ନୂଆଦିଲ୍ଲୀ: ଅଭିନେତ୍ରୀ ପ୍ରୀତି ଜିଣ୍ଟା ଆଜି ସୋସିଆଲ ମିଡିଆରେ ଏକ ପୋଷ୍ଟ ସେୟାର କରିଛନ୍ତି। ଯେଉଁଥିରେ ସେ ୧୦ ବର୍ଷ ପୂର୍ବେ ନିଆଯାଇଥିବା ଋଣ ବିଷୟରେ ଉଲ୍ଲେଖ କରିବା ସହ ଏହାକୁ ମିଥ୍ୟା ଖବର ପ୍ରଚାର କରୁଥିବା ଅଭିଯୋଗ କରି କଂଗ୍ରେସ ପାର୍ଟିକୁ ସମାଲୋଚନା କରିଛନ୍ତି। ସେ ଦଳକୁ କହିଛନ୍ତି ଯେ, ଏହି କାର୍ଯ୍ୟ ପାଇଁ ସେମାନେ ଲଜ୍ଜିତ ହେବା ଉଚିତ୍। ‘ଏକ୍ସ’ ହ୍ୟାଣ୍ଡେଲ କେରଳ କଂଗ୍ରେସ ଏକ ପୋଷ୍ଟ ସେୟାର କରିଛି ଯେଉଁଥିରେ ଲେଖାଥିଲା ଯେ, “ସେ (ପ୍ରୀତି ଜିଣ୍ଟା) ତାଙ୍କ ସୋସିଆଲ ମିଡିଆ ଆକାଉଣ୍ଟକୁ ବିଜେପିକୁ ଦେଇଥିଲେ ଏବଂ ୧୮ କୋଟି ଟଙ୍କା ଛାଡ କରିଥିଲେ। ଗତ ସପ୍ତାହରେ ବ୍ୟାଙ୍କ କ୍ଷତି ସହିଥିଲା ଏବଂ ବର୍ତ୍ତମାନ ଜମାକାରୀମାନେ ଟଙ୍କା ପାଇଁ ରାସ୍ତାକୁ ଆସିଛନ୍ତି।”
ସୋସିଆଲ ମିଡିଆରେ ପ୍ରୀତି ଜିଣ୍ଟା କ’ଣ ଲେଖିଥିଲେ?:
କେରଳ କଂଗ୍ରେସର ଏହି ପୋଷ୍ଟ ଉପରେ ପ୍ରୀତି ଜିଣ୍ଟା ଉତ୍ତକ୍ଷିପ୍ତ ହୋଇଛନ୍ତି। ଏବଂ ସେ କଂଗ୍ରେସକୁ ନିନ୍ଦା କରିଛନ୍ତି। ସେ ଲେଖିଛନ୍ତି ଯେ, “ମୁଁ ମୋର ସୋସିଆଲ ମିଡିଆ ଆକାଉଣ୍ଟ ଚଳାଉଛି ଏବଂ ଏଭଳି ମିଥ୍ୟା ଖବର ପ୍ରଚାର କରିବା ପାଇଁ ଲଜ୍ଜା କରିବା ଉଚିତ୍! ମୋ ପାଇଁ କେହି କିଛି ଲେଖି ନାହାଁନ୍ତି କିମ୍ବା ଋଣ ନେଇ ନାହାଁନ୍ତି।” କୌଣସି ପାର୍ଟୀ ଦ୍ଵାରା ମିଥ୍ୟା ଖବର ପ୍ରଚାର କରିବା ଉପରେ ଅଭିନେତ୍ରୀ ଆଶ୍ଚର୍ଯ୍ୟ ପ୍ରକଟ କରିଥିଲେ। ସେ ଆହୁରି ମଧ୍ୟ ଲେଖିଛନ୍ତି ଯେ, ମୁଁ ଆଶ୍ଚର୍ଯ୍ୟ ହୋଇଛି ଯେ କୌଣସି ରାଜନୈତିକ ଦଳ କିମ୍ବା ସେମାନଙ୍କ ପ୍ରତିନିଧୀ ମୋର ନାମ ଏବଂ ଫଟୋଗ୍ରାଫ ବ୍ୟବହାର କରି ମିଥ୍ୟା ଖବର ପ୍ରଚାର କରୁଛନ୍ତି ଏବଂ ଭିତ୍ତିହୀନ କଥା କହୁଛନ୍ତି।
ପ୍ରୀତି ଜିଣ୍ଟା କ’ଣ ପାଇଁ ବିରକ୍ତ ହେଲେ?:
ଏହି ଘଟଣାର ସ୍ପଷ୍ଟୀକରଣ ଦେଇ ଅଭିନେତ୍ରୀ ଆହୁରି ଲେଖିଛନ୍ତି ଯେ, “ରେକର୍ଡ ପାଇଁ ଏକ ଋଣ ନିଆଯାଇଥିଲା ଯାହାକି ସମ୍ପୂର୍ଣ୍ଣ ପରିଶୋଧ କରାଯାଇଥିଲା ଏବଂ ଏହା ୧୦ ବର୍ଷରୁ ଅଧିକ ହୋଇସାରିଛି। ଆଶା କରୁଛି ଏହା ସ୍ପଷ୍ଟ ହେବ ଏବଂ ସାହାଯ୍ୟ କରିବ ଯାହା ଦ୍ଵାରା ଭବିଷ୍ୟତରେ ଭୁଲ ବୁଝାମଣା ହୋଇପାରିବ ନାହିଁ।”
ପ୍ରକାଶ ଯୋଗ୍ୟ ଯେ, ନିକଟରେ ପ୍ରୀତି ଜିଣ୍ଟାଙ୍କ ବିଷୟରେ ଖବର ଆସିଥିଲା ଯେ, ନ୍ୟୁ ଇଣ୍ଡିଆ କୋଅପରେଟିଭ୍ ବ୍ୟାଙ୍କ ଦ୍ଵାରା ତାଙ୍କର ୧୮ କୋଟି ଟଙ୍କା ଛାଡ କରାଯାଇଛି। ବାସ୍ତବରେ ଅନିୟମିତତା ହେତୁ ନ୍ୟୁ ଇଣ୍ଡିଆ କୋଅପରେଟିଭ୍ ବ୍ୟାଙ୍କକୁ କିଛି ସମୟ ପୂର୍ବରୁ ସମସ୍ୟାର ସମ୍ମୁଖୀନ ହେବାକୁ ପଡୁଥିଲା, ଯେଉଁ କାରଣରୁ ଗ୍ରାହକମାନେ ଟଙ୍କା ପାଇବାରେ ଅସୁବିଧାର ସମ୍ମୁଖୀନ ହୋଇଥିଲେ। ସେତେବେଳେ ଖବର ଆସିଥିଲା ଯେ, ବ୍ୟାଙ୍କ ନିୟମ ପାଳନ ନକରି କିଛି ଲୋକଙ୍କୁ ବିପୁଳ ଋଣ ଦେଇଥିଲା ଏବଂ ସେମାନଙ୍କ ଋଣ ମଧ୍ୟ ଛାଡ କରାଯାଇଥିଲା। ଏହି ତାଲିକାରେ ଅଭିନେତ୍ରୀ ପ୍ରୀତି ଜିଣ୍ଟାଙ୍କ ନାମ ମଧ୍ୟ ଥିବା କୁହାଯାଇଥିଲା।