକଟରେ ସେ ରାହୁଲ ଗାନ୍ଧୀଙ୍କୁ ଦିଲ୍ଲୀରେ ଭେଟିଥିଲେ ମଧ୍ୟ ତାଙ୍କ ଅଭିଯୋଗର ସମାଧାନ ହୋଇପାରିଲା ନାହିଁ। ସୂଚନାନୁସାରେ, ଅଲ ଇଣ୍ଡିଆ କଂଗ୍ରେସ କମିଟି (ଏଆଇସିସି) ବର୍ତ୍ତମାନ ଥରୁର ପ୍ରତି ବିନମ୍ରତା ଦେଖାଇବା ସ୍ଥିତିରେ ନାହିଁ।

ରାହୁଲ ଗାନ୍ଧୀଙ୍କୁ ତାଙ୍କ ଭୂମିକା ସ୍ପଷ୍ଟ କରିବାକୁ ଥରୁର ଦାବି କରିଥିଲେ। ଏଥିସହ ସେ କହିଛନ୍ତି ଯେ, ଦଳରେ ତାଙ୍କୁ ଅଣଦେଖା କରାଯାଉଛି। କିନ୍ତୁ ରାହୁଲ ଗାନ୍ଧୀ ଏହି ବୈଠକରେ କୌଣସି ଠୋସ୍ ଆଶ୍ୱାସନା ଦେଇନାହାଁନ୍ତି, ଯେଉଁଥିପାଇଁ ଥରୁର ଅଧିକ ଅସନ୍ତୁଷ୍ଟ ଥିବା ଜଣାପଡିଛି।

ଥରୁରଙ୍କ ବିବୃତ୍ତିରେ AICC ଅସନ୍ତୁଷ୍ଟ:

ଶଶି ଥରୁରଙ୍କ କିଛି ବିବୃତ୍ତି ଏବଂ ପ୍ରବନ୍ଧରେ AICC ଅସନ୍ତୁଷ୍ଟ ଅଛି। ପ୍ରଧାନମନ୍ତ୍ରୀଙ୍କ ଆମେରିକା ଗସ୍ତ ଏବଂ ଡୋନାଲ୍ଡ ଟ୍ରମ୍ପଙ୍କ ସହ ସାକ୍ଷାତ ସମ୍ପର୍କରେ ଥରୁରଙ୍କ ମତ ଦଳର ଅଫିସିଆଲ ଲାଇନଠାରୁ ଭିନ୍ନ ଥିଲା। ଏହା ବ୍ୟତୀତ କେରଳର LDF ସରକାରଙ୍କ ଶିଳ୍ପ ନୀତିକୁ ପ୍ରଶଂସା କରୁଥିବା ତାଙ୍କ ଆର୍ଟିକିଲରେ ମଧ୍ୟ କେରଳ କଂଗ୍ରେସ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି।

ସଂସଦରେ ପ୍ରମୁଖ ପ୍ରସଙ୍ଗରେ କହିବାକୁ ତାଙ୍କୁ ପର୍ଯ୍ୟାପ୍ତ ସୁଯୋଗ ଦିଆଯାଉ ନ ଥିବାରୁ ଥରୁର ମଧ୍ୟ ଅସନ୍ତୁଷ୍ଟ। ସେ ରାହୁଲ ଗାନ୍ଧୀଙ୍କୁ କହିଛନ୍ତି ଯେ, ଦଳର ନେତୃତ୍ୱ ପରିଚାଳନା କରିବାର ତାଙ୍କର ଦକ୍ଷତା ଅଛି, କିନ୍ତୁ ତାଙ୍କୁ ସେହି ଦାୟିତ୍ଵ ଦିଆଯାଉ ନାହିଁ।