ଗ୍ଲୋବାଲ୍ ଓ୍ବାର୍ମିଂ ଏବଂ ପାଣିପାଗର ପରିବର୍ତ୍ତନ ପାଇଁ ଏବେ ଜଳ ସଂକଟ ଦେଖିବାକୁ ମିଳୁଛି । ଆଗାମୀ ଭବିଷ୍ୟତରେ ଜଳ ପାଇଁ ସଂଘର୍ଷ ହେବ ବୋଲି ଜଣାପଡୁଛି । ଆନ୍ଧ୍ରପ୍ରଦେଶରେ ଏପରି ଏକ ଘଟଣା ଘଟିଥିବାର ନଜରକୁ ଆସିଛି । ଏଠାରେ ପାନୀୟ ଜଳ ପାଇଁ ଦୁଇ ମହିଳାଙ୍କ ମଧ୍ୟରେ ଝଗଡା ହୋଇଥିଲା । ଝଗଡା ଉଗ୍ରରୂପ ଧାରଣ କରିବା ସହିତ ଏହି ଘଟଣାରେ ଜଣକ ଜୀବନ ଚାଲିଯାଇଛି । ଏହି ଘଟଣାରେ ପୋଲିସ୍ ମାମଲା ରୁଜୁ କରି ତଦନ୍ତ ଚଳାଇଛି । ମିଳିଥିବା ସୂଚନା ଅନୁସାରେ ଆନ୍ଧ୍ରପ୍ରଦେଶର ଶ୍ରୀକାକୁଲମ୍ ଜିଲ୍ଲାରେ ସାର୍ବଜନିକ ନଳରୁ ମହିଳା ପାଣି ଭରୁଥିଲେ । କିନ୍ତୁ ଲାଇନ୍ର ବାହାରି ପାଣି ନେବା ଘଟଣାକୁ ନେଇ ଝଗଡ଼ା ଆରମ୍ଭ ହୋଇଥିଲା । ଏହି ଝଗଡାରେ ୩୮ ବର୍ଷୀୟା ତାତୀପୁଡି ପଦ୍ମାଙ୍କ ଉପରେ କିଛି ମହିଳା ଆକ୍ରମଣ କରିଥିଲେ । ଏହି ଆକ୍ରମଣରେ ମହିଳା ଜଣକଙ୍କର ମୃତ୍ୟୁ ହୋଇଯାଇଛି । ସୂଚନାଯୋଗ୍ୟ ଯେ, ଆଜିର ସମୟରେ ଦେଶର କିଛି ଅଂଶରେ ଜଳ ବହୁଳତାର କଷ୍ଟ ଦେଖିବାକୁ ମିଳୁଥିବାବେଳେ ଅନ୍ୟ ପଟେ ଜଳ ବିହୁନତାର କଷ୍ଟ ମଧ୍ୟ ଦେଖାଯାଉଛି । ଆନ୍ଧ୍ରପ୍ରଦେଶ, ତାମିଲନାଡୁ, ଚେନ୍ନାଇ ପରି ସହରରେ ଜଳ କଷ୍ଟ ଚାଲିଥିବାବେଳେ ଆସାମ, ବିହାର ଆଦି ଅଞ୍ଚଳରେ ଅତ୍ୟଧିକ ବର୍ଷା ଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଛି ।
